Read Car_Nicobarese INRĀMÖRE 1 Bible Online

INRĀMÖRE 1 - Car_Nicobarese bible

INRĀMÖRE 1

¹Yöng chanëvö ngih elpanam nö ūichhak ngih tötööḵlö tö tarik sin! Sitih öng nö vītöre nö sā tafīösi, ngam tökiröng sin nö in në pumnāmö tarik! Anga-aṅ ngam kūön Rānī sin nö i në elpanam vītöre ngaich nö aṅ el katòh.

²Kihīökkūö an nö peuiny tö el hatööm, i arëkūö nup mak mat ò: i tum tak yip töhāngenlōn tö ò öt hĕng tak mahaṙamkölōn anga-aṅ; ṙòkhöre yip hol ò nö michūṙen chanökhuṙen tö ò, vītöre yik nö tökunyaha elmat tö ò.

³Ngaich ök Yūtā nö chuh el inhötngö tökūö kanihngen kūö tö kihngen inköhngen inrē; ngaich an töngamuh nö iyöng in yip pumnāmö tarik, hö-ö pöri nö kôtökūö tö chūök haneūheu; kôlö yip lamū an nö in ò nö ellōn nup kanihngen ò.

⁴Haṙivlōn nun në talöökö tö kū-ötö Sīyôn, pòn öt hĕng ak yamih nö i nup töhakāmi tökirög nyinā-aṅ; ṙòkhöre në inkūp ò nö öt aṅhaṅvkūö alūhure yip kūönṙô ò; tūökiyö yik aṅ in ò rēlö, ngaich anga-aṅ inrē nö kiröngen kanihngen.

⁵Mā yik lā-al ò nö ngaich, kôlò yip tökunyaha elmat tö ò, pò ngam Mā Tēv nö vīten ò nö kihngen kūö töpōyen tanôichngen ò; ngaich yik kūön ò nö kiröönngöre, urēhĕkūö öp lā-al re nö hakövö.

⁶Ṙā-ang im kikānö kūön Sīyôn nö ngaich nup minā-aṅ ò. Vītöre yip kūön rācha ò nö sā hāt öp tötkôtökūö tö kiyôp; falngö re ngaich anū-ö nö öt kalē-en nö i kūö yip lamū-u-re.

⁷Köpölōn an Yērusalem tö nuk sakāmö kanihngen ò tö inngū-öṅ inrē tönuk töpōi ṙāi chehen ò nuk mī-in ò nö löktökūö i nuk hötṙeh sakāmö. Hē yik tarik ò nö fuk eltī ök lā-alre, ngaich öt hĕng tak umuh nö holṙen ò, ṙamngö vah ò ngaich ök lā-al ò,hayëḵngen fanukngö ò.

⁸Pōi hangṙen an Yērusalem nö köölö fālen, lökten an nö vītöre nö mum; ṙòkhöre yip ameū an nö hayëngen ò, pò cha nö meūkan nö chumlal; hôṅ, alūhure ana, hapungngökūö inrē.

⁹Māichngö nun minë kinfan ò tötöng yô-òv; ötlōnu an tö chanuhngenre; lökten an nö pōi hangṙen nö im fanukngöre, hö-ö an nö mahaṙamkulōn. Ō Mā Tēv, meuk kanihngen chu, tön mihôiṅ an ngam lā-al chu!

¹⁰Hateutnyökëlre an ngam lā-al ò nö i kui nup töpōi ṙāi chehen ò; hôṅ, meuk vē pumnāmö tarik an nö havīlö ngam töhet chūök ò, cha-a yip tösōtu tö meh nö kuhēthötre nö in yip ṙôngö meh.

¹¹Ṙòkhöre yip tarik ò nö alūhure hē cha nö chöh nyā-aṅkūöre, inyihngö chehen re yip tö töpōi ṙāi nö ṙāi nyā-aṅkūö pò cha nö hòṅ kalēḵ. Ngëicha, Ō Mā Tēv, meuk inrē tön ha-āchīṙen chin.

¹²Öt lökngöre öi yī-ö, ṙòkhöre yī-ö lamök ngö umuh? Ngëicha meuk inrē yĕn tö ngatī-iv miṙivlōn nö sā miṙivlōn chu ngam tökētu nö i kui chu, ngam tī ngam Mā Tēv ik sakāmö tökiröng tanānyö ò.

¹³Tīntö tameūyö anga-aṅ nö ṙā-ang lātulöng, löö i në tangëk chu tī anga-aṅ tö e; haṙĕhnyö inhāṅl röön chu anga-aṅ; havöökūö chu anga-aṅ; ṙāngen chu anga-aṅ sangūli, takngö irô-òtö sakāmö.

¹⁴Nyëktu nup tanôichngen chu nö i kaneun; aṅtī tö kuntī re anga-aṅ nö haköpngö u; hakeunlöngö nup nö i likeun chu; vīten ök kumlēḵ chu anga-aṅ nö hö-öv; kēten chu an ngam eltī cha yip töt kanô-òṅ chu.

¹⁵Hayëḵngen yip tökalēḵ tarik chu an ngam Mā nö ṙòkhöre nö harònglö tīre nö in chu; havëtö manūlö an nö lā-al chu nö kirāchngö yip ṙālö tarik chu; ngaich yik rēlö kikānö kūön Yūtā nö röönö tö ngam Mā nö el chūök kinrān vāin.

¹⁶Kūö u chin peuiny; hëmö mak mat chin; pò ök mahaṙamkölōn chu nö marôvat tö chu; öp töhĕng tak mahangëḵlö kumlēḵ chu; kayööyaṙen yip kūön chu, pòn mihôiṅ nö ngaich ngam tökunyaha elmat.

¹⁷Silônyö këlre an Sīyôn, öt hĕng tak pöri mahaṙamkölōn ò; chöngu an ngam Mā Tēv nö lā-al Yāköp nö hōten yip ranghö ò nö lā-al ò; ngaich an Yērusalem nö vītöre nö mum nö in cha.

¹⁸Lā i huneū-eu an ngam Mā Tēv, pò chu ahôngen ṙô; hang pöri, ṙòkhöre yī-ö tarik, ngëichkö kanihngen chu inrē; ngaich yik rēlö chu yik ṙālö tarik chu inrē nö chuh el inkövö.

¹⁹Havëkö yip hanāngenre chin hachīlö chu pöri cha-a; lëlngö nö im elpanam yik kūönṙô chu mā chu inrē,I saha cha nö chöh nya-aṅkūöre nö hangëḵlö kumlēḵre.

²⁰Yĕh meuk, Ō Mā Tēv tö chu el kanihngen, el tinṙōlen inrē ngih nômö chu, kicheūchö öp fanöinylö chu nö ellōn chu, pò chu öich kiröngö minôṙô. Kētö miṙivlōn ap sanët nö el kanröönö; sā kinpaha angū-ö nö el patī.

²¹Hang inlūhu chu; öt hĕng tak umuh mahaṙamkölōn chu. Ṙòkhöre yip tökunyaha elmat tö chu nö hang kanihngen chu; ṙāmölōn cha-a tö meh tīten e. Kētöp sakāmö man öp vahë-eny meh, ngaich hökngen cha nö sā chu.

²²Hökngen nup tötlöök la-en cha nö yih nö i kūö meh; lök alaha cha inrē sā meh lök alaha chu; kūö nuk tanôichngen chu; pōyen nup inlūhu chu ngaich chū-ö cheingö fanöinylö.