Read Car_Nicobarese YERIMIĀ 35 Bible Online

YERIMIĀ 35 - Car_Nicobarese bible

YERIMIĀ 35

¹Ngam ṙô yamih nö in Yarimiā/Yeremiā nö ṙā-ang im Mā Tēv hē nuk sakāmö Yāhōyakim ök kikōnyö kūön Yôsayā, rācha aṅ Yūtā:

²Kuṙòh chuh i patī yip Rēkap vë-ekūö cha, kēten cha inrē el ngam patī ngam Mā Tēv, el öp töhĕng i nup urôhò; kē-ĕkūö cha tö vāin nö òk.

³Löken chu kē-ĕ Yā-asaniā ök kikōnyö kūön Yarimiā/Yeremiā ök kikōnyö kūön Hapāsinia, tö yik hol maneuk ò, ṙòkhöre inrē kikōnyö kūön ò, keuheūtlöre yik aṅ patī yik Rēkap inrē.

⁴Kēten cha chū-ö ngaich nö ël ngam patī ngam Mā Tēv el öp urôhò yik kikōnyö kūön Hanan ök kikōnyö kūön Iktaliyā ök tarik ngam Tēv töröhta nö ik urôhò yik kūön rācha, lātulöng tök urôhò Mā-āsayā ök kikōnyö kūön Sālum, öp yōm ök el milūkö.

⁵Ngaich chū-ö ṙātö nuk neū-euṅ tö tööḵlö tö vāin i kūö yik Rēkap, chūök òk inrē, ngaich ngö ṙô chū-ö tö cha, Òk vāin yin.

⁶Ngaich pöri cha-a nö sapṙô nö ngö, Hö-ö in hòṅ òk vāin, pò Yônatap ök kikōnyö kūön Rēkap, ök yöng ih, nö chöngu tö ih nö ngö, Hö-ö yin min òk vāin, öt rēhĕn yī-ö öt rēhĕn yip kikōnyö kūön yīö öi höng örheūheu;

⁷Hö-ö yin min teūichtö kulöl: hö-ö yin min teūich hēk panô-òṅvö tö panô-òṅ vāin; höng iyöng el rūkui pöri yī-ö irô-òten nup sakāmö yīö, hòṅ yīö ṙōl sumkam aṅ ip panam chūök yiö rahëichtaṙen iyöng.

⁸Ngaich in hangṙô Yônatap ök kikōnyö kūön Rēkap, ökyöng ih, i nuk tinölô ih tö ò nö ṙòkhöre, öi öt òk vāin i rô-òtö në sakāmö, īhö tö yip pīhö ih kūön ih kikōnyö, hēk kūön ih kikānö,

⁹Öt mānlö patī inrē öi iyöng ël u. Hö-ö in panô-òṅvö tö panô-òṅ vāin hēk panô-òṅ hēk kulöl;

¹⁰Höng iyöng el rūkui pöri ihö, ngaich öi hang chöngö teūngen inrē tö nuk tinölô ih tö Yônatap ök yöng ih.

¹¹Hē Nepukatnēsar pöri ök rācha aṅ Pēpilön nö yih nö lā-al ngih panam, ngaich ngö ṙô īhö, Tā-a töi chuh Yērusalem tön pa-ekūö in tö yip kumyung aṅ Kālti kumyung inrē aṅ Sīriā. Lökten in iyöng Yērusalem.

¹²Ngaich yih ngam ṙô ngam Mā Tēv nö in Yarimiā/Yeremiā:

¹³Ngö ṙô an ngam Mā Tēv yip tömaṙôngö, ngam Tēv Israel: Kuṙòh ngö ṙô tö yip tarik aṅ Yūtā yip aṅ Yērusalem inrē, Hö-ö yin hōḵ kē inköphöti hang në ṙô chu inrē? ṙô ngam Mā Tēv.

¹⁴Ngam chöngö Yônatap ök kikōnyö kūön Rēkap tökētu nö ik kikōnyö kūön Rēkap tökētu nö in yik kikōnyö kūön ò, sinôḵngen cha nö òk vāin, ngaich nö köp; öt hĕng tak tö cha amòk söl ing töngamuh, pò cha nö hang chöngö ök yöng re. Ngaich chū-ö öt ṙākôre in yīö, hö-ö pöri yī-ö hang ṙô chu.

¹⁵Tīntö yip tarik re chin in yīö yip pròfĕt, tīnten cha nöng iṙūöhen, nö ngö ṙô, Kö havööngökūöre yin ṙā-ang tötlöök talöököre, halööktit nup la-en yīö inrē, uh yī-ö inrē tömrit tahëng tēv öi lök la-en u,ngaich yī-ö min iyöng im panam ngam kahëtö chu in yīö in yik yöng yīö inrē. Hö-ö pöri yī-ö asītö el nangre hēk hangṙô chu.

¹⁶Hang chöngö Yônatap yik kikōnyö kūön ò ök kikōnyö kūön Rēkap ngam kahëtö ök yöng cha nö in cha, hö-ö pöri vē tarik nö hang chöngo chu.

¹⁷Lökten, ngö ṙô an ngam Mā Tēv, ngam Tēv yip tömaṙôgö, ngam Tēv Israel: Yĕh meuk, kētö kui Yūtā chin yip aṅ Yērusalem inrē nö ṙòkhöre tö në tötlöök tö ṙônyu nö ngaich tö chu öich lā-al cha; pò chu ngaich ṙô-òvö tö cha ngaich rö-ö cha-a nö hang, havëken cha chin ngaich rö-ö cha-a nö sapṙô.

¹⁸Ngö ṙô pöri Yarimiā/Yeremiā tö yip aṅ patī Rēkap, ngö ṙô an ngam Mā Tēv yip tömaṙôngö, ngam Tēv Israel: Pò yīö hang chöngö Yônatap ök yöng yīö, ngaich haköp nup chöngö inlēnngen yīö tö ò,ngaich teūngen tö nuk taṙòkhöre tinölô yiö,

¹⁹Lökten an ngam Mā Tēv yip tömaṙôngö, ngam Tēv Israel, nö ngö ṙô: Öt hĕng tak hanātökūö min tarik nö in yip kūön Yônatap öp kikōnyö kūön Rēkap samökhak nö i kūö chu.