Read Car_Nicobarese YERIMIĀ 9 Bible Online

YERIMIĀ 9 - Car_Nicobarese bible

YERIMIĀ 9

¹Ō mak an öre ngam elkui chu, löklö mak mat inrē në mat chu, hòṅ chu peuny yik töfëli aṅ in ök kikanö kūön yip tarik chu tö sakāmö hatööm inrē!

²I kuyāyö tönyalnyi öp öre chūök inchūöklö töng kumröön tarik, hòṅ chu ṙāngö vē tarik re ngaich kiröönngöre tö cha! Pò cha nö ṙòkhöre nöng ma-asĕha, manūlö tarik tömichūḵ chanökhuṙen.

³Sōntö litāk re yin sā linreny; sīöplö minyôiny-aṅ nö kalēḵ im panam ngaich rö-ö kanô-en; pò cha nö löktökūö im tötlöök nö im tötlöök, ngaich rö-ö cha-a nö akahakūö tö chu, ṙô ngam Mā Tēv.

⁴Kö haṙēmngenre yin yēḵ tö aṅ ranghöre, ui hayönglenre inrē i mëm, kahëm re; pò vē mëm kahëm nö kamil chūök holre, vē aṅ ranghö inrē nö mahavöt vamë-eng nang.

⁵Kö mahachīl yin vē aṅ ranghö, öt hĕng tak tö ṙô tökanô-en; haköptö litāk re yin nö ṙôtö minyôiny-aṅ; lūölken ötlanöökö yin ngaich yaha chanëyö nö havöötö ellōn re.

⁶Afônglö inkihten yin nö i kui inkihten michīl inrē nö i kui michīl, sōḵ yin nö akahakūö tö chu, ṙô ngam Mā Tēv.

⁷Lökten ngam Mā Tēv yip tömaṙôngö nö ngö ṙô: Yĕh meuk, Halööktit cha chin min kalaha cha inrē, suh ṙöng ap tahëng tī chu kô tö kūö tö vē tarik chu?

⁸Chòk an ngam litāk cha tökapahukūö; minyôiny-aṅ ṙô ana kö elvāng re yin nö lāmöṙô nö ve-ekūö aṅ ranghöre, ellōnre pöri anga-aṅ nö halēnlö inyun ò.

⁹Uh öichu sācha tī tö cha tökūö në? Ṙô ngam Mā Tēv; uh öichu inrē havahalvah re i pumnāmö tarik tö ngatī?

¹⁰Yĕh peuiny haram minë rôngö inrē, inrāmöre tökūö minë kiyôp el tönyalnyi el inchōn, pò u nö ahātiyö pòn sōtu nö hĕng tak lamök umuh öt hāngö ṙô inrē nup nuā nö mū-a; hĕnghöre chehechōn elkuföt, töṙeūla inrē ngaich nö falngö re nö kiröönngöre.

¹¹Vīten Yērusalem chin min nö fanôngö tinṙöltit, chūök am aṅ el inchōn; vīten nup elpanam Yūtā chin min inrē nö töt aṅhaṅvkūö, öt iyöngö tö tarik.

¹²Achiāp tarik tö yahlö mikah töp lökten ò nö kô nö akaha elmat tö ngih? In chīö öng ngam elvāng ngam Mā Tēv nö ṙô-òv, hòṅ ò yēḵ nö ve-eny e? Kūöyòh öng ngam panam nö payāyi ahāti inrē sā tö nyalnyi el inchōn, tö lökten nö öthĕng tak lamök muh?

¹³Ngö ṙô ngaich ngam Mā Tēv: Pò cha nö ṙāngö ngam chöngö chu ngam ṙahātö chu i kūö cha, rö-ö inrē nö hang ṙô chu, hēk öt lök i talöökö e,

¹⁴Ngaich pöri nö hangë-eng ellōn re nö tömrit ellōn re ngaich nö tömrit Pē-al sā inköptö cha tö yik muvöhngö cha.

¹⁵Lökten ngam Mā Tēv yip tömaṙôngö, ngam Tēv Israel nö ngö ṙô: Yĕh meuk, ha-aṅhal vē tarik chin min tö tö-angū-öṅvö chōn, kē-ĕkūö cha inrē tö mak tökapahukūö nö òk.

¹⁶Pirātngen cha chin min i pumnāmö tarik yip töt rēhĕn nö mikahkūö cha öt rēhĕn nö mikahkūö yip muvöhngö cha; tīnngö ngam sanët chū-ö min inrē nö unôichrit cha, hanöng saha chu keuheūt tö cha.

¹⁷Ngö ṙô an ngam Mā Tēv yip tömaṙôngö: Ngëicha, havëtö yip kikānö nö yih nö im miṙivlōn lukken yip töhuveū-en kikānö nö yih;

¹⁸Hökngen cha nö kurāten nö pōitô nö harāmö hī, hòṅ në mat hī nö hëmnyi mak mat, në tasēu mat hī inrē nö pòpnyi aṅ tö mak.

¹⁹Tön hāngö ṙô öp inrāmöre nö löktö i Sīyôn: yöng tinṙōlngö hī! Sirōngkūö takô in ngaich, pò hī ṙāngö ngam panam re, pò cha nö tiṙölngö nup chūök hī.

²⁰Hangihtöre, Ō yī-ö kikānö, tö ṙô ngam Mā Tēv, hökngen ngam elnang yīö nö kē ngam ṙô aṅ elvāng ò; haköp tö yip kūön re yin kikānö tö inrāmöre, kö haköptö yip aṅ ranghö re tö tinkökö lināpö.

²¹Tön yih an ngam kinpaha nö lökhöt inkūp kuföt ngaich an nö kuhēthötre nö el pati rācha hī, rökngen yip nyīö nö el kanröönö, yip ṙāl tarik inrē el talöökö.

²²Ṙò-òv, Ngö ṙô An ngam Mā Tēv: Fukngö nup min alaha tökapah tarik nö el kahôyö sā sôḵ nuā, sā rōi sāiny tö kinheūten yip mu-uvôhòl, ngaich öt hĕng tak min mahamūlö u.

²³Ngö ṙô An ngam Mā Tēv: Un eū-eure ngam tö-akaha tarik nö i mikah re, un eū-eure ngam tökalēḵ tarik nö i kumlēḵ re, Un eū-eure ngam tökôlò tarik nö i kanôlò re;

²⁴Hökngen ò pöri ngam ameū-eure nö eū-eure nö i ngih, tö ò nö akaha elmat akahakūö inrē tö chu, tö chu öich chū-ö Mā Tēv maharūnöre i tököp hanāngenlōn, öt michūḵṙen kinṙôka, lanöökö inrē ing tumlat; pò chu in në kumchiklōn, ṙô ngam Mā Tēv.

²⁵Yĕh meuk, yih nup sakāmö, ṙô ngam Mā Tēv hē chu min sācha tī tö cha nö ṙòkhöre yip tötunyīnyi, ṙòngmöng öt tunyī-nyi pöri

²⁶Aikup, Yūtā, Itöm, yip kikōnyö kūön Amön, Mō-ap, ṙòkhöre inrē yip mi-iyöng el kuyāyö tönyalnyi yip kammöpngö keūyöre i lā taseū re kui: pòn ṙòkhöre vē pumnāmö tarik nö öttunyīnyi, ṙòkhöre inrē nup patī Israel nö öt tunyīnyi ellōn.