Read Car_Nicobarese YERIMIĀ 41 Bible Online

YERIMIĀ 41 - Car_Nicobarese bible

YERIMIĀ 41

¹Im sinātö chingëṅt, ang Ismael ök kikōnyö kūön Netania, ök kikōnyö kūön Ĕlāsama aṅ i mak alaha rācha, töhĕng tak aṅ in yik mākūö yöngṙen kumyung aṅ ik rācha, söm tak hol tö tarik nö yik nö in Kētalia ök kikōnyö kūön Ahīkam, nö i Mispā. Hē cha nö holkūöre nö nyā nö umuh i Mispā,

²Choholre ngaich Isma-el ök kikōnyö kūön Nētaniyah tö yik tarik tösöm tak hol ò nö fëlngen Kētaliā ök kikōnyö kūön Ahīkam, ök kikōnyö kūön Sāfan, nö aṅti tö sanët, ngaich kapahatī tö ò, ök vahīlö ök rācha aṅ Pēpilön nö mahayöng nö im panam.

³Fëlngö yik Yahūti inrē ang Isma-el yik mi-in Kētalia i Mispā, tö yik kumyung inrē aṅ Kalti yik mu-umuh hē e.

⁴Ik sakāmö unôichrit finëlö Kētalia urēhĕkūö tö-öl nö hĕng tak tö-akahalōn tö e,

⁵Hëvhöre anāi yik tarik yamih nö rā-ang Sīkem, Sailō, Samariā inrē, tökuhāki sanôi samā töng takācha inyut inrē, luvā-akakūö nuk vah alaha cha, kum tö sāiny tökētu tötahūsa inrē tökētu nö el ngam chūök ngam Mā Tēv.

⁶Ngaich ang Isma-el ök kikōnyö kūön Nētania nö yih nö ṙā-ang Mispā nö höngkūö cha, höng paneuinyngöre nö yih. Hē ò nö meukkūö cha, ngö ṙô anga-aṅ tö cha, Tā-a yih yin in Kētalia öp kikōnyö kūö Ahīkam.

⁷Ngaich hē cha nö yih nö elpanam, ngaich ang Isma-el ök kikōnyö kūön Nētania tö yik tarik inrē hol ò nö fëlngen cha, ngaich sukten cha nö el chūök mak.

⁸Söm tak pöri yik umuh tarik in cha yik tö ngö ṙô tö Isma-el, Uh in īhö fëli, tön hachūökngö vīt in parli, tavī-i, höni inrē nö hayūni nö el kahôyö. Ṙā-angre ngaich anga-aṅ ngaich öt fëlö cha tö yik hol cha inrē.

⁹Tökiröng ök chūök mak chūök tī Isma-el nö suktö nuk alaha yik tarik yik töfëli tö ò vahī ök rācha ang Asā nö lanakngökūö rācha aṅ Israel ang Pa-asā; hatööḵlöng angū-ö tö yik töfëli tö Isma-el ök kikōnyö kūön Nētaniā.

¹⁰Ngaich ang Isama-el nö kē yik tarik aṅ Mispā nö töhakövö, yik kūön rācha kikānö ṙòkhöre yik tarik inrē tö-ōtre nö i Mispā yik kahëtö Nēpusaratön, ök yöngkūö amahati nö in Kētalia ök kikōnyö kūön Ahīkam. Kē-ĕ cha ngaich ang Isma-el ök kikōnyö kūön Nētania nö hakövö kiröönngöre ngaich nö havāngngöre nö in yik aṅ Amön.

¹¹Hē Yôhanan pöri ök kikōnyö kūön Kariā tö yik yöngṙen kumyung in ò nö hang ök kūön ò Nētaniah.

¹²Ngaich cha-a nö ngôḵ yik tarik re nö ṙòkhöre ngaich kiröönngöre nö kiyung nö lā-al Isma-el ök kikōnyö kūön Nētania, Kôḵlö cha-a nö in ò ip tökiröng mak törūḵngö öp i Kīpīön.

¹³Ngaich hē yik tarik hol Isma-el nö meūkö Yôhanan ök kīkōnyö kūön Kariā tö yik hol ò inrē yöngṙen kumyung, ṙāmölōn cha-a ngaich.

¹⁴Lökten yik tarik yik töhakövö kahëḵ Isma-el nö ṙā-ang Mispā nö havanritre nö hēk, ngaich kiröönngöre nö in Yôhanan ök kikōnyö kūön Kariā.

¹⁵Ngaich pöri Isma-el ök kikōnyö kūön Nētaniā nö öt kô-òngvah tö tī Yôhanan nö holtö yik töhëvhör taka tarik, ngaich chuh in yik aṅ Amön.

¹⁶Ngaich Yôhanan ök kikōnyö kūön Kariā tö yik yöngkūö kumyung in ò nö kē yik tarik tö-ōtre yik kahëḵngö Isma-el ök kikōnyö kūön Nētania nö hakövö nö ṙā-ang Mispā unôichrit tī ò nö fëlngen Kētalia ök kikōnyö kūön Ahīkam-kumyung, kikānö, nyīö, kumkantöre,yik kum Yôhanan nö havan nö ṙā-ang Kīpīön.

¹⁷Ngaich cha-a nö kiröönngöre ngaich iyöng Kērut Chinhem röhta nö i Petlihem, nö hòṅ chuh Aikup.

¹⁸Kūö yik aṅ Kālti; pò cha nö pa-ekūö tö cha pò Isma-el ök kikōnyö kūön Nētania nö fëlngen Kētalia ök kikōnyö kūön Ahīkam, ök tövīlöngö kūön Ahīkam, ök tövīlöngö tök rācha aṅ Pēpilön nö mahayöng ngam panam.