Read Car_Nicobarese INRĀMÖRE 2 Bible Online

INRĀMÖRE 2 - Car_Nicobarese bible

INRĀMÖRE 2

¹Yöng tī ngam Mā i tanānyö ò nö ṙātö ngam kikānö kūön nö el katòh taṙul! Löktö el halīöngö tī an nö suktö ngam tövai aṅ in Israel nö el tumlat; hö-ö an nö köpölōn tö ngam ranöönö röönre hē öp sakāmö ò.

²Öt aṙē-ĕlōn an ngam Mā nö piyāingö nup elyöngö Yāköp; i lanīnöre an nö tiṙölngö nup töngëḵ chūök ngam kikānö kūön Yūtā; tiṙölngö ngam pūlngö an nö haṙongtu nö i kui tumlat töyip mahayöngan inrē nö miṙē-ĕyö.

³I tanānyöre an nö fangngö yip tökalēḵ in Israel; kēngö ngam këlre an lāhāmö nö ṙā-ang in cha i kūö ap lā-al ò; ökngö ap lā-al ò; ökngö tī an sā kūö töhūkūö tameūyö nö in Yāköp vinngö ngaich nö ṙāpngö.

⁴Sōntö linrenyre an sā tökunyaha elmat, ūichhaka an sā lā-al holtö ngam lāhāmö këlre; ngāichövah tī an inrē nö fëlngö inkeūṙö në mat hī el rūkui öp kikānö kūön Siyôn; sā tameūyö tī an nö hōngnyö ngam tanany elmat re.

⁵Ngaich an ngam Mā nö vītöre nö sā tökuyaha elmat, ngaich an nö fëlngen Israel; keuheūtngöre nuk patī rācha nö tiṙōli tö ò, nuk töngëḵ chūök piyāyi nö tiṙōli; ngaich anga-aṅ inrē nö ṙūölö ṙôken miṙivlōn inrāmöre inrē in ngam kikānö kūön Yūtā.

⁶Tiṙōlngö öp sanrā ò an nö ngaich sā tinṙōlngö panô-òṅ, nö tiṙöliyö ip chūök öp töhakāmi tökiröng nyinā-aṅ; kētö öp manāngen an ngam Mā Tēv nö i Sīyôn öp töhakāmi tökröng nyinā-aṅ anôilö inrē, ngaich i tökiröng tanānyöre anga-aṅ nö röönngö rācha kūönṙô inrē.

⁷Ngaich an ngam Mā nö minūöṙô tö ngam tahāklö ò, öt hòṅ chūöku an nö ngaich tö töhet; ngaich an nö kētö eltī ngam tökunyaha elmat tö minë kinlōngö patī rācha ò; el patī ngam Mā Tēv ngaich öp ṙô tökunyahalōn nö sā hē sakāmö öp töhakāmi tökiröng nyinā-aṅ.

⁸Kalē-ĕlōn an ngam Mā Tēv nö tiṙölngö ngam kinlōngö ngam kikānö kūön Sīyôn; mikahngö e an nö ngaich nö aṅtī tö tökuvaha; öt ma-īṅ kël re an nö im pinyāihānga; hōnyô kinlōngö an nö haramöre tö nup talöökö i kui kinlōngö inrē, holre anū-ö nö öt ngëḵngöre.

⁹Chalipköti nup inkūp e nö el tumlat; likölngö nuk inkālkūö anga-aṅ nö piyāyi; öp rācha ò tö yip kūön rācha inrē mūlngö nö in yip pumnamö tarik; öt ōtren ngam chöngö, hö-ö yip pròfĕt ò nö meuk aṅ i ngam Mā Tēv.

¹⁰Ūichhak yip maṙöinylö kikānö kūön Sīyôn nö el tumlat nöng öt ṙô-òvö; tūi kuire cha-a inrē tö tumlat hayūtöre inrē tö sāk; sōntö kui re nö el tumlat yip rēlö aṅ Yērusalem.

