Read Car_Nicobarese YERIMIĀ 48 Bible Online

YERIMIĀ 48 - Car_Nicobarese bible

YERIMIĀ 48

¹Inlahen Mō-ap. Ngö ṙô an ngam Mā Tēv yip tömaṙôngö, ngam Tēv Israel: Aōla Nēpō, pò e ngaich nö ngaich nö piyāyi! Sumrōngi kūö an Kīriātēm, ngaich an nö kē-ĕ; sumrōngikūö an ngam chūök kumyung nö tiṙöliyö inrē;

²Öt ōtren ap inkuilö Mô-ap i Hespòn yip nö halēnlö tötlöök nö lā-al ò: Tā-a, töi rökngen ò ṙā-ang i punāmö tarik! Ō yī-ö tökatūöyaṙen tarik, yī-ö yin inrē min tövītuṙen öt ṙô-òv; lū-u yin min tö ngam sanët.

³Hangihtöre! Töp ṙô ṙamā-ang Horōnēm, öt kanôlò tökiröng tinṙōlngö inrē!

⁴Piyāyi öp nö ngaich Mō-ap; sölngö ök pineūinyö nö hāngö nö i Sō-ār.

⁵Pòn i paneūlö Luhit cha-a nöng kinröönngöre nö peuiny; pòn ip paneūlö Horōnēm cha-a nö hang pineūnyö tinṙōlngö.

⁶Falngöre! Hayöökenre yin! Sā köttö yin yĕh el tönyalnyi!

⁷Pòn kūö yīö hayönglenre i nup töngëḵ chūök yīö i nup chehen yīö inrē töpōirāi, kē-ĕ yin min yī-ö inrē; Kīmòs inrē min kiröönngöre im inhötngö, holre tö yip kūönṙô ò tö yip kūön rācha ò inrē.

⁸Kö yihiv kui nup elpanam min töp pumyāihanga, öt hĕng min elpanam tötkö-òng vah; hatngö min ngam achāṙö, piyāyi min ngam töṙā-akūö, sā ṙô ngam Mā Tēv nö ngaich.

⁹Kētö sanëòk Mō-ap, hòṅ ò nö kiteūngöre; vītöre nup min elpanam ò nö töpayāyi, nö öt aṅhavkūö tö tarik.

¹⁰Tötkôlò öp yēḵ anga-aṅ öp töhāṅ-en nö la-evṙen tö la-en ngam Mā Tēv; tötkôlò anga-aṅ inrē öp mamiṅh kūö sanët re nö i kintaknyö mahām.

¹¹Tö löktökūö nyinī-öṅre an Mô-ap nö kuchīken ūichhakṙen ngaich nö im kin-eūṅtö; öl an nö asënyu nö ṙā-ang el ngam tahëng chūökṙen, ötrēhĕn an nö chuh el inkövö; lökten ap kumchik ò nöng köp nö in ò öthaṙīköre inrē öp tinôngö ò.

¹²Yĕh meuk, lökten nup sakāmö nö yih, ṙô ngam Mā Tēv, hē chu min tīntö ma-asīhanga in ò öp ma-asīngen ò min, ngaich ahatngö aṅ nup chūökṙen ò, likukngö nup neū-euṅ ò inrē nö panyeiny.

¹³Sirōngkūö min ngaich Mô-ap tö Kīmòs, sā ngam patī Israel nö sirōngkūö tö Pētĕl ngam inyönglen cha.

¹⁴Sitih öi ngö ṙô, Tö-eūnyu in, tökalēḵ inrē tarik kumyung?

¹⁵Yīh ap pumyāingen Mô-ap tö nup elpanam ò inrē, ngaich yik tö-atöllöng ṙālö tarik ò nö chuh i chūök finëlngö, ṙô ngam Rācha, ngam tö minënyu, tö ngam Mā Tēv yip tömaṙôngö.

¹⁶Röhta an ngam ötkanôlò Mô-ap veūtö yanīhih inrē ngam kanihngen ò.

¹⁷Ṙòkhöre yī-ö mahavīlen ò, peuiny miṙivlōnre tö ò, ṙòkhöre inrē yip tö-akahakūö tö minë-eny ò; ngö ṙô, Yöng linkölngö ngam tökalēḵ kinchīṙö, ngam tövai tinkung.

¹⁸Yôkti man ṙā-ang im kanôlòre ūichngöre inrē i kui ngam tökeh tumlat, Ō me-eṅ aṅ Tipòn! Tön yih an nö lā-al meh ngam pumyāingen Mô-ap; ngaich an nö piyāingö nup töngëḵ chūök meh.

¹⁹Söklöre el talöökö Arō-ēr! Hatön öp kikōnyö famalnyöre ap kikānö inrē tötkô-òngvah; ngö ṙô, Suh ap lāinyngen meh?

²⁰Sumrōngikūö ap nö ngaich Mô-āp pò e nö ngaich nö payāyi; harāmöre yin peuiny inrē! Vë-eny e i Arnòn, tö Mô-āp nö ngaich nö piṙāpiyö.

²¹Yih ap inkaha fālen nö im panam tömitākö kui, i Hōlòn, Yahsāh inrē Māfa-at inrē,

²²Tīpòn inrē, Nēpō inrē, Pettiplatēm inrē.

²³Kiriatēm inrē Patkāmul inrē, Pateme-òn inrē,

²⁴Kīriöt inrē, Pòsra inrē, ṙòkhöre inrē nup elpanam i panam Mô-āp, tömarôvat töröhta inrē.

²⁵Ngaich ök sinrōl Mô-āp nö rökiyö laköl inrē ök kël ò, ṙô ngam Mā Tēv.

