Read Car_Nicobarese YERIMIĀ 49 Bible Online

YERIMIĀ 49 - Car_Nicobarese bible

YERIMIĀ 49

¹Inlahen yip aṅ Amön: Ngö ṙô an ngam Mā Tēv: öt kūönu ap Israel tö kikōnyö? Öt aṅhav-in ap tö tö-amīnuvö? Kūöyòh ang Milkòm nö kē amin Kāt, ip tarik ò inrē nö iyöng nup elpanam?

²Lökten, yĕh meuk, yih nup sakāmö, ṙô ngam Mā Tēv, hē chu min tī-ivö tö ṙô kinyūngö nö hāngö nö lā-al Rapā öp aṅ in Amön; hö-ö öp min nö ngaich nö tö-aṅhavkūö nö paneūlö, föngi nup min tuhēt in e nö i kuö tameūyö; ngaich min Israel nö kē chūök ò öp kamë chūök ò, ṙô ngam Mā Tēv.

³Ō Hespòn, peuiny miṙivlōnre man tö Ai nö ngaich nö piṙāpi! Peuiny, yī-ö kikānö kūön Rapā! Kafānöre tö sāk, harāmöre, fal umu-aṅ ihī-a inrē i minë kinlōngö! Tön kiröönngöre öp min Milkòm nö ahötiyö, holtö yip kūönṙô ò tö yip kūön rācha ò inrē.

⁴Kūöyòh öm hakeūlôre tö minë achāṙö meh, Ō me-eṅ kūön kikānö tötkô-en, mahayönglenre i töpōiṙāi chehen re, öm ngö ṙô, Achīö ap min yamih nö lā-al chu?

⁵Yĕh meuk, kētö pinhë-eṅkūö chin min i kui meh, ṙô ngam Mā Tēv yip tömaṙôngö, ṙā-ang in yip mahavīlen meh nö ṙòkhöre, ngaich me-eṅ min ahōṙīyö kö hachip kū-ö-re lā kūöre, öthĕng tak mahamūlken yip tö pāngö.

⁶Unôichngöre pöri min chū-ö havantö nup kanôlò Amön, ṙô ngam Mā Tēv.

⁷Inlahen Itöm. Ngö ṙô an ngam Mā Tēv yip tömaṙôngö: Öt ōtre ap mikah nö in Tēman? Ngaich ök inlēnö nö payāyi nö in yip tö-akaha? Ngaich ngen ök mikah cha?

⁸Havöökūöre, falngöre, iyöng el tökihngen, Ō yī-ö aṅ Tētan! Tön kētö öt kanôlò Isô chin min i kui ò, öp hē chu sācha tī tö ò.

⁹Yē yip mahamūl ṙòng angkūr nö yih nö in meh, röh yip nö ṙāngö töchapka? Yĕn yih yīp mu-ulāya tö hatööm röh yīpa nö köich töng kanô-òng kūöre?

¹⁰Luhngö hilā Isô pöri chū-ö nö chumlal, hameuknyö nup töhayūni chin in ò, ötkô an nö hanyatngöre. Fëli yip kūön ò nö ngaich, yik mak alaha ò inrē tö yik hol ò; öt ōtren ap nö ngaich.

¹¹Ṙāngö yip kūönyōich kūön re, chū-ö chin mameūkken cha nö aṅ; hökngen yip tafiösi yīö nö hayönglenre nö in chu.

¹²Tön ngö ṙô an ngam Mā Tēv: Yē cha yip tötkô nö òk kūö ngam kulah nö öt ṙanāngen nö òk kūö e, höng kiröönngöre öm min me-eṅ öm öt sācha? Hö-ö man min kiröönngöre öt sācha, ôkö e pöri me-eṅ.

¹³Pò chu chūökuṙô in re, ṙô ngam Mā Tēv, tö Pòsra min nö pinhë-eṅkūö, nāchngen, töpiyāyi, rinôichngen inrē; ṙòkhöre nup elpanam ò min nö urāḵngen nö ötkôlò.

¹⁴Hang inhānga chin aṅ im Mā Tēv, ngaich ök inrē ma-ahānga nö tīniyö nö i yik pumnāmö tarik: Hamūltöre yin ngaich yih lā-al ò, chōholre öi kiyung!

¹⁵Yĕh meuk, vīten meh chin kūöṅnö in yip pumnāmö tarik, töthakūökaṙen in vē tarik.

¹⁶Hachīlö meh ap pinhë-eṅkūö vahīlen meh, ap inkeūṙö ellōn meh inrē, me-eṅ mī-iyöng el linrākö ihong, ṙamapkö kui ngam rung. Pòrô man vī fôngöre lātulöng sā matēṙö ṙeū-eung umuh man min kētu lātaṙeū, ṙô ngam Mā Tēv.

¹⁷Vītöre an min Itöm nö pinhë-eṅkūö; kö pa-ekūö yip min chamööḵngö e ngaich sihngen e min kūö ap pinlāngen e.

¹⁸Sā hē Sôtöm Kômòra inrē tö nuk elpanam ranghö u nö tiṙöliyö, ṙô ngam Mā Tēv, öt tarīku min mī-iyöng umuh, öt tarīku min törahëchtaṙen nö iyöng in e.

¹⁹Yĕh meuk, sā ap lāyön nö yih ṙā-ang el inchōn i Yôtön nö ip töngëḵ kinlōngö sīṅp, ngö tī chū-ö min harötlen cha nö falngöre nö ṙā-ang in ò; ngaich chū-ö min vīlö yöng ò tö öp katöllö chu. Achīö ṙöng ap tösā chu? Chiāp min mahavëken chu? Chiāp yōm pököre tökô nö sökhak nö i kūö chu?

