Read Car_Nicobarese INRĀMÖRE 4 Bible Online

INRĀMÖRE 4 - Car_Nicobarese bible

INRĀMÖRE 4

¹Sītih öng ngam humlum nö paheumngöre elmat, ngam töhet humlum nö haṙī-ingre! Minë töhet ihong parāta nö hulalhaka nö kö I kui kanröönö.

²Më töpōiṙāi kikōnyö kūön Sīyôn, sā lumnganre ṙāi nö i töpahīöya humlum, sitih ön nö kaheuktu nöng sā tilin tanīöyö, vahī kuntī vamī tanīöyö!

³Rēhĕn nup chakāl nö kētö tehre hapōḵ kūönre inrē, ngaich pöri ök kikānö kūön yip tarik chu nö vītöre nö öt milēḵ, sā nup ôsrich el inchōn tönyalnyi.

⁴Tanlö an ngam litāk nö el mirālö elvāng ngam töharūkö tökūö inṙëhe nômö; icheūkö nyā-aṅkūöre nyīö, öthĕng tak pöri kamë-eṅkūö cha.

⁵Cha-a yip nya-mā-aṅvkūö tö tökuchik lëlngö nö el talöökö; cha-a yip töharuklöng nö hilā tö tö-amëla töhuṙing hulalhaka nö fônghak i kui tisum.

⁶Pò ngam chinökṙen ap kikānö kūön yip tarik chu nö kiröng tö sācha Sôtöm, ök töng öt rô-òtuṙen tinṙölngö, öt lūöltöre eltī nö in e.

⁷Het yik kūön rācha e tö tökënngöre tacham, isoh tö aṅteh; yahlö tunrëṙö nuk alaha cha tö ṙòng ihong, sā töpōi ṙāi ihong vanāyö sanökö cha.

⁸Mötlö sanaha kūö töngamuh tö sanaha ṙòng tanīöyö, öt akaha elmat tö cha nö el talöökö; nyichtöre nup uk alaha cha nö i tangëḵ cha vītöre nup nö sā tönyô chōn.

⁹Ṙāmölōn yip pôḵ sanët nö mötlö tö yip pôḵ kinpahare, yip tölëvngö chök tökūö törö-ö ṙòng aṅ ngam kahôyö.

¹⁰Ngaich nup kël yip tö-aṙē-ĕlōn kikānö nö sum yip kūönre; vītöre cha-a nö nyā-aṅkūö cha i finëlngö ngam kikānö kūön yip tarik chu.

¹¹Hateungngö lanīnöre an ngam Mā Tēv, ṙösnyö ngam töṙāch an nö ngaich tanānyöre; tōttökūö tameūyö an inrē nö i Sīyôn, öp töṙāpngökūö tö rööntö machööḵlö e.

¹²Hö-ö yip rācha ngih tumlat nö ṙātö ellōn re, hēk yip aṅ ngam panam, tö ngam lāḵlö hēk tökunyaha elmat nö kuhēthötre nö el inkūp Yērusalem.

¹³Kūö tökööl yik pròfĕt ò an angū-ö öt lanöökö yip kūönṙô ò inrē yik kumtaknyö mahām tölöök tarik nö ellōn ò.

¹⁴Karööna cha-a, öt meuk, lök el nup talöökö töhachōchi tö mahām lökten nö öt kô nö hĕng tak lamūölkö hilā cha.

¹⁵Kē-ĕngre! Tökuvīö ṙô yip tarik tö cha; Kē-ĕngre! Kē-ĕngre! Un lūöla! Lökten cha nö töng atēṙa tö karööna inrē; ngö ṙô tarik in yip pumnāmö tarik, Hö-ö yip nö ngöhören nö iyöng in hī.

¹⁶Kahang tīre an ngam Mā Tēv nö pirātngen cha, hö-ö an min nö ngöhören chumkūöṙen tö cha; Öt hameuktu ineū-eu yip kūönṙô, öthanāngenvö in yip mā.

¹⁷Chëyö mat in ngaich örheūheu höngkö tötöl hinòlṙen; im hinöönga tö hī höngkökūö pumnāmö tarik ayī-ö öp tötkô nö hayööken hī.

¹⁸Kisimröön hī yip tarik lökten hi ötkô lök el nup talöököre; röhta manāngen in; kaheūkö nuk nö ngaich sakāmö hī: pò öp manāngen hī nö ngaich nö yih.

¹⁹Veut yip lamū-u hī tö nup matēṙö el taṙul; lū-u in tö cha i kui rôngö, hayūnö hī yip nö el-inchōn.

²⁰Nup unhômö elmeh hī, ngam töhachāmö kui tö ngam Mā Tēv, nö kētu nö el anūlö cha, anga-aṅ ngam ṙô hī ṙung, Iyöng elkatòh sanëôk ò in min in yip pumnāmö tarik.

²¹Haṙamlōnre ṙāmölōn inrē, Ō kikānö kūön Ētöm, mi-iyöng ip panam Us; söömhukūö pöri me-eṅ min tö ngam chūök òk; hiyōi man min ṙòngngö inyut re inrē öm chumlal.

²²Sācha öt lanöökö meh an, Ō kikānö kūön Sīyôn, teungtökūö nö ngaich hö-ö man min haköpi tö ò el ngam inhötngö; ngam öt lanöökö meh pöri, Ō me-eṅ kikānö kūön Ētöm, sā-cha min tö tī ò, hameuknyu nup min tökööl meh tö ò.