²⁶Mihiyōingen ò, tön hapōilöre an nö lā-al ngam Mā Tēv; hòṅ Mô-āp min nö kiyū-öre nö i kuvah re, anga-aṅ öp min inrē tö pinhëṅtukūö.

²⁷Röh öp Israel nö pinhë-eṅkūö yīö? Kôti apa nö in yip mu-ūlāyö, töp lökten meh ringeul kui re yĕm vë-ekūö ò?

²⁸Ṙāngö nup elpanam yin, iyöng el ihong inrē, Ō yī-ö aṅ Mô-āp! Sā öp nyö-öṅ yēḵ öp me-el fôngöre i kaha kūö elvāng öp tömëngö.

²⁹Ngaich in hang inkeūlen Mô-āp yāhen an nö hakeūlenre ip rô-òl chūök ò, inkeūlen ò, nganë-eṅkūö ò inrē, kaneūṙö ellōn ò inrē.

³⁰Akahalōn chin tö mināichṙen ò, ṙô ngam Mā Tēv; minyôiny nup ineū-eure tö ò, minyôiny nup la-en ò.

³¹Lökten chin harāmö Mô-āp; peūinyö Mô-āp chin nö ṙòkhöre; kūö yip tarik aṅ Kirhērĕs öi haṙīvölōn.

³²Mötlö ṙô chin peūinyö meh töre peūinyö Yāsör, Ō vāin aṅ Sipmah! Ngaich nuk pak meh nö havāngngö kui ngam mai, sölngö nö ngaich nö i Yāsör; i kui nup ṙòng sikehngö in meh i chūök vāin meh inrē ap pumyāihanga nö fukta.

³³Kē-ĕyö nuk nö ngaich ṙanāmölōn kumchiklōn inrē ṙā-ang ing panam Mô-āp töṙôngu aṅkūö; vīten vāin chin nö ṙā-angre nö el kinrān vāin; öthĕng tak ramöönnyö u nö holtö inyôṙö ṙanāmölōn; öt inyôṙö ṙô töṙāmölōn ap umuh inyôṙa.

³⁴Hū-a ap Hespòn, Ĕliāleh inrē; sölngö ṙô yip nö tölngö Yā has, löktökūö Sō-ar söl i Horonēm Ēklātselisīyā inrē pò nup mak Nimrim nö ngaich nö öt aṅhaṅvö.

³⁵Keuheūthangen chin min i Mô-āp, ṙô ngam Mā Tēv, anga-aṅ öp kamëto tökētu nö ël nup lātulöng föng tötahūsa inrē nö ip tēvre.

³⁶Lökten öp ellōn chu nö peuiny miṙivlōnre tö Mô-āp nö sā ṙô fanöö, peuiny miṙivlōnre inrē ap ellōn yip tarik aṅ Kirhērĕs; lökten nuk kanôlò taneūngen cha nö ötkôlò.

³⁷Kö kuhāki keūyö nup kui, kö kamööpi sanôi samā inrē; keuheūtngöre nup kël nö luvā-akakūö vah, i ṙat inrē öp sāk.

³⁸Keuheūtngöre kui patī i Mô-āp el talöökö inrē nö öt tahëngu höng inrāmöre; pò chu likukngen Mô-āp sā ök chūökṙen öp töt hĕng tak mahakūöken ṙô ngam Mā Tēv.

³⁹Yöng linkukngö e! Yöng ṙô cha nö harāmöre! Yöng inlahen Mô-āp nö hapung tö ukre nö sirōngkūö! Lökten Mô-āp ngaich nö pinhë-ekūö vanööṙö cha inrē yip mahavilen ò.

⁴⁰Pòn ngö ṙô ngam Mā Tēv: Yĕh meuk hĕng tak öp min kumteū nö sā yanītö matēṙö, hanyāknyö këlre inrē nö lā-al Mô-āp.

⁴¹Kē-ĕ nup min elpanam, kē-ĕ inrē nup töngëḵ chūökö. Ip sakāmö angū-ö min öp ellōn yip kumyung aṅ Mô-āp nö sā ellōn kikānö mahalöinyöre nö kayôḵ;

⁴²Piyāyi ap min Mô-āp öt ōtren nö tarik inrē, pò ò nö hapōilöre nö lā-al ngam Mā Tēv.

⁴³Pinhë-eṅkūö, anūlö, tinngöp inrē i kūö yīö, Ō yī-ö aṅ Mô-āp! ṙô ngam Mā Tēv.

⁴⁴Öp famalngöre nö ṙā-ang im pinhë-eṅkūö suktöre min nö el anūlö, ngaich anga-aṅ öp yamôklö nö ṙā-ang el anūlö kô-òngvah min nö el tinngöp. Pò chu min kēten në i kui Mô-āp ip samyeūheu cha nö sācha, ṙô ngam Mā Tēv.

⁴⁵Elnyat Hespòn yip ma-afalngöre nö sökngöre nöng öt kalē-en; pò ap tameūyö nö ngaich nö löknyö Hespòn, töhūkūö tameūyö ṙāngö patī Sīhòn; ngaich öp nö ökngö tī tö māl Mô-āp, ngam sapīöv yip kūön tinṙōlen.

⁴⁶Tötkôlò man më-eṅ, Ō Mô-āp! Ngāichövah yip tarik Kīmòs; pò yik kikōnyö kūön meh nö kē-ĕyö nö töhakövö yip kūön meh kikānö inrē nö el inkövö.

⁴⁷Sön pöri min chū-ö havantö nup kanôlò Mô-āp i nup lā-unôich sakāmö, ṙô ngam Mā Tēv. Ngö tölngö an ngam inkaha fālen Mô-āp.