Read Car_Nicobarese YERIMIĀ 6 Bible Online

YERIMIĀ 6 - Car_Nicobarese bible

YERIMIĀ 6

¹Falkö chūök re öt kô-òngvah, yī-ö tarik Penyamin, ṙā-ang ellōn Yērusalem! Föö öp römpĕt i Tēkō-a, asöklö öp minkahngö i kui Pethakcherem; tön löklö lā kapā öp tötlöök nö tafūnlöngö, tökiröng inrē tinṙōlhanga.

²Fëlngö öp kikānö chin min kūön Siyôn tövai tökôlò inruklö inrē.

³Yih yip min nö lā-al ò yip yōm pököre nö hol tö nup pököre cha; havīlen ò yip min nö vītö rūkui re kö i chūök re yip min nö ha-aṅhal chehen re tö kiyôp.

⁴Halēnöre kiyung lā-al ò; hōklöre, tā-a töi kilöönan i kanānglö ngam sakāmö! Aōla ayī-ö, pò ngam sakāmö nö ngaich nö rūöngö, pò minë nyat ngam harap nö ṙūönyöre rôta!

⁵Hōklöre, ta-a töi kilöönö ò tö hatööm, taṙōlngö nup patī rācha ò inrē!

⁶Tön ngö ṙô an ngam Mā Tēv yip tömaṙôngö: Kūöltö nup chōn ò; hakutlö chūök re kayīng lā-al Yērusalem. Angū-ö ngih elpanam töhòṅ kētu sācha; pòn höng inkihten nyöre in e.

⁷Haköp öp mak re an nö tufömngöre ngatī inrē anga-aṅ nö haköp öt lanöököre nö tufömngöre; chanökhuṙen tinṙōlngö inrē hāngö nö in e; invah ane inrē innyahkö örheūheu nö i kūö chu.

⁸Ō Yērusalem, höngöre man yēḵ, hòṅ chu öt haköhngen re ṙāngen meh; hòṅ chu öt vīten meh payāyi, töt aṅhaṅvkūö panam.

⁹Ngö ṙô ngam Mā Tēv yip tömaṙôngö: kô-òtī chap yip chööḵṙen Israel sā tī re tö vain; sā tī öp mahamūl ṙòng angkūr silôlö kël re hēk i minë pak.

¹⁰In chīö ṙô öich min ṙô-òvö öich kētö mu-urĕh vine-eny-nang, hòṅ cha nö hang? Yĕh meuk löphakkūö nup elnang cha, hö-ö yin nö kô nö hang; yĕh meuk, höng minôn an ngam ṙô ngam Mā Tēv nö im cha, hö-ö yīn nö kumchīkulōn nö in e.

¹¹Lökten chin tööḵlö tö ngam tanānyö ngam Mā Tēv; chei chin haköpken e. Ṙöstö e i kui yip nyīö el talöökö I kui yip tömūlhaka inrē ṙāl tarik; kumngöre nö kē-ĕlre min kikōnyö töpihövö kikānö tö pihövö inrē, tököiny tarik, tököiny takô inrē.

¹²Kētu nup patī cha min nö i tahëng, nup taṙeūḵ cha hol re tö yip pīhö cha inrē; pò chu min hateutnyö kël re lā-al yip aṅ ngam panam, ṙô ngam Mā Tēv.

¹³Löktökūö tökūönö söl i yip tökiröng kūö cha, ṙòkhöre yin nö töyal tö michūṙen taneūngen; löktökūö, pròfĕt inrē söl I kūönṙô, ṙòkhöre yin nö michūṙen nö i la-en re.

¹⁴Höng höhen tī yin nö halanken innyahkö vē tarik chu, ngaich ngö ṙô, Lām, lām, yĕn rö-övö nö lanāmu nö umuh.

