Read Car_Nicobarese YERIMIĀ 51 Bible Online

YERIMIĀ 51 - Car_Nicobarese bible

YERIMIĀ 51

¹Ngö ṙô an ngam Mā Tēv: yĕh meuk haruhlö ellōn öp pumyāihanga chin min lā-al Pēpilön, lā-al yip aṅ Kālti;

²Ngaich chū-ö min inrē tīntö hameuingö uk nëlö i Pēpilön, ngaich cha-a min nö heuingen ò, ane inrē ahatngö aṅ ngam panam ò cha-a, yē cha nö yih nö la-al ò nö löktö i tökeuheūtngöre lā-a ip sakāmö kanihngen.

³Un sōntö linreinyre ngam lumreiny,uh an inrē nö sökhak nö inyut tö vët. Un ṙālöng yip ṙālö tarik ò; ahatngö yip kumyung in ò nö ṙòkhöre.

⁴Fukngö yip min nö fëli nö im panam yip aṅ Kālti, hanyahka inrē nö el talöökö ò.

⁵Pòn öt ṙā-ayö Israel Yūtā inrē tö ngam Tēv cha ngam Mā Tēv yip tömaṙôngö; tööḵlö pöri ngam panam aṅ Kālti tö fālen nö lā im Töhĕng Töhet aṅ in Israel.

⁶Falngöre yin ṙā-ang ellōn Pēpilön, hökngen tarik nö kö hayööken nômö re! Ui rökiṙen i ngam sācha ò, tön hē invāhalvah ön ngih aṅ im Mā Tēv, kētu an nö in ò ngam tī ò invāhal.

⁷Humlum an Pēpilön chūök òk nö eltī ngam Mā Tēv, minyōingö ngih taṙòkhöre tumlat; ngaich yip pumnāmö tarik nö òk ap vāin ò, lökten yip pumnāmö tarik nö katūöyaṙen.

⁸Hönglūk an Pēpilön nö fukngö laköliyö inrē; harāman! Kēḵ incham öp chanökö ò; amahtuṙen an min nö lööken.

⁹Hōten Pēpilön in lang nö lööken, hö-ö pöri anga-aṅ nö lööken. Ṙāngen ò, tā-a inrē töi ngaich kiröönngöre kö i panam re; tön söllö ap nö ngaich inkaha fālen ò nö el halīöngö hatāilöngö inrē nö el minë taṙul.

¹⁰Ngaich an ngam Mā Tēv nö kē-ĕkūö hi tö ngam tökô-en; tā-a, töi vë-eny e i Siyôn ngam la-en ngam Mā Tēv.

¹¹Hakeutnyö kūö nup chòk! Kēḵ nup lanaklö! Ngaich an ngam Mā Tēv nö haruhlö ellōn yip rācha aṅ Mīt, pò ngam chööḵnyi nö in Pēpilön nö pinyāingö e, pòn angū-ö invāhalvah aṅ im Mā Tēv, invāhalvah ök töhet chūök ò.

¹²Asöklö ngam pantēra i nup kinlonglö Pēpilön; vīten amahati nö kalēḵ; asöklö tarik amahati; halēn nup chūök mahayun; tön ngaich an ngam Mā Tēv nö hālenhölö keuheūten inrē tö ṙô re tö inlahen yip aṅ Pēpilön.

¹³Ō yī-ö mī-iyöng i nup töṙōl mak, tökôlò tö töpōi ṙāi chehen, yih an ngam manāngen meh, ngaich an ngam rôta nômö meh nö rökiyö.

¹⁴In re ṙô an nö chūöku ṙô ngam Mā Tēv yip tömaṙôngö: Kô-en chin min hatöölen meh tö tarik, sā ṙôken mufākö, ngaich cha-a min nö hachōlô hamūkö minhôiṅyö nö i kui meh.

¹⁵Anga-aṅ an vamī ngam tumlat nö lökten i minhôiṅyö ò, mahaköpngö ngam panam nö lökten mikah ò, lökten i mikah elmat ò inrē nö hanyāṅknyö minë halīöngö.

¹⁶Hē ò nö kaknyö ṙô re talūöklöng ngaich minë mak el minë halīöngö, vī vang tacham inrē anga-aṅ nö veūklö nö löktö manā-angkūö ngam tumlat. Vī hanyāṅlö kūö ngam kumṙah anga-aṅ, ngaich kēnyö ngam kuföt nö ṙā-ang el öp inchūökngö e tö ò.

