Read Car_Nicobarese YERIMIĀ 7 Bible Online

YERIMIĀ 7 - Car_Nicobarese bible

YERIMIĀ 7

¹Ngam ṙô yamih aṅ im Mā Tev nö löö in Yarimiā.

²Söklöre i kūö inkūp ngam patī ngam Mā Tēv, ngaich umuh ahangkö ngih ṙô, ngö ṙô, Hangihtöre tö ṙô ngam Mā Tēv ṙòkhöre yī-ö tarik aṅ Yūtā kumhĕthötre lökhöt i në inkūp öi vë-ekūö ngam Mā Tēv.

³Ngö ṙô An ngam Mā Tēv yip tömaṙôngö, ngam Tēv Israel, Halööktit nup talöököre yin nup la-en yīö inrē, ngaich hökngen yīö chū-ö min iyöng i ngih chūökö.

⁴Ui hayönglenre i në innyatkö el mat ṙô: töhet chūök ngam Mā Tāv ön ngih, töhet chūök ngam Mā Tēv, töhet chūök ngam Mā Tēv.

⁵Yē yīö kô-en halööktit nup talöökö nup lā-en yīö inrē, yē yīö kô-en in höö im töt michūṙen kinṙôka.

⁶Yē yīö öt hakihten aṅ tahëng, kūönyōich hēk tafiösi, hēk öt kitaknyö mahām töt akahaṙa i ngih chūökö, yē yīö inrē öt kiröönngöre tömrit tahëng tēv öi höng hachököre,

⁷Ngaich chū-ö min halöngten yīö iyöng i ngih chūökö, ing panam kahëtö chu in yik muvöhngö yīö nöng örheūheu.

⁸Yĕh meuk, ötkanôluṙô man i inyönglen re i minyôiny-aṅ ṙô.

⁹Hòṅ ulāya ömeh, kumpah tarik, asĕha, minyôiny-aṅ chūöku ṙô, föng tötahūsa i Pē-al, ngaich tömrit tahëng tēv nup tötmikahkūö meh;

¹⁰Ngaich yih söklöre inrē ikūö chu ël ngih patī, ngih tökaheūkö Tö minë-eny chu, ngaich ngö ṙô, Ṙānyu in! iṙūöhen la-evṙen tö në sin-òkūö?

¹¹Ngaich öng ngih patī, ngih tökaheūkö tö minë-eny chu, nö vītöre nö kinluhu tötūmu nö i mat yīö? Yĕh meuk, meūkö e chin chū-ö, ṙô ngam Mā Tēv.

¹²Kuṙòh chuh im chūök chu töngamuh öp Sailō misī, i chūök chu la-urĕh vīten ngam minë-eny chu nö iyöng, ngëichkö tī chu tö e inrē tökūö ötlanöökö yip tarik chu Israel.

¹³Ngaich töngamuh, kūö yīö ngaich la-evṙen tö në, ṙô ngam Mā Tēv, ngaich hē chu ötṙākôre vë-ekūö yīö hö-ö yī-ö hang, hē chu havëken yīö,

¹⁴Hö-ö yī-ö sap ṙô, Lökten chin min tinī-iv töng patī tö kaheūkö tö minë-eny chu ngam chūök yīö hayönglenre, im chūökö inrē kahëtö chu in yīö, in yik muvöhngö yīö inrē, sā tī chu tö Sailō.

¹⁵Kavalngen yīö chin min ṙā-ang i kūö chu, sā tī chu tö yik mah akalaha yīö ṙòkhöre yik kūön Ifrēm.

¹⁶Uh pöri yī-ö vë-elkui vē tarik, hēk hachônglö ṙô re havë-a, hēk ve-elkui cha, uh inrē ve-elkui cha in chu, tön rö-ö chin hangṙô yīö.

¹⁷Ötmeuk öyih tö tī cha i nup elpanam Yūta ël kanröönö Yērūsalem inrē?

¹⁸Hamūl ngòh yip nyīö, tōttökūö tameūyö yip muvöhngö cha, kirāich atta inrē yik kikānö nö ël tökachavu, nö vī pikoh nyā-aṅ öp kikānö rācha ngam halīöngö; asënyö tö-ôkö cha-a inrē tökētu nö i tahëng tēv, nö harunnyö lanīnö chu.

