Read Car_Nicobarese YERIMIĀ 39 Bible Online

YERIMIĀ 39 - Car_Nicobarese bible

YERIMIĀ 39

¹Im minchūötöre samyeūheu Sētikia rācha aṅ Yūtā, im sinömö chingëṅt, ang Nēpukatnēsör rācha aṅ Pēpilön ṙòkhöre inrē yik kumyung aṅ in ò nö yih nö lā-al Yērusalem ngaich kayīngö e;

²Im kinhuk sīön samyeūheu Sētikiā, im finënö chingëṅt, im minchūötöre sakāmö ngam chingëṅt, mëngnyi kaha ngaich ngam elpanam.

³Hē Yērusalem nö ngaich nö kē-ĕ, ṙòkhöre yik kūön rācha aṅ in öp rācha aṅ Pēpilön nö yihtöre ngaich ūichngöre nö ellōn ök inkūp; Nërkôlsarēsar, Samkarnēpō, Sarēkim ök Rapsarīs, Nĕrkôlsarēsar ök Rapmök nö holtö yik yöngṙen kumyung aṅ in ök rācha aṅ Pēpilön.

⁴Hē Sētikiā ök rācha aṅ Yūtā tö yik kumyung inrē nö meūkö cha, falngöre cha-a ngaich, kunyī-inyre tö hatööm nö ṙā-ang ël ök elpanam nö löknyö ik talöökö öp panô-òṅ öp rācha löknyö ip inkūp ihôi nup tönët kinlōngö; ngaich kiröönngöre cha-a nö kū-ö tö Arapā.

⁵Ngaich pöri yik kumyung aṅ Kālti nö lū-u cha, ngaich kôlö nö in Sētikiā nö el nup töṙā-a-kūö panam Yērikō; ngaich hē cha nö kē an, kēten ò cha-a ngaich nö in Nēpukatnēsar rācha aṅ Pēpilön, i Ripla, ip panam Hamat; vënyö sācha ò ngaich.

⁶Ngaich ök rācha aṅ Pēpilön nö fëlngö yik kikōnyö kūön Sētikiā nö i Ripla nö hameukhömat ò; ngaich inrē ök rācha aṅ Pēpilön nö fëlngö yik mā aṅ Yūtā.

⁷Pīôknyö nuk mat Sētikiā anga-aṅ, nyëkan ngaich tö sayōk ngaich kēngen ò nö i Pēpilön.

⁸Föngtökūö ök patī ök rācha yik aṅ Kālti tö patī yik tarik inrē, tiṙölngö nuk kinlōngö Yērusalem inrē.

⁹Ngaich ang Nēpūsaratön, ök yöngkūö yik amahati, nö kēngö yik tarik chööḵṙen yik tö-ōtre nö im elpanam nö ahötiyö nö i Pēpilön, cha-a yik mahavāngtöre nö in ò, tö yik tarik inrē tö-ōtren.

¹⁰Ṙātu nö ik panam Yūtā yik yāich tarik tö Nēpusaratön, ök yöngkūö yik amahati, yik töt inlānuṙen, ngaich kē-ĕkūö cha inrē tö panò-òṅ vāin taṙeū inrē ik hē e.

¹¹Ngaich ang Nēpukatnēsar rācha aṅ Pēpilön nö kētö chöngö nö lökten in Nēpusaratön tö inlahen Yarimiā, ök yöngkūö yik amahāti, nö ngö ṙô,

¹²Kē an, ṙūötökūö meukken ò un chanöku inrē anga-aṅ, sā ṙô ò pöri yī-ö ngaich ngatī tī tö ò.

¹³Lökten ang Nēpusaratön ök yöngkūö yik amahati, Nēpusaspan ök Rapsarīs, Nĕkôlasar ök Rapmök, ṙòkhöre inrē yik mākūö kumyung aṅ ik rācha aṅ Pepilön

¹⁴Nö tīnngö kamë-eṅren Yeremiā nö ṙā-ang el milūkö chūök amahati. Kēten ò cha-a ngaich nö in Kētaliā ök kikōnyö kūön Ahīkam, ök kikōnyö kūön Sāfan nö hōten ò nö kē-eyö nö i patī ò. Lökten anga-aṅ nö ngatī tī nö in yik tarik.

¹⁵Yih ngam ṙô ngam Mā Tēv in nö Yarimiā hē ò nö öpikūö nö el milūkö chūök amahati:

¹⁶Kuṙòh, ngö ṙô tö Apĕtmelek öp aṅ Itiōpiā, Ngö ṙô An ngam Mā Tēv yip tömarôngö, ngam Tēv Israel: Yĕh meuk, hateungngö ngam ṙô re chin min lā-al ngih elpanam nö im tötlöök öt im tölöök, kūö yīö ip sakāmö angū-ö.

¹⁷Ṙānyen yīö pöri min chū-ö ip sakāmö angū-ö, ṙô ngam Mā Tēv, ngaich yī-ö min öt kētu eltī yip tarik yip pinhë-eṅ kūö yīö.

¹⁸Pò chu min hayööken yīö ngaich yī-ö min öt fuk kūö sanët; īnu pöri min yī-ö tö nômö re nö raneushö kinyūngö, pò yīö hayönglenre in chu, ṙô ngam Mā Tēv.