¹⁷Kö kulō-ov yin vē tarik öt aṅhav-in inrē tö inkaha; kö sumrōngikūö yin vē ramöm humlum tö nup insātēv cha; pò nup insātēv ò nöng minyòmy-aṅ, hö-ö nup nö unhômu inrē.

¹⁸Öt kanôluṙô nup inchīl elmat nö la-en; payāyi nup min i hē öp sācha u.

¹⁹Öt ngatī öp anga-aṅ öp minchöḵö Yāköp, pòn anga-aṅ töhĕng tak vamīlö taṙòkhöre, miyöngö amin ò inrē Israel; Mā Tēv yip tömaṙôngö öp minë-eny ò.

²⁰Mūngöre chu Man me-eṅ aṅtī inrē i kinyūngö: aṅtī-ten meh chin liköl pumnāmö tarik nö panyeiny; antīten meh chin piyāingö pūlngö;

²¹Aṅtīten meh chin liköl kōra nö panyeiny töp mī-i uk ò inrē; aṅtīten meh chin liköl inröl nö panyeiny; töp aṅ e inrē;

²²Antīten meh chin liköl tarik nö panyeiny tö kikānö inrē: antīten meh chin liköl tököiny tarik nö panyeiny tö ṙālö inrē; aṅtīten meh chin liköl tö-ayal tarik nö panyeiny tö rēlö inrē;

²³Aṅtīten meh chin liköl yōm pököre nö panyeiny tö nup pököre ò inrē; aṅtīten meh chin liköl vamī panô-òṅ nö panyeiny tö yip hol ò inrē; aṅtīten meh chin liköl mahayöng nö panyeiny tö yip yöngṙen kumyung inrē.

²⁴I Pēpilön chin min I yip aṅ Kālti inrē öich havan i kūö mat yīö ṙënngen nup tötlöök tī yīö ngaich i Siyôn, ṙô ngam Mā Tēv

²⁵Yĕh meuk, lā-al meh chin, Ō me-eṅ tumṙōlngö rôngö, ṙô ngam Mā Tēv, tökeuheūtngöre tī tiṙōlngö ngam tumlat; hateutnyö këlre chin min lā-al meh, pilönngen meh inrē löktö ip tölūkö kaha panam, ngaich vīten meh tö-ökngö rôngö.

²⁶Öt kē-ĕyö min ihong nö ṙā-ang I sinkeukngö meh öt ihōngu inrē nö chūökröön tö machööḵlö, urāngen pöri me-eṅ öt aṅhavkūö, ṙô ngam Mā Tēv.

²⁷Asöklö ngam pantēra i kui ngam tumlat, föönyökūö öp römpĕt in yip pumnāmö tarik; halēn yip pumnāmö tarik; yip pumnāmö tarik i kinyūngö la-al ò, havëtö nup pūlngö lā-al ò, Ararāt, Minni, Askēnas; vīlö mākūö kumyung lā-al ò, kētö nup kōra tö sā mufākö tökeūtö rōi sanôi.

²⁸Halēn yip pumnāmö tarik i kinyūngö lā-al ò, yip rācha aṅ Mīt, hol tö yip mahayöngö cha tö yip el katòh cha inrē mahayöng, ṙòkhöre inrē panam elkatòh chöngö cha.

²⁹Kayīna an ngam panam kirātöre inrē nö i chanököre, pò ngam chööḵnyö ngam Mā Tēv nö lā-al Pēpilön nö sökhaka, nö vīten ngam panam Pēpilön nö payāyi, öt aṅhavkūö tö tarik.

³⁰Yip kumyung aṅ Pēpilön ṙāngenre nö kiyung, höngngöh yip nö el nup chūök re töngëḵ; öt ōtre kumlēḵ yip, vīngöre yip nö kikānö; i kūö tameūyö nup elyöngö ò, laköli nuk inkālngökūö in ò.

³¹Hĕng tak öp famal nö höngkūö öp tahëng, hĕng tak inrē öp tahëng, hĕng tak inrē öp ma-ahānga nö höngkūö öp tahëng, nö vë-enynang öp rācha aṅ Pēpilön tö ap elpanam ò nö keuheūtngöre lā-a nö kē-ĕ.

