Read Car_Nicobarese YERIMIĀ 50 Bible Online

YERIMIĀ 50 - Car_Nicobarese bible

YERIMIĀ 50

¹Ngam ṙô ngam Mā Tēv nö ṙô-òv tö inlahen Pēpilön, inlahen öp panam Kālti, nö lökten Yarimiā ök pròfĕt:

²Vë-eny i pumnāmö tarik ahānga inrē, hatamlö ap pantēra ahānga inrē uh ap nö hayūni, ngö ṙô inrē: Kē-ĕ Pēpilön. Sumrōngikūö öp Pel, ngangngö kūö ap Mērötek. Sumrōngikūö nup insātēv ò, ngangngökūö nup insātēv ò.

³Pòn löktö lā kapā öp pumnāmö tarik nö yih nö lā-al ò, vamīngen ngam panam ò min nö öt aṅhaṅvkūö, öt hĕng tak min inrē mī-iyöng in e; falngöre min tarik töṙeūla inrē.

⁴I nup sakāmö ip ṙētak angū-ö inrē, ṙô ngam Mā Tēv yip tarik Israel min tö yip tarik Yūtā nö ṙongti yīhih, höng paneuinyngöre cha-a nö yih; ngaich cha-a min nö chöh ngam Mā Tēv ngam Tēv cha.

⁵Hatönkö talöökö min cha-a tökū-ötö Sīyôn, nö havöötö nup kūö re nö kū-ötö in e, nö ngö rô, Tā-a, töi hamūltöre im Mā Tēv im tötchanūhuvṙen kinlēḵngô ngam töthō min nö vāchiyö.

⁶Pököre yip tarik chu töchatngen; hökiṙen nup tö yip yōm re nö lō-ongkūö, hachō-oikūö nup nö i kui rôngö; ngaich nuk nö lök kui ṙôngö rung inrē, vaichngö nuk nö ngaich tö kinlōngöre.

⁷Kāḵngö u nuk tökôtökūö tö u, ngaich ngö ṙô yip tökunyaha elmat, tö u, Hö-ö in ihö fāluṙen, pò cha nö köölö fālen nö im Mā Tēv, ngam tôkô-en elyöngö cha, ngam Mā Tēv, ngam maheūṅkkö yik yöng cha.

⁸Falngöre yin ṙā-ang ellōn Pēpilön, kiröönngöre ṙā-ang panam ip aṅ Kālti, ngaich sā kōiny pököre nö urēhĕkūö töhĕng mūl.

⁹Yĕh meuk, tön haruhlö ane inrē kētö lā-al Pēpilön chin tö tökiröngen pumnāmö tarik, löktö im lā kapā panam; haṙāköre yip min nö lā-al ò; ṙā-ang umuh min anga-aṅ nö kē-ĕyö. Sā töhuveū kumyung nup chòk cha töt mahavöököre nö öt pô-òvö.

¹⁰Kē-ĕ chehen yip min aṅ Kālti; ngaich ṙòkhöre cha-a min yip kamëḵ chehen ò nö tööḵönglōn, ṙô ngam Mā Tēv.

¹¹Pòrô yin ṙāmölōn, pòrô yin eu-eūre, Ō yī-ö kamil chehen ngam amin chu, pòrô yin yal tö kiyôp sā kun nuā, ngaich hatōha sā kōiny kōra inrē.

¹²Sīrōngkūö öp min yöng meh kikānö, anga-aṅ inrē öp kamyôḵnyen meh min, nö aṙĕ-ĕvö. Yĕh meuk, manā-aṅ öp min anga-aṅ nö in vē pumnāmö tarik el inchōn tönyô tönyalnyi inrē.

¹³Kūö ngam lanīnö ngam Mā Tēv angū-ö min nö öt iyöngö ngaich pöri min nö tötaṅhaṅvkūö; kö pingamkūö yip min chamööḵngö Pēpilön, ngaich hisngen e tökūö nup nyaha ò.

¹⁴Haṙāköre yin lā-al Pēpilön havīṙöre, ṙòkhöre yī-ö tamūök linreny; lirënyan, un aṙēlöng chòk tön köölö fālen an nö im Mā Tēv.

¹⁵Hū-a pōitô havīlen ò, ngaich an nö hökngövahre; taṙöli nuk nö ngaich lanaklö ò, tiṙöli nuk nö ngaich kinlōngö ò. Pò ngih nö invāhalvah aṅ i ngam Mā Tēv: havāhalre in ò, sā tī ò anga-aṅ nö in meh.

