Read Car_Nicobarese YERIMIĀ 44 Bible Online

YERIMIĀ 44 - Car_Nicobarese bible

YERIMIĀ 44

¹Yih ngam ṙô nö in Yarimiā inlahen yik Yahūti yik mi-iyöng im panam aikup, i Miktòl, i Tahpanhes, ip Memfis, panam inrē Patròs,

²Ngö ṙô an ngam Mā Tēv yip tömaṙôngö, ngam Tēv Israel: Meuk ngam tötlöök yin ngaich ngam kahëtö chu i kui Yērusalem i kui nup elpanam Yūtā inrē. Yĕh meuk, inhatngö u ön ngih sakāmö töngamuh, ngaich öt hĕng tak min mī-iyöng i kūö u,

³Kūö nup ötlanöökö kahëken cha, harunnyö tanānyö chu, nö pò cha nö kiröönngöre nö föng tötahūsa lök la-en tahëng tēv inrē nup töt mikahkūö cha, öt rēhĕn cha-a, öt rēhĕn yī-ö öt rēhĕn yik yöng yīö.

⁴Sön chū-ö höng iṙūöhen tīntö yip tarik re pròfĕt in yīö, nö ngö ṙô, Mah, uh yin la-evṙen tö ngih sin-òkkūö ngam surīkhö chu!

⁵Hö-ö pöri cha-a nö hangihtöre hēk öt asītö elnang re nö havööngökūöre nö ṙā-ang im öt lanöökö cha ngaich föng tötahūsa nö i tahëng tēv.

⁶Lökten ngam, Lanīnö chu tanānyö chu inrē nö hōngnyu ngaich hūlökūö nö i nup elpanam Yūtā el kanröönö Yērusalem inrē; ngaich anū-ö nö vīngöre nö öt aṅhavkūö, sā re töngamuh.

⁷Ngö ṙô an yih ngam Mā Tēv yip tömaṙôngö töngamuh, ngam Tēv Israel: Kūöyòh öi kēken ngih yöng tötlöök öi höng lā-alre, öi rökngen tarik kikōnyö, kikānö inrē nö ṙā-ang in yīö, tënö, nyīö inrē, nö ṙā-ang ellōn Yūtā, öi öt ṙāhāngu tö chööḵṙen?

⁸Kūöyòh öi harunnyö tanānyö chu i nup la-en minë kuntī yīö, föng tötahūsa i tahëng tēv im panam Aikup ngam chūök yīö yih iyöng öi hōten re rökiṙen ngaich vītöre rinôichngen nāichngen inrē in vē pumnāmö tarik ngih tumlat?

⁹Ngaich öi vaichngö tö ötlanöökö yik yöng yīö tö ötlanöökö yik rācha aṅ Yūtā, tö ötlanöökö yik pīhö cha, tö ötlanöökö yīö, tö ötlanöökö yip pīhö yīö inrē nup kahëken cha nö ip panam Yūtā el kanröönö Yērusalem inrē?

¹⁰Öt hayāichngöre cha-a nö pòrô töngamuh, ötrēhĕn nö lök i chöngö chu, lök i nup ṙahātö chu i kūö yīö i kūö yik yöng yīö inrē.

¹¹Lökten an ngam Mā Tēv yip tömaṙôngö nö ngö ṙô, ngam Tēv Israel: Yĕh meuk, haköp kūöre chin im tötlöök lā-al meh, öich keuheūtngöre tī rökngen Yūtā.

¹²Kē yip chööḵṙen chin min aṅ Yūtā yip mahaköp kūöre nö yih nö im panam Aikup nö iyöng, ngaich cha-a min nö keuheūtngöre vah; im panam Aikup yip min nö fukngo; tökuö sanët kūö inyāichö min inrē cha-a nö keuheūtngöre vah; löktökūö tökūöṅnö söl i tökiröng, kapah yip min tökūö sanët kūö inyāichö inrē; ngaich cha-a min nö tösō-ovö, pinhe-eṅkūö, rinôichngen, minṙēngö inrē.

¹³Sācha tī chin min tö cha yip mī-iyöng panam Aikup, sā chu sācha tī tö Yerūsalem, aṅtī tö sanët, inyāichö, tölëlngökūö invah inrē,

¹⁴Hòn öt hĕng tak chööḵṙen aṅ Yūtā yip yamih nö iyöng im panam Aikup min tötkô-òngvah hēk tö aṅ hēk mahavantöre nö i panam Yūtā, ngam kū-ölōn cha nöhavan nö iyöng umuh; pò cha min nö öt havan, höng yip rīkre ma-apākö chūökre.

¹⁵Ngaich ṙòkhöre yik tarik tö-akahalōn tö yik pīhö cha nö kētö tötahūsa nö i tahëng tēv, ṙòkhöre inrē yip kikānö samökahaka nö umuh nö maṙôngö, ṙòkhöre yik tarik mī-iyöng Patròs ip panam Aikup nö sapṙô Yarimiā:

¹⁶Sā ngam ṙô ngam ṙô meh in ih i minë-eny ngam Mā Tēv, hö-ö in hòṅ hangṙô meh,

¹⁷La-evṙen pöri min tö nup chūökṙô ih kilēḵngôre, föng tötahūsa i kūö ngam ranī ngam halīöngö ṙösnyö fanòh alaha ò inrē, sā ih ngaich īhö ṙung tö yik yöng ih, rācha ih, kūön rācha ih inrē, i nup elpanam Yūtā el kanröönö Yērusalem inrē; pò ih hē e pōyen nyā-aṅkūö, kôlò inrē, öt meuk tötlöök inrē.

