Read Car_Nicobarese YERIMIĀ 33 Bible Online

YERIMIĀ 33 - Car_Nicobarese bible

YERIMIĀ 33

¹Yih ngam ṙô ngam Mā Tēv nö in Yeremiā im innët heuh, hē ò nö ṙòngmö öpikūö nö elchūök amahati:

²Ngö ṙô an ngam Mā Tēv ngam vamī tumlat, ngam Mā Tēv mahalēnngen e nö haköpngö e; Mā Tēv ap minë-eny ò:

³Havëken chu ngaich chū-ö min sapṙô yīö, vë-eny nang yīö inrē tö nup tökiröngen tönyatngö inrē nup öt mikahlōn yīö.

⁴Tön ngö ṙô an ngam Mā Tēv, Ngam Tēv Israel, tö inlahen në patī ngih elpanam në patī yip rācha inrē aṅ Yūtā minë töṙôngi tökūö vinī-i chūök linaklö nup tö afônglöngö chūök kamyīng linaklö inrē tökūö sanët;

⁵Yih yip aṅ Kālti nö kiyung hatöö-öl u inrē tö alaha kupah tarik yip töfëli tö chu i tanānyö chu lanīnö chu inrē, pò chu hanyatngö kūö re tö ngih elpanam kūö nup öt lanöökö cha.

⁶Yĕh meuk, kētö lanööken chin min in e inpēt vah inrē, ngaich chū-ö min hapĕt vah cha ngaich pōyen hameukti in cha tö kanôlò innyatlö inrē.

⁷Havan tö nup kanôlò Yūtā chin min kanôlò Israel inrē, ngaich vīlen u nö sā re ik raneh.

⁸Ahetlen cha chin min ṙā-ang i nup fālen tökööl cha nö in chu, aṙēlö nup fālen tökööl cha chin min inrē ök inhôngen chu inrē.

⁹Ngaich ngih elpanam min nö in chu nö minë-eny ṙanāmölōn, ineū-euṅ ane inrē kanôlò i kūö pumnāmö tarik nö ṙòkhöre ing tumlat yip hamang nuk tölöök tī chu in cha; pa-ekūö yip min kichëyöre inrē tökūö nuk tölöök nuk kanôlò e inrē mineukṙen e tö chu.

¹⁰Ngö ṙô an ngam Mā Tēv: In ngih chūökö ngih ṙô yīö, Öt aṅhaṅvkūö an tö tarik hēk töṙeūla, el nup elpanam Yūtā el kanröönö Yērusalem inrē nup töt aṅhāvkūö, öt tarīku hēk öt aṅhavkūö hēk öt töṙeūlavö,

¹¹Hāngö min nö hēk nö umuh nīölö töṙāmölōn nīölö ṙô ṙanāmölōn inrē, ṙô öp töhapīhö kikōnyö, ṙô öp töhapīhö kikānö inrē, ṙô yip tumkökṙôre, hē cha nö kētö nup nöinyö tökētu nö el patī ngam Mā Tēv: Ha-öinytö tī ngam Mā Tēv yip tömaṙôngö, tön tölöök an ngam Mā Tēv, pò ngam tököp hanāngenlōn ò nö töng öt chanūhuvṙen! Pò chu min havantö nup kanôlò ngam panam nö sā ik raneh, ṙô ngam Mā Tēv.

¹²Ngö ṙô an ngam Mā Tēv yip tömaṙôngö: I ngih chūökö ngih töt aṅhavkūö, öt tarīku hēk öt töṙeūlavö, i në elpanam nö ṙòkhöre inrē, hēk min nö iyöngö tö yōm pököre nö heuhlö alaha nup pököre cha.

¹³I nup elpanam kui rung panam, i nup elpanam Sefelah, i nup elpanam Nekep inrē, im panam Penyamin, I nup chūökö mahavīlen Yērusalem, el nup elpanam Yūtā inrē, nup pököre min nö hēk nö lökngö elkatòh kël ap kamheūṅkö u, ṙô ngam Mā Tēv.

¹⁴Yĕh meuk yih nup sakāmö, ṙô ngam Mā Tēv, hē chu min hateungngö ngam kinlēḵngô i patī Israel i patī Yūtā inrē.

¹⁵I nup sakāmö ip ṙētak inrē chū-ö min vīten öp tölöök Pak nö sīöpnyi nö ṙā-ang in Tāvit; ngaich anga-aṅ min nö im öt michūṙen nö kahôka i lanöökö inrē nö im panam.

¹⁶I nup sakāmö anū-ö min Yūtā nö hayöökaṙen Yērusalem inrē min nö öt pinhë-evkūö nö iyöng. Angū-ö ön ngih min minënyö e nö havëka: Lanöökö hī An ngam Mā Tēv.

¹⁷Pòn ngö ṙô ngam Mā Tēv: Öt hētu ap min Tāvit nö hĕng tak hanāṅten tö tarik amūichhak nö el kantēra ngam patī Israel,

¹⁸Kūönṙô inrē lamökngörit Lēvi min nö öt hētu nö hāṅten tö tarik mī-ikūö chu nö kētö töföngö tökētu, nö föng sāiny tökētu, örheūheu inrē nö vī nup tökētuvö.

¹⁹Yih ngam ṙô ngam Mā Tēv nö in Yaremiā:

²⁰Ngö ṙô An ngam Mā Tēv: Yē meh kô piyāingö ngam kinlēḵngô chu im sakāmö ngam kinlēḵngô chu inrē im hatööm, hòṅ ngam sakāmö tö ngam hatööm inrē min nö öt yih nö ip töhalēni ṙētak u,

²¹Ngaich kô-òren inrē ngam kinlēḵngô chu in Tāvit ök tarik chu nö piyāyi, hòṅ ò min nö öt kūönu tö kikōnyö nö hayöng nö el kantēra ò, ngam kinlēḵngô chu inrē in yip kūönṙô lamökngörit Lēvi mameukṙen chu.

²²Sā minë tömaṙôngö el halīöngö nö öt kanṙeūken minë kuyāyö ngam mai inrē nö öt kanlahen ṙôken, ngatī chū-ö min ṙūölö ṙôken yip kūön Tāvit öp tarik chu, yik kūöṙô inrē lamökngörit Lēvi yip mameukṙen chu.

²³Yih ngam ṙô ngam Tēv nö in Yeremiā.

²⁴Öt meukngöre öi yī-ö tö ṙô vē tarik, nët hang mupīhö yik sahō-o ngam Mā Tēv yik katöllö ò? Ngati inlahen cha-a nö mināichṙen tö vē tarik chu lökten cha nö öt ngöhören nö pumnamö tarik nö i kūö cha.

²⁵Ngö ṙô an ngam Mā Tēv: Yē chu öt haköpngö ngam kinlēḵngô chu im sakāmö hatööm inrē nup chöngö inrē im halīöngö im tumlat inrē,

²⁶Ngaich chū-ö min sōḵen yip kūön Yāköp yip kūön Tāvit inrē ngam tarik chu ngaich inrē min öt hĕng tak atöllö tö yip kūön ò nö mahayöng i kui vē kūön Aprahām, Isak, Yāköp inrē. Pò chu min havantö nuk kanôlò cha, aṙē-ĕlōn tö cha min inrē.