¹⁶Rökngen ap tameūich i Pēpilön, anga-aṅ inrē öp ṙamapkö kanöt hē el inmūlö ṙòng; kūö öp sanët öp mahakihten, kö havöötökūöre min nö i tarik re kö falngöre min inrē nö i panam re.

¹⁷Sā sīṅp an Israel tölū-u nö ahōṙö tö lāyön. Urĕh ngam rācha aṅ Asīriā nö kāngen ò, möl töngamuh nö uhē-ĕren Nepukatnēsör rācha aṅ Pēpilön nö kulih tangëḵ ò.

¹⁸Lökten ṙô ngam Mā Tēv yip tömaṙôngö, ngam Tēv Israel: Yĕh meuk, kētö sācha chin i kui öp rācha aṅ Pēpilön I kui öp panam ò inrē, sā chu sācha tī töp rācha aṅ Asīria.

¹⁹Havanten Israel chin min ip chūök ò nö nyā-aṅvkūö, I kui Kārmel öp min nö nyā-aṅvkūö, I kui Kārmel öp min nö ha-aṅhalre Pāsan inrē, ngaich tööḵngen min ap lōn ò nö I kui nup rung Ifrēm Kilīöt inrē.

²⁰I nup sakāmö anū-ö ip ṙētak angū-ö inrē, ṙô ngam Mā Tēv, Chöhöh min öp öt lanöökö nö in Israel, ngaich hö-ö-vö min nö umuh; tökööl i Yūtā inrē ngaich öt kôti min; pò chu min aṙēlen cha yip töṙātu nö chööḵṙen.

²¹Kuṙòh, lāḵlö ngam panam Mēratēm, laḵlö yip aṅ Pēkòt inrē. Fëlhaga, ahathanga unôichrit cha; ṙô ngam Mā Tēv, keuheūtlöre tī tö nup tinölô meh tö chu.

²²Ṙënṙô kinyūngö ap im panam, yöng ṙôkhangen inrē!

²³Ṙātiyö an ngam mūngöre ngih panam nö keuheūtngöre ohngö inrē! Ngaich an Pēpilön nö vītöre nö pinhë-eṅkūö in vē pumnāmö tarik!

²⁴Ṙātö tinngöp meh chin ngaich kô-òngvah me-eṅ, Ō Pēpilön, öt akahalōn, me-eṅ inrē tö e, kôti me-eṅ ngaich kô-òngvah, pò meh lā-al ngam Mā Tēv.

²⁵Löpnyökūö ngam chūök nup aṅtī re an ngam Mā Tēv ngaich inrē nö kēnyö nup aṅtī ngam lanīnöre pò ngam Mā Tēv yip tömaṙôngö nö aṅhav-in tö la-enre nö i panam yip aṅ Kālti.

²⁶Keuheūttöre lā-al tā-a lā-al ò; löpnyökūö nup chūök sāiny ò; afônglen ò sā fôngö sāiny, piyāingen ò inrē nö keuheūtngöre; un hĕng tit töṙātu nö in ò.

²⁷Fëlngö nup kōiny nuā ò nö ṙòkhöre, hökngen u nö chuh ël ap chūök ṙinatnyö lineun. Tötkôlò yip cha-a pò ngam sakāmö cha nö yih, ngam hē cha nö sācha.

²⁸Hangihtöre! Falngöre yin öt kô-òngvah inrē nö ṙā-ang ing panam Pēpilön, nö ve-eny in Sīyôn tö ngam invāhalvah aṅ im Mā Tēv ngam Tēv hī, invāhalvah ngam töhet chūök ò.

²⁹Havëtö yik lumreiny nö lā-al Pēpilön, ṙòkhöre cha-a yip samôntö linreiny Iyöngtöre havīlen ò; un hĕng tak tö öt kô-òngvah. Kē-ĕkūö ò asā nuk tī ò, tī-iv in ò tö tösā nuk töngaich tī ò; tön hakeūlenre an nö harāinyngö ngam Mā Tēv, ngam Töhĕng Töhet in Israel.

³⁰Lökten yip min ṙālö tarik ò nö fukngö nö el nup talöökö ò, ṙòkhöre inrē yip kumyunglen ò min nö fëliyö ip sakāmö angū-ö, ṙô ngam Mā Tēv.

