Read Car_Nicobarese YERIMIĀ 34 Bible Online

YERIMIĀ 34 - Car_Nicobarese bible

YERIMIĀ 34

¹Ngam ṙô yamih nö in Yeremīā nö ṙā-ang im Mā Tēv, hē Nēpukatnēsat rācha aṅ Pēpilön yik kumyung in ò inrē tö nuk pūlngö ing tumlat elkatòh chöngö ò ṙòkhöre inrē yik tarik nö kiyung inrē yik tarik nö kiyung nö lā-al Yērusalem lāḵlö nuk elpanam e inrē:

²Ngö ṙô an ngam Mā Tēv ngam Tēv Israel. Kuṙòh vë-ekūö Sētikiā öp rācha aṅ Yūtā ngö ṙô tö ò, Ngö ṙô an ngam Mā Tēv: Yĕh meuk, kētö ngih chin elpanam eltī öp rācha aṅ Pēpilön, ngaich föngngö e min anga-aṅ nö i tameūyö.

³Hö-ö man min öt kô-òngvah ṙā-ang eltī ò, kē-ĕ pöri min kô-òngvah ngaich kētu eltī ò; meuk öp rācha man min aṅ Pēpilön an havööhenhöö kūö mat ngaich vë-ekūö ò an havööhen kūö; ngaich chuh Pēpilön më-eṅ min.

⁴Hang ṙô ngam Mā Tēv pöri, Ō Hēsikiā rācha aṅ Yūtā! Ngö ṙô an ngam Mā Tēv tö inlahen meh: Hö-ö man min kapah tökūö sanët;

⁵I kumchikṙen man min kapah. Ngaich sā nuk tötahūsa nö föngö nö i yik yöng meh yik lā-urēh rācha mu-urēhĕkūö meh, ngatī tī min yip tarik nö föng tötahūsa nö in meh harāmö meh inrē, nö ngö ṙô Aōla mā! Pò chu ṙônyö ngam ṙô, ṙô ngam Mā Tēv.

⁶Ngaich ök pròfĕt Yarimiā, Yeremiā nö keuheūtnyöre ṙô tö në ṙô nö in Sētikia ök rācha aṅ Yūtā, nö i Yērusalem,

⁷Hē yik kumyung aṅ ik rācha aṅ Pēpilön nö kiyung nö lā-al Yērusalem lā-al nuk elpanam Yūtā inrē nuk tö-ōtren, Lakis Asëka inrē; pòn höng anū-ö tītö elpanam Yūtā tö-ōtren nö kinlongluvö tö chūök kumyung.

⁸Ngam ṙô yamih nö in Yarimiā/Yeremiā nö ṙā-ang im Mā Tēv, unôichrit ök rācha Sētikiā nö vī kinlēḵngô nö in yik tarik nö ṙòkhöre i Yērusalem nö ahangnyö ṙinā-nyö nö in cha,

⁹Tö cha nö hōtu nö ṙānyö yip Hiprū töhakövö, kikōnyö kikānö inrē hòn öt hĕng tak mahaköv Yahūti, öp mak alaha ò.

¹⁰Ngaich cha-a nö hang ṙô-ò, ṙòkhöre yik kūön rācha tö yik tarik inrē yik hamô-òṅ ngam chöngö hinôten cha nö kö ṙānyö yik töhakövö in cha kikōnyö hēk, kikānö hòṅ cha nö öt hēk nö haköviyö; hang cha-a ngaich ṙānyen cha.

¹¹Unôich pöri cha-a nö havanritre ngaich kē kikānö kikōnyö inrē nö hēk nö töhakövö yik ṙahānyö cha nö ngaich, ngaich kētencha nö el inkövö.

¹²Yih ngaich ngam ṙô ngam Mā nö in Yarimiā/Yeremiā nö ṙā-ang im Mā Tēv:

¹³Ngö ṙô An ngam Mā Tēv ngam Tēv Israel; Vī kinlēḵngô chin in yik yöng yīö hē chu kēnyen cha ṙā-ang ap panam Aikup, ṙā-ang ap patī inkövö, öich ngö ṙô.

¹⁴I kinheūtentö tafūöl samyeūheu yin kö ṙānyö yip holre Hiprū yip tö inyihtu nö in yīö tö ngaich inrē nö tafūöl samyeūheu nö la-evṙen nö in yīö; hòṅ ṙānyen ò yī-ö nö ṙā-ang im linöökö la-en yīö. Hö-ö pöri yik yöng yīö nö hang ṙô chu hēk öt asītö elnang re nö in chu.

¹⁵Höng möl yin yī-ö havöötö ellōn re ngaich la-evṙen tö tö-töchip i kūö chu öi ahangkö ṙinānyö, kö i holre, ngaich vī kinlēḵngô yī-ö i kūö chu el ngam patī ngam töhavëka nö i minë-eny chu;

¹⁶ngaich pöri yī-ö hēk havīngöre öi hachōichngö minë-eny chu hē yīö hēk kö kēḵ kikōnyö kikānö inrē nö töhakövö tö yīö,yik töṙānyu sin tö yīö nö sā lōn cha, ngaich kēhötnen cha yī-ö nö elkatòh chöngö yīö nö töhakövö tö yīö.

¹⁷Lökten, ngö ṙô an ngam Mā Tēv: Hö-ö yin hang chöngö chu i inhangkö ngam ṙinānyö, öi kö i mak alahare i holre inrē; yĕh meuk, ahangkö ṙinānyö yīö chin chū-ö i kūö sanët, inyāchö, tölëlngökūö invah inrē, ṙô ngam Mā Tēv. Vīten yīö chin min pinhë-eṅkūö në pūlngö ngih tumlat.

¹⁸Ngaich yip tarik töfāluṙen nö im kinlēḵngô chu nö öt haköp kaha ngam kinlēḵngô ngam ṙô cha nö i kūö chu, vīten cha chin min nö sā öp kun nuā töhatāknyu nö nët tit ngaich cha-a nö lökngö hôi nup tönët tit-

¹⁹Yip kūön rācha aṅ Yērusalem, yip kumkantöre, yip kūönṙô, yip tarik inrē nö ṙòkhöre aṅ ngam panam yip lamökngö hôi minë alaha ök kun nuā;

²⁰Ngaich chū-ö min kēten cha eltī yip lā-al cha eltī yip chamöh nômö cha inrē. Ngaich nup alaha cha tökapah min nö nyā-aṅkūö nup chehechōn el kuföt nup töṙeūla inrē el tumlat.

²¹Sētikiā inrē ap rācha Yūtā, tö yip kūön rācha in ò nö kētu min tö chu nö eltī yip lā-al cha eltī cha inrē yip chamöh nômö cha, eltī yip kumyung in öp rācha aṅ Pēpilön yip töheūliyö nö ṙā-ang in yīö.

²²Yĕh meuk, chöngu chin min, ṙô ngam Mā Tēv, ngaich min havantencha hēk nö i ngih elpanam; ngaich lā-al e min cha-a nö kiyung, ngaich kē-ĕ e, föngngö e ngaich nö i kūö tameūyö. Vīten në elpanam Yūtā chin min nö öt aṅhav nö öt iyöngö tö tarik.