Read Car_Nicobarese YERIMIĀ 46 Bible Online

YERIMIĀ 46 - Car_Nicobarese bible

YERIMIĀ 46

¹Yih ngam ṙô ngam Mā Tēv, nö in Yarimiā ök pròfĕt tö inlahen pumnāmö tarik.

²Inlahen Aikup. Inlahen yik kumyung aṅ in Fërō Nēkō, rācha aṅ Aikup, yik mī-i kui ap tahël Yūfrātīs i Karkēmis yik tötkô tö tī Nēpukatnēsör rācha aṅ Pēpilön ik finënö samyeūheu Yehōyakim ök kikōnyö kūön Yôsayā, rācha aṅ Yūtā:

³Halēn inmöp lanaklö inrē, kū-ötö lākūö im kinyūngö!

⁴Hīötlö kūö minë kōra; yôklö, Ō yī-ö tarik aṅ uk kōra! Kē ngam chūök re öi sapīöv tö vët mingāinyö minë vöi yīö, hayutlöre tö vët inyut re.

⁵Kūöyòh öichvö meūkö e? Ngangngökūö yin nö ngaich, havanritre inrē nö ngaich. Ötkô yik kumyung in cha, kurāten ngaich nö falngöre; öt tēk ukre yik āṅngöre lā-a pinhë-eṅkūö! ṙô ngam Mā Tēv.

⁶Ötkô yik töveut nö falngöre ötrĕhēn kumyung nö kô nö ötkô-òngvah; lā kapā i kui ap tahël Yūfratīs cha-a nö kavē-ĕre ngaich fukngö.

⁷Achīö ang ngòh, tösā Naīl nö chōholre, sā nup tahël töpavlöre aṅ tö mak?

⁸Sā Naīl Aikup nö chōholre, sā nup tahël töpavlöre aṅ tö mak. Ngö ṙô an, Hòṅ chōholre chin hòṅ kahultö kui ngam tumlat chin, hòṅ haṙöingö elpanam chin tö yip aṅkūö u inrē.

⁹Kū-ötö lākūö,Ō yī-ö kōra, tainy inrē, Ō yī-ö inröl! Hökngen yip kumyung nö kiröönngöre: tarik aṅ Itiōpia Put inrē yip ṙamapkö lanaklö, tarik aṅ Lut, töhuveū nö i linreny.

¹⁰Sakāmö ngam Mā Tēv yip tömaṙôngö an angū-ö, sakāmö invahalvah, invahalvah ò nö in yip lā-al ò. Keuheūt an min ngam sanët ngaich ufōvölōn, hatööḵngenre inrē tö māham cha. Pò ngam Mā Tēv yip tömaṙôngö nö ṙapkö tökētu nö ip lā kapā panam i kui ap tahël Yūfrātīs.

¹¹Kuṙòh chuh Kīlīöt, kē incham, Ō yī-ö rēlö kikānö kūön Aikup! Chök alaha yin öi pōyen lanë-entī töre; hö-ö yin lanöökuṙen.

¹²Ngaich yin vē pumnāmö tarik nö hang sumrōngkūö yīö, tööḵlö ön ngih tumlat tö ṙô yīö peuiny; pòn fukhen höö kumyung nö in höö; ṙongngen cha-a nö fukngö.

¹³Ngam ṙô ngam Mā Tēv nö vë-ekūö Yarimiā ök pròfĕt tö inlahen yanīhih Nēpukatnesar ök rācha aṅ Pēpilön nö hachök ngam panam Aikup:

¹⁴Vënyen e i Aikup, ahangkö e inrē i Miktòl: ahangkö e i Memfis Tahpanhes inrē; ngö ṙö, Höngöre sökhak halēnöre inrē tön kuyānykūöre an min ngam sanët nö havīlen yīö.

¹⁵Kūöyòh ök Apis nö falngöre? Kūöyòh nūā meh nö öt sökhakṙen? Pò ngam Mā Tēv nö kuringten ò.

¹⁶Fukngö yip tömaṙôngö in meh nö kavē-ĕre, ngaich ngö ṙô cha-a tö höö, Chōholre, tā-a töi havanritre in yip tarik re ip panam inrē chūök kinyôḵnyö hī, kūö ngam sanët ngam mahakihten.

¹⁷Havëkö minë-eny Fërō, rācha aṅ Aikup, Tömaṙënṙô hamökngö röön ṙētak nö ngaich.

¹⁸Sā chu tö-aṅ, ṙô ngam Rācha ngam töminënyuvö tö ngam Mā Tēv yip tömaṙôngö, sā Tapōr i nup rôngö, sā Kārmel inrē nö lākūö mai, nö hĕng tak min öp yamih.

¹⁹Halēnöre yin tö nup inṙūng chehen yiö öi ahötiyö, Ō yī-ö aṅ Aikup! Pò Memfis min vītöre nö öt aṅhav, payāyi, ötaṅhav tö tarik.

²⁰Tövai ap Aikup nö kūön nuā, ngaich pöri öp inṙūöi kamap nö löktö lā kapā nö teung nö i kui ò.

²¹Yip töhaṙāyö kumyung ellōn ò nö sā töha-òknyu alaha kūön nuā; hôṅ, ngaich nö havöökūöre nö ṙōngö röön nö falngöre hö-ö yik nö söktöhëchṙen; pò ngam sakāmö pinlāngen cha nö yih nö i kui cha, ngam ṙētak cha nö sācha.

²²Sā ṙô pēch anga-aṅ nö kiröönngöre pò yip lā-al ò nö hĕng kiteūm röön; nö yih nö lā-al ò nö aṅtī tö hanīöng, sā tī cha yip kamūöl tö chōn.

²³Kūöltu nup min el inchōn ò tö cha ṙô ngam Mā Tēv, pòrô angū-ö nö töt maneutken, pò cha nö mötlö ṙôken tö mufākö hö-ö yik nö kanṙeūken.

²⁴Sumrōngikūö ap min kikānö kūön Aikup, kētu ap min nö eltī yip tarik aṅ lā kapā.

²⁵Ngö ṙô an, ngam Mā Tēv yip tömaṙôngö, ngam Tēv Israel: Yĕh meuk, kētö sācha chin i kui Amön öp aṅ Tipes, Fërō inrē, Aikup inrē tö nup tēv ò rācha ò inrē, i kui Fërō yip mahayönglenre inrē nö in ò.

²⁶Kēten cha chin min eltī cha yip chamöh nômö cha, ëlti Nēpukatnēsör öp rācha aṅ Pēpilön eltī yip in ò inrē yöngkūö kumyung. Unôich min Aikup nö aṅhavkūö nö sā nuk sakāmö misī, ṙô ngam Mā Tēv. Hayööken yip tarik re min ngam Tēv

²⁷Uh pöri me-eṅ pa-ekūö Ō tarik chu Yāköp, um rēhĕn ngangngökūö Ō Israel; Yĕh meuk, löktökūö tömarôvat chin min hayööken meh, yip kūön meh inrē löktökūö ip panam chūök inkövö cha. Havan ap min Yāköp ngaich chēvhakṙen min nö ngöh, öt hĕng tak min töpa-ekūö tī tö ò.

²⁸Um pa-ekūö, Ō tarik chu Yāköp, ṙô ngam Mā Tēv, tön holtöṙah meh chin. Ahatngö yip pumnāmö tarik chin min yip chūök meh ahōṙiyö tö chu, hö-ö pöri chū-ö min ahatngen meh. Chökṙen meh chin halöök ṙôkö tīre, öthētu inrē öich ṙāngen meh öt chöken.