³¹Yĕh meuk, lā-al meh chin, ō me-eṅ mahakeūlenre, ṙô ngam Mā Tēv yip tömaṙôngö; pòn ngaich ngam sakāmö nö yih, ngam hē chu min sācha tī tö meh.

³²Kavē-ĕre an min ngam mahakeūlenre fukngö inrē, nö öt hĕng tak mahachohlen ò, tōttökūö tameūyö chin min inrē i nup elpanam ò, ngaich angū-ö min nö ṙāpngökūö tö nup mahavīlen ò nö ṙòkhöre.

³³Ngö ṙô an ngam Mā Tēv yip tömaṙông: Hakihtuṙen yip tarik Israel, yip tarik Yūtā inrē nö hol cha; ṙòkhöre yip kamë-eṅ cha nö hakövö nö köptī tö cha sōḵ yip nö ṙāngen cha.

³⁴Tökalēḵ an ngam ṙāmānyen cha; Mā Tēv yip tömaṙôngö ap minë-eny ò. Vë-elkui cha an min pòn hòṅ kētö haneūheu nö ing tumlat, öt haneūheu pöri nö in yip aṅ Pēpilön.

³⁵Sanët ap i kui yip an Kālti, ṙô ngam Mā Tēv, i kui yip kūön rācha ò, tö yip tö akaha tarik ò!

³⁶Sanët i kui yip chamòng alaha, hòṅ cha nö vītöre nö kulō-ov! Sanët i kui yip kumyung ò, hòṅ cha nö fëliyö!

³⁷Sanët i kui nup kōra ò i kui nup inröl ò inrē, ik kui yip kumyung inrē aṅ tahëng panam in ò, hòṅ cha nö vīngöre nö kikānö! Sanët I kui nup chūök chehen töpōiṙāi, hòṅ u nö kē-ĕ!

³⁸Ṙanāchö i kui nup mak ò, hòṅ u nö nyôngö! Pò e nö panam insātēv, yahlö lōn inrē cha-a tö nup insātēv re.

³⁹Lökten nup min aṅ el inchōn töṙeūla nö i yöng Pēpilön nö hol tö hain, iyöng in e min inrē nup ôsrich; öt hēk an min nö aṅhavkūö tö tarik, öt rēhĕn nö iyöngö I tumköl chap.

⁴⁰Sā tī ngam Tēv nö tirölngen Sôtöm Kômòra inrē tö nuk hol u elpanam, ṙô ngam Mā Tēv, löken min nö öt iyöng umuh tarik, kūön tarik inrē min nö öt rahëchtaṙen nö iyöng in e.

⁴¹Yĕh meuk yih yik tarik nö löktö lā kapā; tökalēḵ pumnāmö tarik maṙôngö inrē rācha nö hakeutköre nö löktö tömarôvat alaha ngam tumlat.

⁴²Ṙapkö linreiny re nup vöi inrē; töt milēḵ yik, ötaṅhavin inrē tö miṙēlōn. Sā ṙô mahūvö öp ṙënṙô cha; i uk kōra yik ṙak sā tarik i kinyūngö nö lā-al meh Ō kikānö kūön Pēpilön!

⁴³Hang ineūkö cha öp rācha aṅ Pēpilön kalöli nö ngaich nuk kël ò nö öt huveū-en; īnu ngaich anga-aṅ tö töchök miṙivlōn, sā chanökö ngòh kikānö nö i chinöku.

⁴⁴Yĕh meuk,sā öp lāyön nö yih nö löktö el inchōn nö i Yôtön nö ip töngëḵ kinlōngö sīṅp, chū-ö min harötlen cha nö falngöre nö ṙā-ang in ò; ngaich chū-ö min vīlö mahayöngan tö öp atöllö chu. Achīö ṙöng ap tö sā chu? Achīö ap min mahavëten chu? Achīö ap tökô yōm pököre nö sökhak nö I kūö chu?

⁴⁵Lökten hang ngam töhalēnlöngö lā-al Yērusalem ngam vahī ngam Mā Tēv, nup chöönyi inrē halēnngö ò nö lā-al ngam panam yip aṅ Kālti: kô-en nup kun kūönö aṅ i sīṅp cha min nö kichöötiyö kô-en öp manūlö u min nö pa-ekūö tö lāinyngen u.

⁴⁶I ṙënṙô kinë-eṅ Pēpilön min ngih tumlat nö kayīna, hāngö min inrē öp ṙënṙô e nö in vē pumnāmö tarik.