Read Car_Nicobarese YERIMIĀ 8 Bible Online

YERIMIĀ 8 - Car_Nicobarese bible

YERIMIĀ 8

¹Ip hē e, ṙô ngam Mā Tēv, nup tangëḵ yip rācha aṅ Yūtā, tangëḵ yip kūön rācha e, tangëḵ yik kūönṙô tangëḵ yip pròfĕt, tangëḵ yip aṅ Yērusalem inrē min nö kēnyu nö ṙā-ang ëlnup anūlö u,

²Ngaich anū-ö min nö pirātö nö i kūö ngam tavūöi töngam chingëṅt tö nup tömaṙôgö inrē aṅ el halīögö nup lahök la-en cha nö hāngenlōn, nup tö tömörit tö cha nup töchöhö tö cha inrē nö vë-evkūö: hö-ö anū-ö min inrē nö vë-evkūö: hö-ö anū-ö min inrē nö hamūlö hēk ulīya; sā sôḵ nuā nup min nö i kūö ngam tumlat.

³Lahëlōn yip tö ōtren min tö kinpaha yip aṅ ngih tötlöök mupīhö i nup chūök cha min nö ahōṙiyö tö chu, ṙô ngam Mā Tēv yip tömaṙôngö.

⁴Ngö ṙô min me-eṅ tö cha, Ngö ṙô An ngam Mā Tēv: Hē tarik nö fukngö röh yip cha-a nö choholre nö hēk? Yĕn hĕng tak mahavööngökūöre, hö-ö hòng anga-aṅ nö havantöre?

⁵Kūöyòh aich vē tarik nö havööngökūöre nöng iṙūöhen nö heūlritre? Haköptīre yin tö inchīlö, sōḵ yin nö havantöre.

⁶Hangihtöre chin hang inrē, hö-ö pöri cha-a nö chīpö ṙô; öt tarīku mahavöötö ellōn re tö tötlöök la-en re, ngö ṙô, Asuh ap fālen chu, Kö havööngö kūöre yin nö i talöököre, sā kōra kum-mööyöre nö i kinyūngö.

⁷Pòrô nup Istòk chehechōn el minë halīöngö sön nö akahakūö tö ṙētak re; nyö-öṅ inrē, likup, krēn chehechōn inrē haköp ṙētak re nö yih; öt akahakūö pöri vē tarik chu tö chöngö ngam Mā Tēv.

⁸Sitih kanô-òṅ öm ngö ṙô, Akaha, in īhö, in ih an inrē ngam chöngö ngam Mā Tēv? Yĕh meuk, vī e pöri nö minyôiny-aṅ ngam töminyôiny-aṅ kanūch yip kamūich.

⁹Sumrōngikūö yip min tö akahaṙa tarik, ngangngökūö yip min kē-ĕ inrē; yĕh meuk, tö cha nö sō-o ṙô ngam Mā Tēv, asuh ap mikah in cha?

¹⁰Lökten chin min kētö yip pīhö cha nö i tahëng nup taṙeūḵ cha inrē in yip tö-mihôiṅ, pòn löktökūö tökūöṅnö söl i tökiröng öp yanālö tömichūṙen taneūngen; löktökūö pròfĕt söl i kūönṙô ṙòkhöre nö kēken michūṙen.

¹¹Hönghöhen tī yip nö halanken innyahkö vē tarik chu, ngö ṙô, Lām, lām, yĕn rö-ö nö lanāmuvö nö umuh.

¹²Sirōngkūö aich cha-a hē cha nö kēken sin-òkkūö? Hö-ö, öt sinrōngukūö yin; hö-ö yin nö akahakūö tö miṙē-ĕv. Lökten yin min nö fukngö nö in yip töfukngö; kavāli yin min, hē chu sācha tī tö cha, ṙô ngam Mā Tēv.

¹³Hē chu min hòṅ hamūlö cha, ṙô ngam Mā Tēv, öt ṙôngu min ngam vāin nö i rōi re, ötrēhĕn anychīr nö ṙôngu nö i rōi ngam anychīr chōn; nyangngö rōi chuhngöre nö ṙā-ang in cha inrē nup tö-kētu tö chu nö in cha.

¹⁴Kūöyòh öi ayī-ö öt halöinyköre höng ūichhakṙen? Hamūlöre yin, tā-a töi kuhēthöre i nup elpanam töchūöku kumyūnglö, ngaich umuh öi kapah; pò ngam Mā Tēv ngam Tēv hī nö kētö kui hī tö kinpaha ane inrē kē-ĕkūö hī öi òk mak tökapahhukūö; pò hī köölö fālen im Mā Tēv.

¹⁵Meūkken lanāmö in, öt tölöökuvö pöri yamih, öp hē inlanken, yĕh meuk pöri, pinhë-eṅkūö.

¹⁶Hāngö ṙô nup kōra cha nö hangòs nö löktö Tën; i ṙô nup kōiny kōra cha nö më-a keuheūtlöre ngih panam nö kayīna. Yih yip nö ngeūṅktö ngam panam tö nup tanööḵöl e inrē, ngam elpanam tö yip aṅ e inrē.

¹⁷Yĕh meuk, pò chu tīntö pēch in yīö, pēch tökapahhukūö töt hanlēmen, ngaich anū-ö min nö kāpö yīö, ṙô ngam Mā Tēv.

¹⁸Öt hanlanken an ngam miṙivlōn chu, vahavö fanöinylö chu nö ellōn chu.

¹⁹Hang, tö ṙô öp kikānö kūön yip tarik chu löktökūö rôta, ṙôkti ngam panam inrē: Hö-ö öng ngam Mā Tēv nö i Sīyôn? Hö-ö öp rācha nö in e? Kūöyòh yip nö harunnyö lanīnö chu tönup töka-īpö insā tēv cha, nup aṅ tahëng insā tēv cha inrē?

²⁰Ngaich ök hē inmūlòng, keuheūt ök nö ngaich sikehngö, ngaich rö-ö ayī-ö hayöökaṙen.

²¹Pò öp nyāha öp kikānö kūön yip tarik nö nyahā ngam fanöinylö chu, Haṙivlōn chin, kē-ĕ chu an inrē ngam nganangngökūö chu.

²²Öt sanôhòvkūö vah hòng i Kilīöt? Öt lamë-en vah vö hòng umuh? Ngaich kūöyòh ngam lanööken ap kikānö kūön yip tarik chu nö öthavantu?