Read Car_Nicobarese YERIMIĀ 36 Bible Online

YERIMIĀ 36 - Car_Nicobarese bible

YERIMIĀ 36

¹Im finënö samyeūheu Yēhōyakim ök kikōnyö kūön Yôsayā, rācha aṅ Yūtā, ngih ṙô nö yih nö in Yarimiā/Yeremiā nö ṙā-ang im Mā Tēv:

²Hēngö kahëḵ man tö tölirōlö chūök kinūichö ngaich kūich në ṙô i mat e në ṙô chu in meh öich la-alkūö Israel Yūtā inrē tö vē pumnāmö tarik nö ṙòkhöre löktökūö ök sakāmö ṙô chu tö meh, löktökūö nuk sakāmö Yôsayā söl ing töngamuh.

³Amahtuṙen ap min patī Yūtā nö hang nup tötlöök nup lōn chu tī chu in cha, hòṅ cha min nö kö havöötökūöre nö ṙā-ang tötlöök talöököre, hòṅ chu aṙēlö nup kanöölö cha tökööl cha inrē.

⁴Ngaich Yarimiā/Yeremiā nö havëten Pārök ök kikōnyö kūön Neruyā, ngaich ang Pārök nö kūich nö i mat ök tölirōlö chūök kinūichö asā ṙô Yarimia/Yeremiā tö nuk ṙô ngam Mā Tēv nuk ṙô ò nö in ò.

⁵Ngaich ang Yarimiā/Yeremiā nö kētö chöngö Pārök, nö ngö ṙô, Harahakūö chin öich chuh el patī ngam Mā Tēv;

⁶Lökten man höng me-eṅ kiröönngöre, ngaich hē el sakāmö inhīkö el nang yip tarik el patī ngam Mā Tēv öm vë-ekūö nup ṙô ngam Mā Tēv ṙā-ang i mat ngam tölirōlö chūök kinūichö nup kahūich meh asā ṙô chu. Vë-ekūö u min me-eṅ inrē elnang yip tarik aṅ Yūtā yip kumnyī-inyre nö ṙā-ang minë elpanam cha.

⁷Amahtuṙen ap min ṙô cha nö havë-a nö söl ikūö ngam Mā Tēv, ngaich kö havööngökūöre min cha-a nö ṙā-ang tötlöök talöököre, pòn kiröng ngam tanānyö lanīnö ngam Mā Tēv inrē töṙônyu nö lā-al vē tarik.

⁸Ngaich Pārök ök kikōnyö kūön Nērayā nö asā nuk chöngö ök pròfet Yarimiā/Yeremiā nö vë-ekūö aṅ mat ök tölirōlö chūök kinūichö nuk ṙô ngam Mā Tēv nö el patī ngam Mā Tēv.

⁹Im tinneūi samyeūheu Yēhōyakim ök kikīonyö kūön Yôsaya, rācha aṅ Yūtā, im minchūötöre chingëṅt, ṙòkhöre yik tarik i Yērusalem yik yamih nö ṙā-ang nup elpanam Yūtā nö i Yērusalem nö ahangkö inhīkö i kūö ngam Mā Tēv.

¹⁰Ngaich ang Pērök nö vë-ekūö nuk ṙô Yarimiā nö i mat ök tölirōlö chūök kinūichö, nö elnang yik tarik nö ṙòkhöre, nö el patī ngam Mā Tēv el urôhò Kēmariā ök kikōnyö kūön Sēfan ök hamòlṙen nö i kinūichö, el ök urôhò lātulöng el milūkö, ip lökhöt Tufömgöre Inkūp öp patī ngam Mā Tēv.

¹¹Hē Mikayā ök kikōnyö kūön Kēmariā, ök kikōnyö kūön Sāfan, nö hang në ṙô ngam Mā Tēv aṅmat ök tölirōlö chūök kinūichö,

¹²Chuh patī ök rācha ngaich anga-aṅ, nö el ök urôhò ök hamòlṙen kinūichö, ṙòkhöre yik kūön rācha nö ūichhak nö umuh; Ēlaisame ök hamòlṙen i kinūichö, Tilāyā ök kikōnyö kūön Semayā, Elnātan ök kikōnyö kūön Akpōr, Kēmaria, ök kikōnyö kūön Sāfan, Sētikāya ök kikōnyö kūön Hananiyā, ṙòkhöre inrē yik kūön rācha.

¹³Ngaich Mikayā nö vë-enynang cha tö nup ṙô ahang ò, hē Pārök nö vë-ekūö öp tölirōlö chūök kinūichö nö elnang yik tarik.

¹⁴Ngaich ṙòkhöre yik kūön rācha nö tīnngen Yāhūti ök kikōnyö kūön Nëtāniā, kikōnyö kūön Selemia, kikōnyö kūön Kūsī, nö ngö ṙô tö Pārök, Kē ngam tölirōlö chūök kinūichö nö eltī meh ngam tövë-evkūö tö meh elnang vē tarik, ngaich ta-a. Lökten Pārök ök kūön Nērayā nö kē ök tölirōlö chūök kinūichö nö eltīre ngaich yih nö in cha.

¹⁵Ngaich ngö ṙô cha-a tö ò, Ūichngöre man vë-ekūö e. Ngaich Pārök nö vë-ekūö e nö in cha.