²⁰Lökten hangihtöre tö ngam inchōngen vahī ngam Mā Tēv nö lā-al Itöm nup chööḵnyi inrē halēn ò nö lā-al yip aṅ Tēman: Pòrô nup tökūöṅnö aṅ i nup pököre sönen nö fiṙëchi min; öthō min öp manūlö u nö öt pa-ekūö tö lāinyngen u.

²¹Kayīna min ngih tumlat tökūö ṙô sanuktöre u; hāngö min öp ṙô u nö ayôṙa nö ip mai Itöm.

²²Yĕh meuk, hĕng tak öp min pameūlöre kitēungöre ngaich nö yit sā matēṙö, hanyāknyökëlre inrē nö lā-al Pòsra, ngaich öp ellōn yip kumyung aṅ Itöm min ip sakāmö angū-ö nö sā ellōn öp kikānö yē ò nö halöiny chanökö kinyô-ò.

²³Inlahen Tamaskös. Kalūöchöre el kui an Hamat Arpat inrē, pò u nö hang tötlöök inhānga; i pinhë-eṅkūö nan nö paṙööyi alaha, sā mai nan töchōichö ël öp tötkô nö öt halöinyköre.

²⁴Ngaich an Tamaskös nö ötkalē-en, havöökūöre an nö ngaich nö falngöre pa-ekūö an nö keuheūtngöre; in ò ap nö ngaich töchökhu miṙivlōn, sā öp kikānö mahalöiny kinyô-òre.

²⁵Sitih öng ngam tö-eūnyu elpanam nö ṙā-ayö, ngam elpanam tö ṙāmölōn!

²⁶Lökten yip ṙāl tarik in ò min nö fuk ël nup talöökö ò, ngaich ṙòkngöre vah yip kumyung min in ò nö fëliyö ip sakāmö angū-ö, ṙô ngam Mā Tēv yip tömaṙôngö.

²⁷Ngaich chū-ö min tōttökūö öp tameūyö i kaha kinlōngö Tamaskös, ngaich angū-ö min nö haṙāpngö nup töngëḵ chūök Penhatat.

²⁸Inlahen Kētar nup pūlngö Hasōr inrē nup tökiyūngö tö Nēpukatnēsör rācha aṅ Pēpilön. Ngö ṙô an ngam Mā Tēv: Chōholre, kū-ö tö lākūö lā-al Kētar! Fëlngö yip tarik aṅ lā chūhöt!

²⁹Kē-ĕyö nup min rūkui cha tö nup pököre cha inrē, nup ranangkūö cha nup chehen cha inrē nö ṙòkhöre; halāyi nup min ūṅt cha nö ṙā-ang in cha, ngö ṙô min tarik nö hūken cha: Keuheūtngöre lā-a pinhë-eṅkūö!

³⁰Falngöre, marô-òlkūö atēṙa iyöng lātaṙeū, Ō yī-ö aṅ Hasōr! ṙô ngam Mā Tēv Pò Nēpukatnēsör rācha aṅ Pēpilön nö halēn inlahenre nö lā-al meh, vī öp chööḵöinyre inrē nö lā-al meh.

³¹Chōholre kū-ötö lākūö lā-al ngam pumnāmö tarik tökuchīken, ngam mī-iyöng chūök tököp, ṙô ngam Mā Tēv, ip töt inkūpu hēk inkālngukūö, öp töt holtuṙah nö i chūök re.

³²Tökē-ĕ nup min ūṅt cha, nup nuā cha inrē. Pirātngen cha min ip kuföt tökeuheūttöre lā-a yip tökamöpi keūyö nö lā taseū, keuheūttöre lā-a löktö tī chin min kētö öt kanôlò cha, ṙô ngam Mā Tēv.

³³Vītöre öp min Hasōr nö chūök chākòl tö-urāngen nö töt aṅhaṅvkūö; öt tarīku min mī-iyöng in e, öt tarīku min tö rahëchtaṙen nö in e.

³⁴Ngam ṙô ngam Mā Tēv ngam yamih nö in Yarimiā ök pròfĕt inlahen Ēlam, ik ranehten Sētikia nö hayöng ök rācha aṅ Yūtā.

³⁵Ngö ṙô an ngam Mā Tēv yip tömaṙôngö: Yĕh meuk, likölngö ngam linreny Ēlam chin min ngam rööntö kumlēḵ cha;

³⁶Ngaich kētö kui Ēlam min chū-ö tö nup töfën kuföt löktökūö nup töfën lā-a im halīöngö; ngaich pirātngen cha chū-ö min in nup kuföt, ngaich rö-övö min nö hĕng pumnāmö tarik tö-öt yīhivkūö min tö yip tö-ahōṙiyö nö ṙā-ang Ēlam.

³⁷Pinëken Ēlam chin min i kūö yip lā-al ò, i kūö cha inrē yip chamöh nômö cha; kētö tötlöök chin min i kui cha, tökiröng tanānyö chu, ṙô ngam Mā Tēv. Tīntö ngam sanët chin min unôichrit cha, hanöng saha chu hatngö tī tö cha;

³⁸Ngaich chū-ö min ṙātö öp kantēre re i Ēlam, fëlngö öp rācha cha inrē tö yip kūön rācha, ṙô ngam Mā Tēv.

³⁹I nup lā-unôich pöri sakāmö chū-ö min havantö nup kanôlò Ēlam, ṙô ngam Mā Tēv.