Read Car_Nicobarese YERIMIĀ 5 Bible Online

YERIMIĀ 5 - Car_Nicobarese bible

YERIMIĀ 5

¹Fal yin lök el nup talöökö Yeruselem ngëicha mikāhang inrē! Chöh el nup talöökö ò ngëicha yē meh kôtökūö tö töhĕng tak tarik öp tö la-evṙen tö töt michūṙen kinṙôka chamöh kanô-en inrē; hòṅ chu aṙēlen ò.

²Pòrô yin ngö ṙô, Sā ngam Mā Tēv nö tö-aṅ, sön cha-a nö minyôiny-aṅ nö chūöku-ṙô.

³Ō Mā Tēv, röh ön minë mat Meh nö ngamëchkö kanô-en? Ngaich Man fōhoh cha, hö-ö pöri cha-a nö lökngöre tö chanökö; keuheūtngöre vah yin tö tī Meh, sōḵ pöri cha-a nö kēḵ chinökṙen re.

⁴Ngaich ngö ṙô chū-ö; Höng vē yāich yin vĕh, öt īnu yin tö mikah; pò cha nö öt akahakūö tö talöökö ngam Mā Tēv, öp chöngö ngam Tēv cha.

⁵Hòṅ chuh i yip tökiröng chin, vë-ekūö cha min inrē; pò cha nö akahakūö tö talöökö ngam Mā Tēv, ngam chöngö ngam Mā Tēv cha. Ṙòkhöre pöri cha-a nö hĕngren nö likölngö ap kaneun, litòkngö nuk nyanëkngö yin.

⁶Lökten öp lāyön nö löktö el inchōn, löktö el nyaṅlnyi kuyāyö min nö kāḵngen cha. Lëpöt höng höngöre nö i nup elpanam cha, öp töng kumyī-inyre min nö ṙā-ang ël u panyeny tökūö u min nö teūchö; pòn pōyen nup tökööl cha, kiröng inrē nup ṙināngö ṙinātö ellōn.

⁷Sitih kanô-òṅ öich aṙēlen meh? Ngaich yik kūön meh nö ṙāngen chu, ngaich nö chūöku ṙô nö kilēḵngôre nö in u nup törö-ö nö tēv, yē chu ha-aṅlen cha nö tööḵngen, ngaich asĕha cha-a kiteūmtöre inrē nö i patī kikānö mī-inyihköre.

⁸Kōra yin tökalē-ĕlōn alaha, tö kô-òng kūö nö nyā-aṅvkūö, ngaich nöng kö hatōhkörit pīhö holre.

⁹Uh öich min sācha tī tö cha tökūö në? Ṙô ngam Mā Tēv; uh öich inrē min havalvah re i pumnāmö tarik tö ngatī.

¹⁰Kuṙòh kiröönngöre lök i töökö nup vain chōn piyāingen u inrē, uh pöri hatngö tī; lirakngö nup pak u, tön amin ngam Mā Tēv nup.

¹¹Pò ngam patī Israel patī Yūtā inrē nö kô-òngrit nö öt kô-en nö im chu, ṙô ngam Mā Tēv.

¹²Minyôiny-aṅ ṙô yin nö im Mā Tēv, ngaich nö ngö ṙô, Öthō ap nö tī-iv tö yô-òv; öthō yin min tötlöök nö teunghukui, öt rēhĕn in öi hō min meuk sanët hēk inyāichö.

¹³Vingöre yip min pròfĕt nöng kuföt; öt īnu yip tö ngam ṙô. Ngö öp min lāinyngen cha!

¹⁴Lökten an ngam Mā Tēv nö ngö ṙô, ngam Tēv yip tömaṙôngö, pò cha nö ngaich nö ṙô tö ngih, Yĕh meuk, vītö minë ṙôre chin nö elvang meh nö tameūyö, ngòh inrē vē tarik,ngaich ngam tameūyö min nö ṙāpngökūö tö cha.

¹⁵Yĕh meuk kētö kui yīö chin töp pumnāmö tarik ṙeū-eung tömarôvat, Ō patī Israel, ṙô ngam Mā Tēv. Töt keuheūt öp nö pumnāmö tarik aṅ i misī nö pumnāmö tarik, pumnamö tarik, öt huveū-eu ṙô yī-ö tö ëlô cha, öt rēhĕn yī-ö kô akaha elnang tö ṙô cha.