¹⁵Sirōngkūö yip vö yĕn lūölken sin-òkkūö? Hö-ö, öt sinrōngukūö yip hö-ö yip nö akahakūö tö miṙē-ĕv. Löken yip min nö fukngö nö in yip töfukngö; kavāli yip min ip hē chu sācha tī tö cha, ṙô ngam Mā Tēv.

¹⁶Ngö ṙô an ngam Mā Tēv: Söklöre yin el talöökö, ngëicha inrē, ngaich havëkö ngam hötṙen talöökö, ngam tölöökö, ngam tölöök talöökö, ngaich lök in e, ngaich chöh haneūheu nômö yīö. Ngö ṙô pöri cha-a, Hö-ö in hòṅ lök in e.

¹⁷Ṙātö amahati chin tarik I kui yīö, öich ngö ṙô, Hangihtö-ṙô öp römpĕt! Ngö ṙô pöri cha-a, Hö-ö in hòṅ hangihtöre.

¹⁸Lökten hang Ō yī-ö pumnāmö tarik, akahalōn inrē, Ō yip ṙôngö tarik tölāinyngen cha min.

¹⁹Hangihtöre Ō tumlat; yĕh meuk, kētö tötlöök chin i kui vē tarik, öp ṙòng nup harunten cha, pò cha nö ötkūötenre tö në ṙô chu; ngam chöngö chu, sō-en e cha-a.

²⁰Chöngö tö yòh tötahūsa nö yih nö in chu nö ṙā-ang Sīpā, hēk lameuṅh nö ṙā-ang tömarôvat panam? Öt hō-ov nuk kahëtö meh töföngö, öt rēhĕn nup tökētu tö meh nö ṙāmölōn tī tö chu.

²¹Lökten an ngam Mā Tēv nö ngö ṙô: Yĕh meuk ṙātö kinvē-ĕre chin i kūö vē tarik kinvē-ĕre cha min; kumngöre tö yöng re, tö kūön re kikōnyö, aṅ ranghö tarik hol inrē min nö palā-aiṙen.

²²Ngö ṙô ngam Mā Tēv: Yĕh meuk, yih yip tarik löktö ap panam lā kapā, halöinylöre öp tökiröng pumnāmö tarik löklö ip tö marôvat alaha ngih tumlat.

²³Ṙapkö linreny re yip, vöi inrē, tötmilēḵ yip öt īnu inrē tö miṙēlōn, sā ṙô mai öp hināngô cha; i uk kōra yip, haṙāköre sā tarik kumyung, lā-al meh, Ō kikānö kūön Sīyôn!

²⁴Hang vine-eny in, kalöli në kël ih ngaich nö öt kalē-en; ngaich el ngam chanökö miṙivlōn īhö, chök sā kikānö kamyôḵ.

²⁵Uh yin chuh el kahôyö ui rēhĕn lök el talöökö; tön sanëtu ap tökunyaha elmat, keuheūtngöre lā-a öp pinhë-eṅkūö.

²⁶Ō kikānö kūön yip tarik chu, kafānöre tö sāk, pilönöre el tisum; sanòk sā i töhĕng maneuk kikōnyö nyīö, kalē-ĕṙô harāmöre; tön höng röt-ta yanīhih an ngam famël nö in hī.

²⁷Vīlen meh chin ngaich kamlah lanöökö töngëḵ chehen ane inrē kamlah öm i vē tarik chu hòṅ meh akahalōn kalah nup talöökö cha inrē.

²⁸Töngëḵ yin nö ṙòkhöre nö ma-ahôngen, havötköre nö kumtö vine-engnang; mās yin, vët inrē, ṙòkhöre yin nö chōichö la-en.

²⁹Kalē-ĕkūö an nö föö ngam fanöö kūö tameūyö, keuheūt ök nö ngaich pirum tökūö ngam tameūyö; chök alaha ngam mahalöök tit nöng iṙūöhen, pò ngam tötlöök nö öt kē-ĕyö.

³⁰Rupīö yin nö tö-sō-ovö tö ṙô, pò ngam Mā Tēv nö sō-en cha.