Read Car_Nicobarese YERIMIĀ 52 Bible Online

YERIMIĀ 52 - Car_Nicobarese bible

YERIMIĀ 52

¹Nët anāi nët samyeūheu ṙēti ang Sētikia hē ò nö ngaich nö rācha; kahuk sīön samyeūheu anga-aṅ nö hayöng nö i Yērusalem. Hamutal minënyi ök yöng ò kikānö kūön Yarimiā aṅ Lipna.

²Ngaich la-evṙen anga-aṅ tö tötlöök nö i kūö ngam Mā Tēv, sā nuk tī Yēhōyakim nö ngaich.

³Ngaich kô-en nö kūö tanānyö ngam Mā Tēv nö taichtökūö nö i Yērusalem Yūtā inrē lökten ò nö kavalngen u nö ṙā-ang i kūö ò. Ngaich Sētikia nö ahôngen nö lā-al ök rācha aṅ Pēpilön

⁴Ngaich im minchūötör samyeūheu ò nö hayöng, im sinömö chingëṅt, im sinömö sakāmö ngam chingëṅt, ang Nēpukatnēsör rācha aṅ Pēpilön nö yih nö holtö yik kumyung nö lā-al Yērusalem, ngaich cha-a nö kayīngö e vīlö chūök kumyung inrē nö havīlö e.

⁵Lökten ngam elpanam nö kayīngö söl ik kinhuk sīönö samyeūheu ök rācha Sētikia.

⁶Im minchūötöre sakāmö ngam finënö chingëṅt ök inyāichö nö kalēḵ nö im elpanam lökten yik tarik nö öt nyā-aṅvkūö nö im panam.

⁷Mëngnyi kaha ngaich ngam elpanam; ṙòkhöre ngaich yik kumyung tarik nö falngöre kunyī-inyre ngaich nö ṙāngö ngam elpanam tö hatööm nö löknyö kūö inkūp ihôi nup tönët kinlōngö, lā ik panô-òṅ ök rācha, hē yik aṅ Kālti nö ṙònghöichṙen nö havīlö ngam elpanam. Ngaich cha-a nö kirööngöre nö kū-ötö Arapā.

⁸Ngaich pöri yik kumyung aṅ Kālti nö lūḵ ök rācha, kô-òl ngaich nö in Sētikia I nup töṙā-akūö panam Yērikō; ngaich ṙòkhöre yik kumyung in ò nö parāti nö ṙā-ang in ò.

⁹Ngaich cha-a nö ik rācha aṅ Pēpilön nö i Riplah i panam Hamat, ngaich anga-aṅ nö kētö sācha ò.

¹⁰Fëlngö yik kikōnyö kūön Sētikia ök rācha aṅ Pēpilön nö I kūö ò; ane inrē fëngö yik kūön rācha aṅ Yūtā nö ṙòkhöre nö i Riplah.

¹¹Piôknyö mat Sēikia anga-aṅ, nyëkan inrē tö sayōk,ngaich ök rācha aṅ Pēpilön nö kē an nö chuh Pēpilön, chaphöt ò ngaich nö el kinlōngö tarik hanöng saha sakāmö kinpaha ò.

¹²Im tinneūyö chingëṅt, im sinömö sakāmö ngam chingëṅt ngam minchūötör sīön sameūheu ök rācha Nēpukatnēsör, rācha aṅ Pēpilön ang Nēpusaratön yöngkūö amhati ök mī-i la-en ök rācha aṅ Pēpilön, nö kuhēthötre nö i Yērusalem.

¹³Ngaich anga-aṅ nö föngtökūö ök patī ngam Mā Tēv, tö ök patī ök rācha inrē ṙòkhöre inrē nuk patī i Yērusalem; keuheūtngöre tökiröng patī nö föngtukūö tö ò.

¹⁴Ngaich ṙòkhöre yik kumyung aṅ Kālti yik mi-in ök yöngṙen amahati, nö tiṙōlngö nuk kinlōngö tö vinngö nö i Yērusalem.

¹⁵Ngaich ang Nēpusaratön ök yöngkūö yik amahati nö kēngö töhakövö tö aṅ i yik mana-angkūö yanāchö in yik tarik ngaich yik chööḵṙen tarik yik töṙā-ai nö ip elpanam yik ṙamāngenre inrē yik mahavāngtöre nö ik rācha aṅ Pēpilön, holre tö yik chööḵṙen aṅ in yik vamī chehen.

¹⁶Ngaich pöri Nēpusaratön ök yöngkūö yik amahati nö rīkre ṙahāti tö yāich aṅ im panam nö mahayōm panô-òṅ vāin kumköh tumlat inrē.

¹⁷Ngaich nuk machööḵlö mās nuk më-ël ök patī ngam Mā Tēv, tö nuk insök tö ök mās mai nuk më-el patī ngam Mā Tēv, liköli anū-ö nö pinyënyi tö yik aṅ Kālti, keūni ngaich nuk mās nö ṙòkhöre nö i Pēpilön.