¹⁶Sā anūlö öp chòk cha töluvë-akkūö, ṙòkhöre yip nö tökalēḵ nö tarik.

¹⁷Nyāngö ṙòng taneūich yīö yip min nyā-aṅkūö yīö inrē; kāḵngö yip kikōnyö kūön yīö min cha-a tö yip kikānö kūön yīö inrē; kāḵngö nup pököre yīö tö nup sīṅp yīö inrē; nyāngö nup vain yīö yip min tö nup anychīr chōn yīö; tiṙöli nup min tö cha nö aṅtī tö sanët nup elpanam yīö tökalonglöng tö chūök kumyung chūök yīö hayönglenre.

¹⁸Pòrô pöri i nup sakāmö anū-ö, ṙô ngam Mā Tēv, öthō chū-ö min ahatngen yīö.

¹⁹Ngaich ip hē yip tarik yīö nö ngö ṙô, Kūöyòh anga ngam Mā Tēv ngam Tēv hī nö ngati tī tö në nö in hī? Ngaich ngö ṙô min me-eṅ tö cha, Sā yīö ṙāngen chu ngaich lök la-en aṅ tahëng tēv i panam re, ngatī yī-ö min kūönkūö aṅ tahëng ip panam öp töt panam yīö.

²⁰Ve-eny ngih i patī Yāköp, ahangkö e in Yūtā:

²¹Hang ngih yin, Ō yī-ö tökulō-ovö töt akaha tarik inrē, yī-ö tö mātu, öt meuk pöri, yī-ö tönāngu öt hang pöri.

²²Öt pa-ekūö öyih tö chu? ṙô ngam Mā Tēv. Röh öyih kichëyöre i kūö chu? Ṙātö ngam kuyāyö chin ngaich nö tölngökūö ngam mai, töt chanūhuvṙen nö inrahkūö ap öt kanô-òṅ e nö havāngngöre; pòrô minë mahūvö nö pavlöre, ötkô pöri anū-ö, pòrô anū-ö nö ṙënuṙô, ötkô pöri nö havānglöre tö e.

²³Ngaich pöri vē tarik nö tö-ngë-eṅ ellōn ma-ahôngen inrē, kānngöre yin nö ngaich ngaich kirööngöre.

²⁴Hö-ö yin nö ngö ṙô nö ellōn re, Tā-a töi pa-ekūö töm Mā Tēv ngam Tēv hī, ngam kamëtö kumṙah ip hē re, kumṙah ilūöi, kumṙah kūö-arūṙö inrē, ngaich haköpi pòkūö hī në sinat sumkum tövīlöngö tökūö inmūlö ṙòng taneūich.

²⁵Havööṙikūö nuk nö ngaich tö öt lanöökö yīö, nup tökööl yīö inrē nö harahngökūö tölöök nö in yīö.

²⁶Pòn kôti yip tötlöök tarik nö in yip tarik chu; hayun cha-a sā tumngöp chehechōn nö hulalhaka nö höng. Ṙātö tinngöp cha-a; ngaich kô-òngvah tī tö tarik.

²⁷Sā öp kuvôkö tö tööḵlö tö chehechōn nup patī cha nö tööḵlö tö michūḵ chanökhuṙen; lökten yip nö kiröng, kôlò inrē,

²⁸Sīöpnyi tösangöö cha-a ngaich faṙëcha alaha inrē. Öt tölngukūö lā-en cha-a ngaich tö ötlanöökö; öt kahòklö kui kūön yōich cha-a nö im öt michūṙen kinṙôka, nö hakôlò cha, hö-ö cha-a nö laklö öp töchip in yip töhāṅten.

²⁹Uh öich min sācha tī tö cha tökūö në? Ṙô ngam Mā Tēv; uh öich inrē min havahlvah re i pumnāmö tarik tö ngatī?

³⁰Ngaich ap nö im panam vanööṙö pinhe-eṅkūö inrē:

³¹Minyôiny-aṅ ṙô yip pròfĕt, ṙô-ôv, hayöng yip kūönṙô inrē nö i kū-ölōn cha; hāngenlōn yip tarik chu tö e nö ngatī, sitih inlahen öm min me-eṅ yē öp manāngen nö yih?