Read Car_Nicobarese YERIMIĀ 40 Bible Online

YERIMIĀ 40 - Car_Nicobarese bible

YERIMIĀ 40

¹Yih ngam ṙô nö in Yarimiā nö ṙā-ang im Mā Tēv unôichrit Nēpusaratön ök yöngkūö amahati nö kēngen ò nö ṙā-ang Ramā, hē ò nö kē an nö nyëkan tö sayōk nö hol yik töhakövö aṅ Yērusalem aṅ Yūtā inrē yik tö-ahötiyö nö i Pēpilön.

²Kē-ĕ Yarimiā ök yöngkūö amahati ngaich ngö ṙô tö ò, Vë-eny ngih tötlöök An ngam Mā Tēv ngam Tēv yīö nö lā-al ngih chūökö:

³Ngaich ngam Mā Tēv nö hateungtökūö e, ngaich inrē nö keuheūten nö asā ṙô re. Pò yīö köölö fālen lā-al ngam Mā Tēv, öt hang ṙô ò inrē; yih ngaich ngih nö i kui yīö.

⁴Yĕh meuk, luhlen meh chin töngamuh tö minë sayōk i kël meh Yē e nö tölöök tö lōn meh öm in chu, yih i Pēpilön, tā-a, ngaich chū-ö min ṙūötökūö meukṙen meh; yē e pöri nö tövaich tö lōn meh öm in chu, yih i Pēpilön, ngaich um yih. Yĕh meuk, keuhēutlöre ön ngih panam nö i kūö meh; kuṙòh kiröönngöre man ip töng chūök e nö löök tö lōn meh töhuveū inrē nö kū-ö meh.

⁵Yē meh höngngöh ngaich havan kuṙòh in Kētaliā ap kikōnyö kūön Ahīkam, öp kikōnyö kūön Sāfan, öp tövīlöngö tö ngam rācha aṅ Pēpīlön nö mahayöng në elpanam Yūtā, ngaich iyöng in ò in yip tarik; hēk kiröönngöre ip töng kū-ölōn meh töhuveū kū-ö meh. Lökten ök yöngkūö amhati nö kē-ĕkūö ò tö ṙāi nyā-aṅkūö raneushö inrē, ngaich hökngen ò nö kiröönngöre.

⁶Ngaich Yarimiā nö chuh in Kētaliā ök kikōnyö kūön Ahīkam, i Mispā, ngaich iyöng in ò in yik tarik yik tö ṙātu nö im panam.

⁷Hē yik yöngkūö yik kumyung el ngam töngāṅ panam tö yik tarik cha inrē nö hang ök rācha aṅ Pēpilön nö vīlen Kētaliā ök kikōnyö kūön Ahīkam nö mahayöng nö im panam, ngaich kē-ĕkūö ò tö kikōnyö tarik, kikānö, nyīö inrē yik yāich kūö aṅ ngam panam yik töt kē-ĕyö nö ahöti nö i Pēpilön,

⁸Chuh in Kētalia cha-a nö i Mispā Ismael ök kikōnyö kūön Nētaniyah, Yôhanan ök kikōnyö kūön Karī-ah Sēreyā ök kikōnyö kūö Tanhumat yik kikōnyö kūön Ēfāi aṅ Nētöfat, Yāsaniā ök kikōnyö kūön Mā-akatait, cha-a tö yik tarik cha kikōnyö.

⁹Ngaich ang Kētalia ök kikōnyö kūön Ahīkam, kikōnyo kūön Sāfan, nö chūöku ṙô nö in cha tö yik tarik cha inrē, nö ngö ṙô Uh yin pa-ekūö lök la-en yip aṅ Kālti. Iyöng im panam, lök la-en ap rācha aṅ Pēpilön, ngaich min angū-ö nö löök nö in yīö.

¹⁰Ane pöri chū-ö iyöng i Mispā öich tösökhak ṙënngen yīö i kūö yip aṅ Kālti yip yamih min nö in hī; yī-ö pöri hamūl ṙòng vāin yin, nup ṙòng sikehngö inrē tö tavī-i, hachūökngö u nö el chūökṙen yīö, iyöng el minë elpanam re yī-ö inrē minë kahë yīö.

¹¹Ngati inrē hē yik Yahūti yik mi-i Mô-ap tö yik in yik aṅ Amön aṅ Itöm inrē tö yik aṅ nuk tahëng panam nö hang ök rācha aṅ Pēpilön nö ṙātö chööḵṙen nö i Yūtā ngaich vīlen Kētalia ök kikōnyö kūön Sāfan, nö mahayöngö cha,

¹²Ngaich ṙòkhöre yik Yahūti nö havantöre nö ṙā-ang i nuk chūökö chūök cha sin nö ahōṙiyö ngaich yih nö i panam Yūtā, nö in Kētalia i Mispā; ngaich cha-a nö hamūl ṙòng vāin nuk ṙòng sikehngö inrē nö pōyen.

¹³Yih ngaich nö in Kētalia i Mispā ang Yôhanan ök kikōnyö kūön Kariā ṙòkhöre inrē yik yöngṙen kumyung el ngam töngāṅ panam.

¹⁴Ngaich ngö ṙô tö ò, Akahalōn ömeh tö Pĕ-alis öp rācha aṅ Amön nö tīnten Isma-el öp kikōnyö kūön Nētaniah nö kē ngam nômö meh? Ngaich pöri Kētalia ök kikōnyö kūön Ahīkam nö öt ṙātö ellōnre nö in cha.

¹⁵Ngaich ang Yôhanan ök kikōnyö kūön Karīā nö ulāikôre nö in Kētalia i Mispā, ṙò?

¹⁶Ngaich pöri Kētalia ök kikōnyö kūön Ahīkam nö ngö ṙô tö Yôhanan ök kikōnyö kūön Kāriā, Uh man ngatī la-en tö ngih, tön höng minyôiny-aṅ ṙô man tö inlahen Isma-el.