Read Car_Nicobarese YERIMIĀ 37 Bible Online

YERIMIĀ 37 - Car_Nicobarese bible

YERIMIĀ 37

¹Ngaich Sētikia ök kikōnyö kūön Yôsayā, ök tövīlöng nö rācha ngam panam Yūtā tö Nēpukatnēsar rācha aṅ Pēpilön, hayöngnö ṙēnngen Kôniah ök kikōnyö kūön Yēhōyakim.

²Ötrēhĕn pöri anga-aṅ, öt rēhĕn yik tarik ò, öt rēhĕn yik aṅ panam ò tarik, nö hang në ṙô ngam Mā Tēv në ṙô ò lamökten ik pròfĕt Yarimiā/Yeremiā.

³Ngaich ök rācha Sētikiā nö tīngen Yēhūkôl ök kikōnyö kūön Selemiā, Safaniā inrē ök kūönṙô, ök kikōnyö kūön Ma-asayā,nö löö ik pròfĕt Yarimiā Yeremiā, nö ngö ṙô, Vë-elkui ih im Mā Tēv ngam Tēv hī.

⁴Ṙòngmöng havötköre ang Yarimiā/Yeremiā nö in yik tarik, pò ò nö öl nö kalonghötvö nö el kinlōngö tarik.

⁵Yih ngaich yik kumyung aṅ in Fërō nö ṙā-ang Aikup; ngaich Yērusalem nö hāṅngö cha ṙā-ang re cha-a ngaich nö ṙā-ang Yērusalem.

⁶Ngaich yih ngam ṙô ngam Mā Tēv nö in öp pròfĕt Yarimiā/Yeremiā:

⁷Ngö ṙô an ngam Mā Tēv, ngam Tēv Israel: Ngö ṙô yin töp rācha aṅ Yūtā öp tamīnten yīö hatön in chu, Yĕh meuk, yih yip kumyung aṅ in Fërō nö holṙen yīö ngaich yip nö hòṅ havöökūöre nö chuh Aikup, in öp panam re.

⁸Ngaich havan min yip aṅ Kālti nö kiyung nö la-āl ngih elpanam; kē-ĕ e yip min föngngö e inrē nö i kūö tameūyö.

⁹Ngö ṙô an ngam Mā Tēv, Uh yin hachīlöre, öi ngö ṙô, Ṙāngenre yip min aṅ Kālti nö in hī, tön rö-ö yip min nö ṙāngenre.

¹⁰Pò yīö yē yīö öre mihôiṅ tī tö yip kumyung aṅ Kālti nö ṙòkhöre yip kumyung nö lā-al yīö, ngaich yip tö ōtren in cha nö kô-òren nö töng hanyahka, kö el rūkui re, choholre min cha-a nö föngtökūö ngih elpanam tö tameūyö.

¹¹Ngaich hē yik kumyung aṅ Kālti nö ṙā-ang re nö ṙā-ang Yērusalem tö yanīhih yik kumyung aṅ in Fërō,

¹²Kiröönngöre ngaich Yarimiā/Yeremiā nö ṙā-ang Yērusalem nö chuh panam Penyamin nö kēḵ ök minchööḵöre umuh in yik tarik.

¹³Ngaich hē ò nö ip Inkūp Penyamin, hĕng tak ök amahati Irīyā ök minë-eny ò ök kikōnyö kūön Selemia, ök kikōnyö kūön Hananiā, nö kēḵ ök pròfĕt Yarimiā/Yeremiā, nö ngö ṙô, Havāngtöre man in yip aṅ Kālti.

¹⁴Ngö ṙô ngaich Yarimiā/Yeremiā. Minyôingy-aṅ an angū-ö; hö-ö chin havāngtöre in yip aṅ Kālti. Öt hòṅ hangṙô ò pöri Iriyā, kē-ĕ Yarimiā ngaich, ngaich kēten ò nö in yik kūön rācha.

¹⁵Tainy ngaich yik kūön rācha nö in Yarimiā, fōhan cha-a ngaich ngaich kalonghötnen ò nö el patī Yônātan ök hamòlṙen i kinūichö, pò e nö vītu nö kinlōngö tarik.

¹⁶Ngaich hē Yarimiā nö el kinlōngö, ngaich ṙōl sumkam nö ngöh nö umuh,

¹⁷Tīnngö mahavëken ò ngaich ök rācha Sētikiā, ngaich hayihten ò nö in ò. Hatönan ngaich ök rācha nö ulāikôre nö el ök patī re, nö ngö ṙô, Ṙô-òv hòng tö aṅ in Mā Tēv? Ngaich ngö ṙô ang Yarimiā Hôṅ, ṙô-òv. Ngaich ngö ṙô anga-aṅ, Kētu man min eltī ap rācha aṅ Pēpilön.

¹⁸Ngö ṙô inrē Yarimiā tö Sētikiā ök rācha, Asuāp töchōich tī chu in meh hēk in yip mahalanṙen meh hēk in vē tarik, töp lökten meh chaphöt chu el kinlōngö tarik?

¹⁹Isuh yik pròfĕt meh yik vamë-eny ṙô nö in meh, nö ngö ṙô, Öthō ap min rācha aṅ Pēpīlön nö yih nö lā-al yīö lā-al ngih panam inrē?

²⁰Hangihtöre töngamuh, vë-ekūö meh chin, Ō mā rācha chu: hökngen ngam yāich ṙô chu nö yih nö i kūö meh, uh chin hēk tīniyö el ap patī Yônātan ap hamòlṙen i kinūichö hòṅ chu öt kapah umuh.

²¹Lökten ap rācha Sētikia nö kēten Yeremiā nö in yik amahati el milūkö; hēngö kinë-eṅkūö anga-aṅ tö tö-aföhlöng rôti nö kaheuk sakāmö nö ṙā-ang ik el talöökö vamī rôti, hanöng saha nuk rôti ngam elpanam nö keuheūt, Lökten Yeremiā nöng ngöh nö in yik amahāti el milūkö.