Read Car_Nicobarese YERIMIĀ 38 Bible Online

YERIMIĀ 38 - Car_Nicobarese bible

YERIMIĀ 38

¹Ngaich ang Sefātiā ök kikōnyö kūön Mātan, Kētalia ök kikōnyö kūön Pasūr, Yukôl ök kikōnyö kūön Sēlemiā, Pasūr inrē ök kikōnyö kūön Malkiā nö hang nuk ṙô Yarimiā nö in yik tarik nö ṙòkhöre.

²Ngö ṙô an ngam Mā Tēv, Anga-aṅ öp töhòṅ ngöh nö in ngih elpanam kapah min tökūö sanët, kūö inyāichö kūö invah inrē tö lëlngökūö, anga-aṅ pöri öp kumröönngöre nö in yip aṅ Kālti aṅ min; aṅhav-in min anga-aṅ tö nômöre nö raneushö kinyūngö, ngaich aṅ.

³Ngö ṙô an ngam Mā Tēv, Kô-en an min ngih elpanam nö kētu nö eltī yip kumyung aṅ in öp rācha aṅ Pēpilön ngaich kē-ĕ.

⁴Ngaich yip kūön rācha nö ngö ṙô töp rācha, Hökngen ngòh tarik nö kumpaha tön öt kumlēḵlö kël yip kumyung an tö-ōtre nö i ngih elpanam, kël yip tarik inrē, tökūö në ṙô ò tö ngatī nö in cha. Pò ngòh tarik nö öt chöh lanööken vē tarik, chanökö cha pöri.

⁵Ngö ṙô ngaich ök rācha Sētikiā, Yĕh meuk, eltī yīö an; pò ngam rācha nö öthō nö la-evṙen nö lā-al yīö.

⁶Lökten cha ngaich nö kē-ĕ Yeremiā ngaich sukten ò nö el ök chūök mak Malkiyā, ök kikōnyö kūök ök rācha, ök mi-i yik amāhati el milūkö, hôten Yarimiā nö aṅtī tö pisik. Hö-övö ök chūök mak nö aṅhaṅv tö mak, höng tilin pöri, ngaich Yarimiā nö chalipköti nö el tilin.

⁷Hē Ēpētmelek ök aṅ Itiōpiā, kumkantöre ök mi-i patī ök rācha, nö hāngö cha nö hayôkten Yarimiā nö el ök chūök mak ūichhakṙen ök rācha nö ik Inkūp Penyamin.

⁸Ṙā-ang i kūö patī ök rācha ngaich ang Ēpētmelek ngaich ngö ṙô tök rācha,

⁹Mā chu rācha, chōichö tī yin vē tarik tö ngam tī cha nö in Yarimiā ap pròfĕt nö sukten ò nö el chūökmak; kapah ap min nö umuh tökūö neūköre, pòn öt ōtre nyā-aṅkūö nö im elpanam.

¹⁰Ngaich ök rācha nö tölṙô Ēpētmelek, ök aṅ Itiōpiā, Kē tarik man lūöi tak ṙā-ang hih hol meh, ngaich tūöklen ap pròfĕt Yarimiā nö ṙā-ang ël ap chūök mak urēhĕkūö ò nö kapah.

¹¹Lökten Ēpĕtmelek nö kē tarik hol ò ngaich kiröönngöre nö chuh patī ök rācha, nö ël ök urôhò chūök saneū inyut el ök chūök chehen ök patī, ngaich in e nö kēḵ töng takācha hilā töng hötṙeh inrē, anū-ö ngaich töhôtu tö ò nö in Yarimiā nö ël ök chūök mak nö löktökūö nup pisik.

¹²Ngaich ngö ṙô-Ēpĕtmelek ök aṅ Itiōpiā tö Yarimiā,Elkël re tī man tö në töng takācha hilā nö nām ṙòng ngam pisik. Ngaich ngatī ang Yarimiā.

¹³Ngaich cha-a nö tūöklen Yarimiā nö ṙa-ang ël ök chūök mak nö aṅtī tö nuk pisik. Ngaich höngngöh Yarimiā nö el milūkö ök chūök amahāti.

¹⁴Ngaich ök rācha Sētikiā nö tīnngö mahavëtö ök pròfĕt Yarimiā ngaich höngkūö ò nö ik linūöyö lökhöt el ök töhet chūök ngam Mā Tēv. Ngö ṙô ngaich ök rācha tö Yarimiā, Hòṅ hēngö hatön chin in meh; um hēngö hayunngö in chu.

