Read Car_Nicobarese INRĀMÖRE 5 Bible Online

INRĀMÖRE 5 - Car_Nicobarese bible

INRĀMÖRE 5

¹Ō Mā Tēv, köpölōn tölāinyngen ih; yĕh meuk, ngëichkö minṙē-ĕng ih inrē!

²Ngaich an ngam amin ih nö kē-ĕyö nö i aṅ tahëng minë patī ih inrē nö i aṅ tahëg pumnāmö.

³Ngaich in vītöre kūönyōich, öt yöngu tö kikōnyö; sā tafīösi yip yöng ih kikānö.

⁴Kētö ṙāi òk re in tö mak, havah kahëre in tö ngòh.

⁵Ahōṙö rit in öi kaneūnu i likeun re; chei in, öt kētu haneūheu in.

⁶Tarāktö këlre in in Aikup, Asīria inrē öi kē kanô-òng kūöre tö nyā-aṅkūö.

⁷Köölö fālen yip yöng ih, hö-ö ngaich nö ōtre; keun öt lanöökö cha in ngaich.

⁸Hayöngö in tö Inkövö; öt hĕng tak ṙamānyen ih ṙā-ang eltī cha.

⁹Kā nyā-aṅkūöre in i kanihngen nômöre, kūö ngam sanët nö el inchōn.

¹⁰Ṙāchö uk alaha in sā chūök kinṙūlö tö ngam töhūkūö ṙanāchö inyāichö.

¹¹Halāyi yik kikānö i Siyôn, yik töt chô-òv rēlö elpanam Yūtā.

¹²Hatūöilöng kël yip kūön rācha; öt inṙētu yip mā.

¹³Kētuṙen yip ṙāl tarik nö i kinṙīötö atra; kalöva yip nyīö kikōnyö nö keun chōn tölangan.

¹⁴Ṙangö kūö inkūp ngam elpanam yip tököiny tarik, ṙāngö tīre yip ṙālö tarik nö röng.

¹⁵Ṙā-angre nuk nö ngaich ṙānāmölōn ih; havāngtu nö miṙivlōn ngam kinṙīömö ih.

¹⁶Sukngöre në sapīöv nö ṙā-ang i kui ih; öt kôlò in pò ih köölö fālen!

¹⁷Kūö e an ngam ellōn hī nö vāhavö kūö u në mat hī nö paṙeūma,

¹⁸Pò ngam rung Sīyôn nö hulalhaka nö hatngökūö; i kui e chakāl nö havötköre.

¹⁹Me-eṅ pöri, Ō Mā Tēv, öt chanūhuvṙen öm hayöng; köp an ngam kantēra meh i tumköl chap tarik,

²⁰Kūöyòh öm urāḵngen vaichngen ih, kūöyòh öm ngatī rô-òten ṙāngen ih?

²¹Havanten ih man in re; Ō Mā Tēv hòṅ ih öi havantuvö! Tumfömlö sakāmö ih sā misī!

²²Hēk ngaich ṙöng öm sōḵen ih takô? Kiröngö tanānyö ṙöng öm in in?