¹⁹Chū-ö öichu töharunnyu lanīnö tö cha? Ṙô ngam Mā Tēv. Röh aich nöng acha-a, nöng kalūöch elkui re?

²⁰Lökten ön nö ngö ṙô ngam Mā Tēv: Yĕh meuk, ṙöhtö ngam lanīnöre chin tanānyö chu inrē ikui ngih chūökö, ikui tarik, töṙeūla inrē, ikui chōng elkahôyö ikui ṙòng aṅ ngih tumlat inrē; hūkūö öp min öthannyangngenkūö.

²¹Ngö ṙô An ngam Mā Tēv yip tömaṙôngö, ngam Tēv Israel: Ṙūöhten nup töföngö man tökētu i nup kahëtö meh, ngaich kā öp alaha.

²²Pòn ik sakāmö hē chu kēnyen cha ṙā-ang öp panam Aikup, öt vë-ekūö yik muvöhngö cha chū-ö, hēk tölṙôcha tö inlahen töföngö tökētu in nup tökētu inrē.

²³Ngih pöri chöngö kahëtö chu in cha, Hang ṙô chu, ngach Tēv yīö chū-ö min, ngaich yī-ö min tarik chu; lök ël nup talöökö chu inrē tinölô yīö tö chu, hòṅ yīö lööken in re.

²⁴Hö-ö pöri cha-a nö hang hēk asītö elnang re, lök i lōn re pöri i nganë-eṅ tötlöök lōn cha inrē, ngaich heūlrit re öt kū-ö tö lā-urĕh.

²⁵Löktökūö ök sakāmö yik muvöhngö yīö nö kunyī-iny re nö ṙā-ang öp panam Aikup söl ing töngamuh, öich höng iṙūöhen tīntö yip tarik re pròfĕt nö in cha, kaheuk sakāmö;

²⁶Sönngenre cha-a nö öt hang ṙô chu, hēk asītö elnang re, hangëṅ-eng likeun re pöri cha-a. Höichngen yin tö yik muvöhngö re.

²⁷Lökten man ṙô tö në ṙô in cha, hö-ö pöri min cha-a nö hangṙô meh. Havëten cha min me-eṅ, hö-ö pöri min cha-a nö sapṙô meh.

²⁸Ngö ṙô min me-eṅ tö cha, Angū-ö ön ngih pumnāmö tarik töt hamang ṙô ngam Mā Tēv ngam Tēv cha, rö-ö inrē nö hō nö vëka; falāliyö öknö ngaich kanô-en; ngaich ök nö ṙöökiṙen nö i minuh cha.

²⁹Kamöpngö keūyö re yin kavalngö e ngaich; harāmöre pōitô ikui minë rung töngāsökui, pò ngam Mā Tēv nö sō-en ane inrē ṙāngen ngam tumköl chap nö i lanīnöre.

³⁰Pò vē kikōnyö kūön Yūtā nö ötlöökö la-en nö ikūö chu, ṙô ngam Mā Tēv; asöklö sin-òkkūö yinnö ël ngam patī ngam tökaheūkö tö minë-eny chu, nö hachōichngö e.

³¹Vīlö chūök yin nö lātulöng i Tōfĕt, öp el achāṙö öp kikōnyö kūön Hinnôm nö föng kikōnyö kūön re kikānö kūön re inrē nö i kūö tameūyö; ngam töt chöngö chu, öt rēhĕn nö yamih nö ellōn chu.

³²Lökten yĕh meuk, yih nup sakāmö, ṙô ngam Mā Tēv, ip hē Tōfĕt nö ötngöhöre invëka, hēk achāṙö öp kikōnyö kūön Hinnôm achāṙö chūök finëlhanga pöri: pò cha min nö lāpngöre nö i Tōfĕt, pòn ötchūöku i tahëngngöre chūök.

³³Ngaich min nup tökapah alaha vē tarik nö nya-aṅkūö nup chehechōn ël kuföt, nup töṙeūla inrē el tumlat; ngaich öt hĕng tak min ma-ahōngen u.

³⁴Vīten ṙānāmölōn ṙô chin min nö ṙā-ang re nö i nup elpanam i Yūtā el kanröönö Yērusalem inrē, ṙô kikōnyö töhapīhö kikānö tö hapīhö inrē; pò ngam panam min nö öt aṅhavkūö.