¹⁶Hē cha nö hang nuk ṙô nö ṙòkhöre, kö havöötökūöre ngaich cha-a nö in höö nö pa-ekūö; ngö ṙô cha-a tö Pārök, Hòṅ vë-eny në ṙô in ip rācha.

¹⁷Ngaich cha-a nö hatönö Parök. Vë-enynang ih man, sitih inlahen öm kūich në ṙô? Höng asā ṙô ò öm kūich?

¹⁸Sapṙô cha ngaich Pārök, Ṙô-òv ap tö në ṙô nö in chu, i saha chu kūichö u aṅtī tö kasūmökūö kanūich i mat ngam tölirōlö chūök kinūichö.

¹⁹Ngaich ngö ṙô yip kūön rācha tö Pārök, Kuṙòh hayunngöre nan, me-eṅ, Yarimiā inrē, un hĕng tak tö-akahakūö tö chūök nā.

²⁰Kirööngöre cha-a ngaich nö chu elmilūkö nö ik rācha, tökinheūtenre nö chaphöt ök tölirōlö chūök kinūichö nö el urôhò Ēlaisamā ök hamòlṙen i kinūichö; ngaich vë-eny minë ṙô cha-a nö ik ṙācha.

²¹Ngaich ök rācha nö tīnngen Yēhūti nö kē ök tölirōlö chūök kinūichö, ngaich kē-ĕ anga-aṅ nö rā-ang el urôhò Ēlaisamā ök hamòlṙen i kinūichö; vë-ekūö e ngaich Yēhūti nö in ök rācha in yik kūön rācha inrē yik töng sökhaka nö in ök rācha.

²²Ngam minchūötötre an anga-aṅ chingëṅt, ūichhaka ök rācha nö el ök patī laneūchö ngaich hūkūö ök tameūyö umuh el tāng, i kūö ò.

²³Ngaich hē Yēhūti nö vë-ekūö e nö lūöi hēk fën mi-ëlö vahë-ekūö, ngaich ök rācha nö kötngö u nö aṅtī tö sakū ngaich sukhöt u nö i kūö tameūyö el ök tāng, hanöng saha ök tölirōlö chūök kinūichö nö keuheūtngöre nö ṙāpngö nö i kūö ök tameūyö ël ök tāng.

²⁴Hö-ö pöri nö rēhĕn ök rācha, öt rēhĕn yik tarik ò yik hamang në ṙô, nö pa-ekūö öt rēhĕn cha-a nö tikaichngö hilāre.

²⁵Pòrô hē Elnatān, Tilāya, Kēmariā inrē nö tumal tī ök rācha nö föngngö ök tölirōlö chūök kinūichö, öthòṅ hang ṙô cha anga-aṅ.

²⁶Ngaich ök rācha nö tölṙô Yērahmil ök kikōnyö kūön ök rācha, Sērāya inrē ök kikōnyö kūön Asri-ĕl, Selēmayā inrē ök kikōnyö kūön Aptīl nö kē-ĕ Pārök ök hamòlṙen i kinūichö tö Yarimiā/Yeremiā inrē ök pròfĕt hayūni pöri cha-a tö ngam Mā Tēv.

²⁷Ngaich unôichrit tī ngam ṙācha nö föngngö ök tölirōlö chūök kinūichö tö-aṅhavmat tö nuk ṙô Yarimiā/Yeremiā, yih ngaich nö in Yarimiā/Yeremiā ök ṙô ngam Mā Tēv:

²⁸Kē tahëng tölirōlö chūök kinūichö ngaich kūich mat e tö nup ṙô tö ngaich i mat öp mu-urĕh tölirōlö chūök kinūichö, ök töföngi tök rācha aṅ Yūtā ang Yēhōyakim.

²⁹Ngö ṙô me-eṅ inrē tö inlahen Yēhōyakim ök rācha aṅ Yūtā, Ngö ṙô an ngam Mā Tēv, Föngngö öp tölīrōlö chūök kinūichö man ngaich öm ngö ṙô, Kūöyòh öm kūich mat e tö öp rācha aṅ Pēpilön min nö yih nö piyāingö ngih panam, nö rökngen e inrē tö tarik töṙeūla inrē?

³⁰Lökten an ngam Mā Tēv nö ngö ṙô tö inlahen Yēhōyakim, öt hĕng tit tak aṅ in ap min tö amūichhaka nö el kantēra Tāvit, ngaich ap alaha ò min tökapah nö kavalnyu nö el töṙāich sakāmö el tö-ufōv inrē hatööm.

³¹Ngaich chū-ö min sācha tī tö ò töp kūön ò inrē tö yip tarik ò inrē tökūö öt lanöökö cha; Kētö kui cha chin min, kētö kui yip tarik Yūtā inrē, tö nup tötlöök nö ṙòkhöre ṙahônyö chu nö in cha, sōḵ pöri cha-a nö hang.

³²Ngaich ang Yarimiā/Yeremiā nö kē tahëng tölirōlö chūök kinūichö ngaich kēten e nö in Pārök ök kamūich, ök kikōnyö kūön Nērayā ök kamūich mat nö asā ṙô Yarimiā/Yeremiā tö nuk ṙô nö ṙòkhöre aṅ-mat ök tölirōlö chūök kinūichö ök tö föngö nö i kūö tameūyö tö Yēhōyakim ök rācha aṅ Yūtā; Pōyen nuk inrē tö ngatī ṙô töṙūötuṙen nö in u.