¹¹Cheingö në mat chu tökūö pineūinyö; kalūöchöre ngih ellōn chu; keuheūtnyöre nup ellōn chu nö hōngnyu i miṙivlōn tökūö finëlngö ngam kikānö kūön yip tarik chu, kūö yip tëṅnö nyīö inrē el talöökö ngam el panam nö takngö.

¹²Peuinyhökūö yip yöng re cha-a yöngnyīö, Isuāp nyā-aṅkūö vāin inrē? Isaha cha nö takngö sā tarik töhanyahka el minë talöökö ngam elpanam, hē öp nômö cha nö hòṅ ngaichngen nö elngòh yip yöng cha yöngyīö.

¹³Sitih ṙô öich kô-òren tö meh, sitih tī asāngen meh, ō me-eṅ kikānö kūön Yērusalem? Sitih tī öich kô asāngen meh,hòṅ chu haṙamkölōn meh Ō Me-eṅ tötchô-òv rēlö kūön Sīyôn? Pòn sā ṙôkti ngam mai ngam pinyāingö meh; chiāp tökô nö havanlen meh?

¹⁴Meuk minyôiny-aṅ yip pròfĕt yīö inchīl elmat inrē tömeūkö; hö-ö yip nö hameuk tö öt lanöökö yīö hòn havanten yīö öre i kanòlò yīö, meuk töminyôiny-aṅ pöri cha-a tömeūkö inlō-ongkūö inrē.

¹⁵Ṙòkhöre ngaich lamök im talöökö nö fatah eltī re nö in yiö hishanga cha-a kileugkuire inrē nö im kikānö kūön Yērusalem; Angū-ö öng ngih elpanam ngam töhavëka nö töteungten vanāyö ṙanāmölōn në taṙòkhöre panam?

¹⁶Ṙòkhöre yip lā-al meh nö hayëṙôre; tö meh hishanga yip, kap kui kanapre yip, hū-a yip: Ngāichö vahtī in piyāingen ò? Ahöö, angū-ö ön ngih sakāmö maheūkkö hī; ngaich in īnu tö e meūkö e in!

¹⁷Ngaich tī an ngam Mā Tēv im chööḵnyö ò, hateungngö ngam inngāṅngö an; halēnlö e an nö marô-òten misī, öt aṙē-ĕlōn an nö tiṙölhanga; ṙāmölōn tī an nö ngaich tö ngam tökunyaha elmat tö meh, ngaich nö hapōilö minhôṅyö më lā-al meh.

¹⁸Pōitô havëkö ngam Mā! Ō me-eṅ kikānö kūön Sīyôn! hökngen nup mak mat nö reūti hatööm sakāmö inrē nö sā töveut mak! Uh me-eṅ heūheure, un haneūheuvö minë mat meh!

¹⁹Choholre, peuiny tö hatööm raneh tökūö inahati! Sā maktī ṙöhnyö ngam ellōnre i kūö ngam Mā! Hachônglö këlre in ò tökūö unhômö yip kūön meh, yip tötakngö nö aheuk nö keuheūt kui talöökö.

²⁰Ō Mā TĒv, ngëicha meuk inrē! In chīö tī öm ngatī tī? Kāḵ kūönre yip min kikānö, yip nyīö hanāngen cha nö harūkö? Fëli hòng kūönṙô pròfĕt inrē, nö el ngam töhet chūök ngam Mā?

²¹El pitung minë talöökö hulalhakṙen tö-a-yal tököiny inrē; yip rēlö chu ṙālö tarik chu inrē fukngö nö ngaich nö i kūö sanët; im sakāmö tanānyö meh öm fëlngen cha ngaich, öt miṙē-ĕvlōn tī fëlhanga.

²²Ngaich man ngöönten ih im sakāmö ngam töhakāmi tökiröng nyinā-aṅ keuheūtngöre lā-al nö pinhë-eṅkūö chu; im sakāmö tanānyö ngam Mā Tēv inrē öt hĕng tak tötkô-òngvah hēk tö-aṅ; cha-a yik tökëmö tö chu harūkö inrē fëliyö ngaich tö ngam tökunyaha elmat tö chu.