¹⁵Ngö ṙô ngaich Yarimiā tö Sētikiā, Yē chu vë-enynang meh öthō öm min kumpahangvah chu? Ngaich yē chu halēnö meh, ngaich rö-ö min me-eṅ hō hang ṙô chu.

¹⁶Ulāikenre ngaich ök rācha Sētikiā nö chūökuṙô nö in Yarimiā, Sā ngam Mā Tēv nö tö-aṅ, ngam vamī nômö hī, hö-ö chin hō min kumpahangvah meh hēk kētenmeh eltī vē tarik vē chamöh nômö meh.

¹⁷Ngaich ngö ṙô Yarimiā tö Sētikiā, ngö ṙô an ngam Mā Tēv, ngam Tēv yik tömaṙôngö, ngam Tēv Israel, Yē meh hökngenre kē-ĕ tö yip kūön rācha aṅ in öp rācha aṅ Pēpilön, ngaich ṙālöngö min ap nômö, öt föngi inrē min ngih elpanam nö i kuö tameūyö, ngaich me-eṅ min aṅ tö yip aṅ patī meh inrē.

¹⁸Yē meh pöri öt hökngenre kē-ĕ tö yip kūön rācha aṅ in ap rācha aṅ Pēpilön, ngaich min ngih elpanam nö kētu nö eltī yip aṅ Kāltī, ngaich cha-a min nö föngngö e nö i kūö tameūyö, ngaich me-eṅ min kô-òngvah tö tī cha.

¹⁹Ngaich ngö ṙô-ök rācha Sētikiā tö Yarimiā, Pa-ekūö chin tö yip Yahūti yip mahavāngtöre nö in yip aṅ Kālti, pòchu min kētu in cha ngaich cha-a min nö ötlēkôre tö chu.

²⁰Ngaich ngö ṙô Yarimiā, Öthō man kētu in cha. Hang ṙô ngam Mā Tēv man töngamuh i ṙô chu tö meh, ngaich lööken min angū-ö nö in meh, ngaich ṙālöngö min ngam nômö meh.

²¹Yē meh pöri sōḵ hökngenre kē-ĕ, ngih ön tömeūkö ngih tö hameuktu nö in chu tö ngam Mā Tēv:

²²Yĕh meuk, ṙòkhöre yip kikānö töṙā-ai nö el patī ngam rācha aṅ Yūtā nö hachōnyu nö i yip kūön rācha aṅ in ap rācha aṅ Pēpilön yip tö ngö ṙô. Hachīlö man tö yip hol meh chūök inyönglen meh, ngaich cha-a nö mihôiṅ tö meh; ngaich man yih töngmuh chalipköti röön el tilin, havööngö kūöre ngaich cha-a tö meh.

²³Ṙòkhöre yip pīhö meh yip kūön meh kikōnyö inrē min nö hachōḵnyu nö in yip aṅ Kālti, ngaich me-eṅ min inrē öthō öt kô-òngvah tö tī cha, kē-ĕ pöri min töp rācha aṅ Pīpilön; ngaich ngih elpanam nö föngi nö i kūö tameūyö.

²⁴Ngaich ngö ṙô Sētikiā tö Yarimiā, un hĕng tak pöchö tö akahalōn tö në ṙô hö-ö man min hōḵ kapah.

²⁵Yē yip kūön rācha nö hang tö chu vë-ekūö meh ngaich yih nö in meh nö ngö ṙô tö meh, Vë-eny nang ih tö ṙô meh ip rācha tö ṙô ap rācha inrē nö in meh; un töhayūniyö nö in ih, hö-ö in min hōḵ kumpahangvah meh,

²⁶Ngaich ngö ṙô min me-eṅ tö cha, Hayāichtöre chin ip rācha öich sōten ò nö tīnngen chu hēk i patī Yônatan öich kapah in e.

²⁷Ṙòkhöre ngaich yik kūön rācha nö yihtöre nö in Yarimia ngaich hatönan, ngaich sapṙô cha anga-aṅ nöng sā ṙô ök rācha nö hachōḵngö ṙô ò. Lökten cha nö ṙāngôre nö ve-ekūö ò, pò ök ṙô cha nö ve-ekūöre nö tö hāngö.

²⁸Ngaich höngngöh Yarimiā nö el milūkö ök chūök amahati hanöng saha ngam sakāmö Yērusalem nö ke-ĕ.