³²Kē-ĕ nup nö ngaich talöökö invāngngö el mak, föngtukūö nö ngaich nup lanak ranangkūö nö I kūö tameūyö, pa-ekūö yik nö ngaich kumyung.

³³Pòn ngö ṙô ngam Mā Tēv yip tömaṙôngö, ngam Tēv Israel: Sā chūök pinṙōngö sāiny an ngam kikānö kūön Pēpilön ip hē rinöönö e; sön nö rahëchtöreṙen ngaich yih min öp hē kanöinyòng.

³⁴Ngeūkten chu an Nēpukatnēsör ngam rācha aṅ Pēpilön ngaich an nö kirūpö chu; vīten chu an nö ngaich töt aṅhavö öich chūökṙen, ngeūkten chu an sā kūö tö kiröng töṙeūla; hatööḵlö el puhū re an tö kumchik chu, kicheūchnyen chu an nö ngaich.

³⁵Nup chanökhuṙen tī nö in chu in yip mak alaha chu inrē I kui Pēpilön yēḵ, hökngen yip aṅ Siyôn nö ngö ṙô, Hökngen Yērusalem nö ngö ṙô, I kui yip aṅ Kālti ap yēḵ mahām chu.

³⁶Lökten an ngam Mā Tēv nö ngö ṙô: Yĕh meuk, vë-el kui meh chin min kēḵ invāhalvah meh inrē. Hanyôlö ngam mai ò chin min, hayôlö öp löklö e inrē nö pöklö;

³⁷Ngaich Pēpilön min nö vītöre nö fônghaka nö tö tiṙöli, elyöngö nup chakôl, pinhe-eṅkūö tösīhiyö inrē, öt aṅhavkūö tö tarik.

³⁸Hol ṙô e min cha-a nö ayôṙa sā lāyön; siröp yip min sā kūön lāyön.

³⁹Yē cha min nö tainylöre halēn nyā-aṅkūö cha chū-ö min ngaich mihiyōingen cha, hanöng saha cha nö kirātöre urāngömat inrē nö haṙòh nö öt aṅhen, ṙô ngam Mā Tēv.

⁴⁰Kēten cha chin min sā sīṅp nö ip ṙamatnyö likeun, sā kōiny kūön sīṅp kōiny pököre inrē.

⁴¹Kē-ĕ ök Pēpilön, kē-ĕ an ngam aheū në taṙôkhöre tumlat! Vītöre an nö ngaich Pēpilön nö pinhë-eṅkūö in vē pumnāmö tarik!

⁴²Pavlöre an ngam mai nö i kui Pēpilön; kahultöre kui an nö ngaich tö tökalūöchöre mahūvö.

⁴³Vītöre nup elpanam ò nö pinhë-eṅkūö, tönyô panam elyaṅlnyi inrē, panam töt iyöngökūö, öt tölökö inrē tö kūön tarik.

⁴⁴Sācha tī chin min tö Pel i Pēpilön, tūöknyö elvāng ò chin min inrē töp töngeūktu tö ò. Öt ngöhören min pumnāmö tarik nö chahīömköti nö in ò; fukngö ök nö ngaich kinlōngö Pēpilön.

⁴⁵Meutnyi ṙā-ang ellōn ò, yī-ö tarik chu! Kö hökngen tarik nö hayööken nômö re nö ṙā-ang im tökalēḵ tanānyö ngam Mā Tēv!

⁴⁶Uh man cheingö ellōn, um pa-ekūö inrē tö ineūkö nup töhānga im panam, yē öp ineūkö u nö yih i töhĕng samyeūheu ngaich unôich inrē öp ineūkö u im tahëng samyeūheu, chanökhuṙen inrē im panam, mahayöng inrē lā-al mahayöng.

⁴⁷Yĕh meuk, lökten nup sakāmö nö yih hē chu min sācha tī tö nup insātēv i Pēpilön; keuheūtngöre min ngam panam nö sumrōngiḵūö, ṙòkhöre inrē min yip töfëli in ò nö fukngö nö lā ellōn ò.

⁴⁸Ngaich minë halīöngö tumlat inrē, ṙòkhöre inrē nup mī-in u, nö tikökṙôre nö ṙamngövah Pēpilön; pò yip famëlhanga min nö yih nö lā-al cha nö ṙā-ang lā kapā, ṙô ngam Mā Tēv.

