Read Car_Nicobarese YERIMIĀ 42 Bible Online

YERIMIĀ 42 - Car_Nicobarese bible

YERIMIĀ 42

¹Ngaich ṙòkhöre yik yöngṙenkumyung, tö Yôhanan, inrē ök kikōnyö kūön Kariā Asariā inrē ök kikōnyö kūön Hōsayā, ṙòkhöre yik tarik inrē löktökūö tökūönö söl i tökiröng, nö haröhtöre nö yih.

²Ngaich ngö ṙô tö Yarimiā ök pròfĕt, Hökngen ngih ṙô ih ve-ekūö meh nö yih nö i kūö meh, vë-elkui ih man im Mā Tēv ngam Tēv meh, vē chööḵṙen ihih (tön ṙā-ayö in höng haroh tumtit tak öi aṅ i töpōyen, sā mat meh meūkö ih),

³Hòṅ ngam Mā Tēv ngam Tēv meh nö hameuktö talöökö ih öi kiröönngöre, nup la-en inrē hinôten ih.

⁴Ngaich ngö ṙô ök pròfĕt Yarimiā tö cha, Hangṙô yīö chin ngaich; yĕh meuk, vë-ekūö ngam Mā Tēv chin min ngam Tēv yīö sā lōn yīö, vë-eny-nang yīö chin min inrē tö nup sanapṙô yīö aṅ im Mā Tēv; hö-ö chin hōḵ min ma-iṅkuṙen tö töt vënyu nö in yīö.

⁵Ngaich ngö ṙô cha-a tö Yarimiā, Tökô-en an Yĕh ngam Mā Tēv mameuk inrē nö tököpö ṙô nö lā-al ih yē ih öt la-evṙen asā nuk ṙô nuk tinīn tö meh tö ngam Mā Tēv ngam Tēv meh öm in ih.

⁶Yĕn pòrô angū-ö nö tölöök hēk tötlöök, hang ṙô meh min īhö im Mā Tēv ngam Tēv hī ngam tösöömhukūö tö ih tö meh, hòṅ e nö lööken nö in ih yē ih hang ṙô ngam Mā Tēv ngam Tēv hī.

⁷Unôchrit tösöm sumkam ngam ṙô ngam Mā Tēv nö yih nö in Yarimiā.

⁸Ngaich havëten Yôhanan anga-aṅ ök kikōnyö kūön Kariā tö yik yöngṙen kumyung inrē yik mī-in ò, ṙòkhöre inrē yik tarik löktökūö tökūöṅnö söl i tökiröng,

⁹Ngaich ngö ṙô tö cha, Ngö ṙô an ngam Mā Tēv, ngam Tēv Israel, ngam chūök tinīnngö chu tö yīö öich kēngö nuk ṙô yīö i kūö ò öi vë-ekūö ò:

¹⁰Yē yīö min höngngöh ing panam, ngaich chū-ö min mānlen yīö hö-ö inrē öich tiṙölngen yīö; teūichten yīö chin min, rö-ö öich teuklen yīö; pò chu ṙālö tötlöök nuk tī chu in yīö.

¹¹Uh yin pa-ekūö töp rācha aṅ Pēpīlön, ap pinhë-eṅkūö yīö; uh yin pa-ekūö tö ò, ṙô ngam Mā Tēv, tön holtöṙah yīö chin, hayööken yīö ṙānyen yīö inrē ṙā-ang eltī ò.

¹²Kētö miṙēlōn chin min in yīö, hòṅ ò nö aṙē-ĕlōn tö yīö hökngen yīö inrē höngngöh im panam yīö.

¹³Yē yīö pöri min ngö ṙô, Hö-ö in hòṅ höngngöh ing panam, öi ahôngö ṙô ngam Mā Tēv ngam Tēv yīö

¹⁴öi ngö ṙô, Hö-ö hòṅ chuh ip panam Aikup in, i chūök ih min öt meuk kinyūngö, hēk öt hang ṙô römpĕt hēk öt kapahare tö nya-aṅkūö, umuh,

¹⁵Yĕh hang ṙô ngam Mā Tēv, Ō yī-ö chöökṙen aṅ Yūtā. Ngö ṙô an ngam Mā Tēv yip tömaṙôngö ngam Tēv Israel: Yē yīö haköpkūöre öi chuh Aikup öi iyöng in e,

¹⁶Ngaich ngam sanët min ngam pinhë-eṅkūö yīö nö kô-òl nö in yīö umuh ip panam Aikup; ap inyāichö inrē pinhë-enkūö yiö nö röhlö nö lā-unôich yīö nö chuh Aikup; ngaich in e min yī-ö kapah.

¹⁷Ṙòkhöre yip tarik yip mahaköpkūöre nö chuh Aikup nö hòṅ iyöng umuh, kapah min tökūö sanët, kūö inyāichö, kūö invah tölëlngökūö inrē; öt chööḵövö min cha-a hēk öt tö-aṅhav nö ṙā-ang im tötlöök ngam tī chu i kui cha.

¹⁸Pòn ngö ṙô ngam Mā Tēv yip tömaṙôngö, ngam Tēv Israel: Sā ngam tanānyö chu lanīnö chu inrē nö hōngnyu nö i kui yip aṅ Yērusalem, ngatī ngam lanīnö chu min nö hōngnyu nö i kui yīö yē yīö chuh Aikup. Ngaich yī-ö min tösō-ovö, pinhë-eṅkūö, ranôichngen minṙēngö inrē. Hö-ö yin min meuk ngih chūökkö hēk.

¹⁹Ngö ṙô an ngam Mā Tēv tö yīö, Ō yī-ö chööḵṙen aṅ Yūtā, uh yin chuh Aikup. Akahalōn takô yin tö chu ngaich mu-urĕhnyôre vëken yīö i ngih sakāmö.

²⁰Tö yīö ngaich lō-ongkūö öi pô-òvkūö tö nômö re. Pò yīö tīnngen chu im Mā Tēv ngam Mā Tēv yīö, öi ngö ṙô, Vë-elkui ih im Mā Tēv ngam Tēv hī, nup töng ṙô ngam Mā Tēv ngam Tēv hī nö in ih angū-ö min la-en ih.

²¹Ngaich chū-ö töngamuh ing sakāmö vë-eny nang yīö tö e, hö-ö pöri yī-ö hang ṙô ngam Mā Tēv ngam Tēv yīö i nup tinīnngö chu vë-enynang yīö.

²²Lökten yĕh akahalōn takô yin tö yīö min kapah tökūö sanët, kūö inyāichö, kūö invah tölëlngökūö inrē ip chūökö lōn yīö kiröönngöre öi iyöng.