Read Car_Nicobarese YERIMIĀ 43 Bible Online

YERIMIĀ 43 - Car_Nicobarese bible

YERIMIĀ 43

¹Hē Yarimiā nö keuheūtöṙô nö vë-ekūö yik tarik tö nuk ṙô ngam Mā Tēv ngam Tēv cha, nuk tinīntö ò nö in cha tö ngam Mā Tēv cha,

²Ngaich ang Asaria ök kikōnyö kūön Hōsayā Yôhanan inrē ök kikōnyö kūön Kariā tö yik tarik tö chökhuṙô nö ngö ṙô tö Yarimiā, Minyôiny-aṅ ṙô man. Öt tīnten meh an in ih ngam Mā Tēv ngam Tēv ih nö ngö ṙô, Uh yin chuh Aikup öi iyöng in e;

³Ngaich pöri Pārök öp kikōnyö kūön Nāraya nö vīten meh lā-al ih, nö hòṅ kēten ih eltī yip aṅ Kālti, pòn hōtu cha-a nö fëlngen ih hēk kē-ĕ ih öi ahöti i Pēpilön.

⁴Lökten Yôhanan ök kikōnyö kūön Kariā ṙòkhöre inrē yik yöngṙen kumyung tö yik tarik nö öt hang ṙô ngam Mā Tēv, nö höngngöh nö im panam Yūtā.

⁵Ngaich pöri Yôhanan ök kikōnyö kūön Kariā ṙòkhöre inrē yik yöngṙen kumyung nö kē yik chööḵṙen i Yūtā yik mahavan nö im panam Yūtā nö ṙā-ang i nup pumnāmö tarik chūök cha nö ahōṙiyö-

⁶Kikōnyö, kikānö, nyīö, kikānö kūön rācha, ṙòkhöre yik tarik yik töṙātu nö in Kētalia ök kikönyö kūön Ahīkam, ök kikōnyö kūön Sāfan tö Nēpusaratön ök yöngkūö yik amahati; Yarimiā inrē ök pròfĕt Pārök inrē ök kikōnyö kūön Nēraya.

⁷Yih cha-a ngaich nö im panam Aikup, pò cha nö öt hang ṙô ngam Mā Tēv. Tachtökūö cha-a ngaich nö i Tāhpanhes.

⁸Ngaich yih ngam ṙô ngam Mā Tēv nö in Yarimiā nö i Tahpanhes:

⁹Kē tökiröng man ihong eltī re, ngaich hayunngö u el chūök sanôngö el ngam töhamënö kui taseū talöökö ap lökhöt ip patī Fërō i Tāhpanhes, i kūö tarik aṅ Yūtā,

¹⁰Ngaich ngö ṙô tö cha, Ngö ṙô An ngam Mā Tēv yip tömaṙôngö, ngam Tēv Israel: Yĕh meuk, tīnngö kamë-erkūö Nepukatnēsar chin min ap rācha aṅ Pēpilön, ap tarik chu, ngaich anga-aṅ min nö ṙātö öp kantērare nö i kui në ihong në hayunngö chu, ngaich inrē min anga-aṅ nö hanyāknyö öp rūkui rācha nö i kui u.

¹¹Yih öp min nö fël ngih panam Aikup, kētö invah tölëlngökūö in cha yip pôḵ tölëlngökūö invah, i inkövö cha-a yip pôḵ inkövö, i kūö sanët cha-a yip pôḵ sanët inrē.

¹²Tōttökūö tameūyö ap min nö el patī nup tēv aṅ Aikup; ngaich föngngen cha min anga-aṅ halaingen cha inrē nö marôvat nö hakövö; ngaich ahetlö ngam panam Aikup, sā öp yōm pököre nö ahetlö öp tökiröng inyutre tö töng yô-òv i mat e; ngaich ṙā-ang umuh min anga-aṅ nö kiröönngöre im kumchikṙen.

¹³Likölngö nup ihong tövīlöng nö sökhak min anga-aṅ i Helīöpolis öp i panam Aikup; föngtökūö nup patī tēv aṅ Aikup min anga-aṅ inrē.