⁴⁹Hòṅ fukngö öp Pēpilön nö ṙënngen yip töfëli aṅ Israel, Sā fanukngö Pēpilön tökūö töfëli aṅ ngih tumlat.

⁵⁰Öt kô-òng vah man tökūö ngam sanët, kuṙòh, söklöre halöinyköre! Köpölōn tö ngam Mā Tēv öi tömarôvat, hökngen Yērusalem inrē nö meuthöt nö ellōn yīö.

⁵¹Sumrōngikūö in, pò hī ngaich hang minṙēngö, māichngö kūö in tö miṙē-ĕv, pò vē aṅ tahëng nö yih nö I minë töhet chūökö ngam Mā Tēv.

⁵²Yĕh meuk, lökten nup sakāmö nö yih, ṙô ngam Mā Tēv hē chu min akah fālen i nup insātēv ò, keuheūtngöre chūök inrē im panam ò yip töhanyahka min nö alūhure.

⁵³Pòrô öre Pēpilön nö yônlö nö el halīöngö pòrô öre inrē nö hangëlö chūök kumyung nö I kui minë töngëḵ rung ò, sön nö yih nö i kui ò yip aṅ in chu famëlhanga, ṙô ngam Mā Tēv.

⁵⁴Hangihtöre! Löktö i Pēpilön öp inyôṙô! Ṙënṙô öp yöng tinṙōlngö löktö im panam yip aṅ Kāltī!

⁵⁵Pò ngam Mā Tēv nö hulalten Pēpilön nö öt aṅhavkūö, tahngö öp tökalēḵ ṙô ò inrē. Ṙënuṙô nup mahūvö cha sā mak; hachohlöngö nup ṙënṙô cha;

⁵⁶Pò öp famëlhanga nö yih nö i kui ò, i kui Pēpilön; kē-ĕ yik kumyunglen ò panyeiny nuk linreiny cha nö laköl; pò ngam Mā Tēv nö Tēv invāhal, öt hōḵ an min nö öt havëkö inṙënhanga.

⁵⁷Vīten yip kūön rācha ò chin min nö hiyōi tö yip tarik ò inrē tö-akaha, yip mahayöng in ò, yöngṙen yip yöngṙen kumyung in ò, yip kumyunglen ò inrē; haṙòh yip min nö urāngö mat öt aṅhen inrē, ṙô ngam Rācha, ngam tö minëyu tö ngam Mā Tēv yip tömaṙôngö.

⁵⁸Ngö ṙô an ngam Mā Tēv yip tömaṙôngö: Öp töpōitāk kinlōngö Pēpilön min nö haṙôntu nö i kui tumlat, nup inkūp ò inrē tömarô-òl-kui nö föngtukūö min tö tameūyö. Chök alaha tarik nö lā-evṙen, hacheiköre inrē pumnāmö tarik tö töng pôḵ tameūyö.

⁵⁹Ngam ṙô Yarimiā öp pròfĕt nö tölṙô Sērayā ök kikōnyö kūön Nēraya ök kikōnyö kūön Māhsayā, hē ò nö kiröönngöre nö hol Sētikia ök rācha aṅ Yūtā nö i Pēpilön, ik finënö samyeūheu ò nö hayöng. Yōm chūökö ök Sērayā.

⁶⁰Kūich nup tölöök ang Yarimiā nö i mat līpöre nuk tameunghökui Pēpilön, ṙòkhöre në ṙô tökūchiyö inlahen Pēpilön

⁶¹Yē meh yih Yarimiā tö Sērayā: Yē meh yih I Pēpilön, meuk pömchö tö meh vë-ekūö në ṙô,

⁶²Öm ngö ṙô, Ō Mā Tēv, ngaīchö ṙô man tö inlahen ngih chūökö töre öm rökngen e min, hòṅ e min nö öt iyöngökūö, öt rēhĕn tarik öt rēhĕn töṙeūla, urāngen min angū-ö inrē nö töt aṅhavkūö.

⁶³Yē meh keuheūtö ṙô vë-ekūö ngih līpöre, kapòktö ihong in e, kavalngö e ngaich ellōn Yufrātīs,

⁶⁴Öm ngö ṙô, Ngatī lanôngtī an min Pēpilön, öthēk nö chōholre, kūö ngam tötlöök kahëtö chu i kui ò. Ngö tölngö nun minë ṙô Yarimiā.