¹⁸Hēngen ih pöri ṙāngenre föng tötahūsa im ranī ngam halīöngö ṙösnyö fanòh alaha ò inrē, hāṅten īhö ngaich tö tökeuheūttöre ngaich inrē keuheūtngörevah tökūö sanët inyāichö inrē.

¹⁹Ngaich ngö ṙô yik kikānö, Yē ih föng tötahūsa im ranī ngam halīöngö asënyö incham alaha ò inrē, öt chöngö yip pīhöre öyih öi vī pīkoh tö-aṅ-hav alaha tö insā ò ngaich asënyö incham alaha ò?

²⁰Ngaich ngö ṙô Yarimiā tö yik tarik nö ṙòkhöre, kikōnyö kikānö inrē yik samap ṙô ò tö ngih:

²¹Nup tötahūsa töföngö tö yīö i nup elpanam Yūtā el kanröönö Yērusalem inrē yī-ö tö yik yöng yīö yik rācha yīö yik kūön rācha inrē, yip tarik aṅ ngam panam inrē, röh Ang ngam Mā Tēv nö köpölōn tö e? Röh ök yih nö el kuilōn ò?

²²Ötkô an ngam Mā Tēv nö ngöhöre nö keun tötlöök la-en yīö sin-òkkūö inrē nuk kahëken yīö; lökten ap panam yīö nö vītöre nöng ötaṅhavkūö nöng payāya ranôichngen inrē, öt iyöngö tö tarik, sā e töngamuh.

²³Kūö yīö an föng tötahūsa, kūö yīö inrē köölö fālen im Mā Tēv öt hang ṙô ngam Mā Tēv inrē hēk lök eltalöökö chöngö ò hachöngten ò inrē i nup kinlēkngô ò inrē, angū-ö lökten ön ngih tötlöök nö fuk kui yīö, sā e töngamuh.

²⁴Ngö ṙô Yarimiā tö yik tarik nö ṙòkhöre yik kikānö inrē, Hang, ṙô ngam Mā Tēv, ṙòkhöre yī-ö aṅ Yūtā yamih im panam Aikup,

²⁵Ngö ṙô an ngam Mā yip tömaṙôngö, ngam Tēv Israel: Ngaich yin yī-ö tö pīhöre öi löknyö elvāng re ṙô, hateungngö e inrē nö eltī yīö, öi ngö ṙô, hateungngö nup chūökṙô re in kilēḵngôre nup ṙô ih ngaich, öi föng tötahūsa im ranī ngam halīöngö asënyö incham alaha ò inrē. Ngaich yin haköp nup töchūöku kinlēḵngô yīö kēkö kaha nup töchūöku kinlēḵngô yīö inrē!

²⁶Lökten hang ngih ṙô ngam Mā Tēv, ṙòkhöre yī-ö aṅ Yūtā mī-iyöng im panam Aikup: Yĕh meuk chūöku ṙô chin im tökiröng minë-eny chu, ṙô ngam Mā Tēv tö ngam minë-eny chu min nö, öt ngöhören nö hachohka tö elvāng töng sitih tarik aṅ Yūtā nö im panam Aikup, nö ngö ṙô, Sā ngam Mā Tēv nö tö-aṅ.

²⁷Yĕh meuk, ngëichtökui cha chin im tötlöök öt im tölöök; ṙòkhöre yip tarik aṅ Yūtā mī-im panam Aikup min nö keuheūtngöre vah tökūö sanët kūö inyāichö inrē, hanöng saha cha nö hatngö.

²⁸Ngaich cha-a yip tötkô-òngvah tökūö sanët min nö havan nö ṙā-ang im panam Aikup nö chu im panam Yūtā, nöng öt ṙōl tak; ṙòkhöre inrē yip chööḵṙen Yūtā yip yamih nö im panam Aikup nö iyöng, min nö akhalōn töp ṙô min tököp, ṙô chu hēk ṙô cha.

²⁹Ngih ön min minkahngö nö in yīö, ṙô ngam Mā Tēv, tö chu min sācha tī tö yīö i ngih chūökö, hòṅ yīö akhalōn tönë ṙô chu min nö kô-en nö köp lā-al yīö i tötlöök:

³⁰Ngö ṙô an ngam Mā Tēv, Yĕh meuk, kēten Fërō Hôfrā chin min öp rācha Aikup nö eltī yip lā-al ò ane inrē eltī cha yip chamöh nômö ò, sā chu kēten Sētikia ök rācha aṅ Yūtā nö elti Nēpukatnēsör öp rācha aṅ Pēpilön, ök tökunyaha elmat tö ò chamöh nômö ò inrē.