¹⁸Kē ngö nuk tanīöyö cha-a inrē, tö nuk sanël, tö nuk innyangngökūö ëāṅvö tö nuk pēsön, tö nuk töchilū chūök tötahūsa, ṙòkhöre inrē nuk chūökṙen mās mī-i lā-en ngam patī;

¹⁹Nup tökūöṅnö inrē töchuvī, nup kunrālö, pēsön, tanīöyö, chūökröön tö ëāṅvö, töchilū chūök tötahūsa, töchuvī chūök sanöich. Nuk humlum kē-ĕyö angū-ö nöng sā re nö humlum tök yöngkūö amahati, nuk rupīö inrē, sā re nöng rupīö.

²⁰Nup tönët pöri machööḵlö,hĕng öp mai,nët sīön nuk mās kōiny nuā nuk më-el katòh ök mai, tönuk insök, nuk vahī ök rācha Sòlòmön nö ik patī ngam Mā Tēv, öt kanṙeūken lumngam nuk mās nö ṙòkhöre.

²¹Nuk machööḵlö pöri hĕng ök machööḵlö töhëvhör sīön sumkôngö rôlòng, nët sīön sumkôngö ṙôkö kaha, fën nòng kuntī kinfëyö angū-ö, mëngö ël inrē angū-ö.

²²I kui e ök mirun kui mās; taneui sumkôngö rô-òlkui öp töhĕng mirun kui; hĕng tösā mat inhāṅl ṙòng anār inrē, ṙòkhöre nöng mās, nö vinngö nö in ök mirun kui. Ngam innëtö machööḵlö höng sā e, holtö ṙòng anār.

²³Machūötör anāi tafūöl nuk anār nuk kaha; ṙòkhöre nuk anār nö hēngòng i nuk mat inhāṅl nö vinngö.

²⁴Ngaich ök yöngkūö amahati nö kē-ĕ Sērāya ök mākūö kūönṙô, Sefānia inrē ök innëtö kūönṙô, yik tölūöi tak inrē amahtö ök elmilūkö;

²⁵Ngaich ṙā-ang im elpanam anga-aṅ nö hĕng tak kahë tö yöngṙen kumyung ök mahayöng yik tarik kumyung, sat tak inrē tarik aṅ in yik mahalēn ök rācha, yik tökôti nö ik elpanam; tö ök yōm kinūichö inrē in ök yöngkūö kumyung ök mahamūl yik tarik im panam; tafūöl anāi yik tarik aṅ ngam panam, yik tö kôti nö ellōn ngam elpanam.

²⁶Ngaich ang Nēpusaratön ök yöngṙen amahati nö kē-ĕ cha, ngaich kēten cha nö ik rācha aṅ Pepilön nö i Riplah.

²⁷Fëlö cha ngaich ök rācha aṅ Pēpilön, kumpaha cha inrē nö i Riplah ip panam Hamat. Kē-ĕ yö ngaich Yūtā nö hakövö nö ṙā-ang i panamre.

²⁸Në nun ṙôken yik tarik halaingö Nēpukatnēsör nö hakövö: im sinātö samyeūheu, Lūöi köṅny nët anāi lūöi Yahūti;

²⁹Im hinëvhör sīön sanyeūheu ang Nēpukatnēsör nö halaingö töhakövö ṙā-ang Yērusalem hëvhör ṙòng lūöi anāi nët tak tarik;

³⁰Im innët anāi lūöi samyeūheu Nēpukatnēsör, ang Nēpusaratön yöngkūö amahati nö halaingö töhakövö Yahūti sātòng fën anāi taneui tak tarik; ṙòkhöre ngaich yik tarik nö fën köṅny tafūölòng.

³¹Im lnūöi anāi sat samyeūheu inkövö. Yēhōyachin rācha aṅ Yūtā, im innët sīönö chingëṅt, im tönët anāi taneui sakāmö ngam chingëṅt ang Ĕvilmērōtek rācha aṅ Pēpilön, im samyeūheu ò nö ngaich nö rācha, hachoholkui Yēhōyachin anga-aṅ ök rācha aṅ Yūtā ngaich kēnyen ò nö ṙā-ang el kinlōngö;

³²Aṙē-ĕlōn ṙô ngaich anga-aṅ nö vë-ekūö ò, ngaich kētö anūichö ò nö lātulög tö anūichö yik rācha hol ò i Pēpilön.

³³Lökten Yēhōyachin nö luhngö nuk inyut re nö el kinlōngö. Irô-òten ò nö aṅ, köpen anga-aṅ nö kaheuk sakāmö nö nyā nö el mīs ök rācha;

³⁴Nuk mineukṙen ò pöri, köpen ṙôken kinë-eṅkūö anga-aṅ tö mineukṙen re tök rācha sā ṙôken lōn ò i töhĕng sakāmö, söl ik sakāmö kinpaha ò irô-òten ò nö aṅ.