Read Car_Nicobarese ISIKĪ-ĔL 10 Bible Online

ISIKĪ-ĔL 10 - Car_Nicobarese bible

ISIKĪ-ĔL 10

¹Ngaich ngëicha chū-ö, ngaich meuk, i kui ngam taṙul ök mī-ikui yik kërup nö meūkö nö lātulöng tö cha tö sā safir ihong, nö sā inlahen kantēra rācha.

²Ngaich ngö ṙô anga-aṅ tök tarik tö-inyuttö linen hilā. Kuṙòh i minë töchavīṙa man kalröön inröl el katòh më kërup; hatööḵlö aṅ eltī re tö töhūkūö ta-ök tameūyö ṙā-ang ihôi më kërup, pirātngö u ngaich i kui ngam elpanam. Urēhĕkūö mat chu ngaich anga-aṅ nö kiröön-ngöre.

³Sökhaka yik kërup nö lā lòhngö kaha ngam patī hē ök tarik nö kuhēthötre; ngaich ök taṙul nö löpngöre tī töp lātuhēt el milūkö.

⁴Ngaich ngam lanöökö ngam Mā Tēv nö chuh lātulöng nö ṙā-ang in yip kërup nö im el milūkö ngam patī; ngaich ngam patī nö löpngöre tökūö ngam taṙul, tööḵlö ngaich ngam el milūkö tö inyāngö lanöökö ngam Mā Tēv.

⁵Ngaich hāngö ök ṙô rōi kël nuk kërup nö tölngö ngam lā elkahôyö el mikūkö, sā ṙô ngam Tēv Tökeuheūttöre Chöngö yē ò nö kahôka.

⁶Ngaich hē ò nö tölṙô ök tarik tö-inyuttö linen hīlā, kē tameūyö man ṙā-ang ihôi minë töchavīla kalröön inröl, ṙā-ang i hôi më kërup, kuhēthötre anga-aṅ ngaich sökhaka ngaich nö in ök kalröön inröl.

⁷Ngaich hĕng tak ök kërup sumlôtö këlre nö ṙā-ang ihôi yik kërup nö ik tameūyö ök mī-ihôi yik kërup, ngaich haroh tūmö kahë nö in u, ngaich chaplö e nö eltī ök tarik tö-inyuttö linen hilā, ök kamë-eṅ e ngaich kunyī-inyre.

⁸Ngaich meūkö yik kërup nö këltö kël tarik nö el sanëôkre.

⁹Ngëicha chū-ö ngaich, ngaich meuk, fën nuk umuh kalröön inröl in yik kërup, kö kahëngö in töhĕng tak kërup ngaich nuk kalröön inröl nö sā mineūkö töpachāla elmat tölingūṅ ihong töpōi ṙāi.

¹⁰Ngam mineūkö u pöri, höng hĕngren minë töfën, nö sā öp kalröön inröl lā ël ngam töhĕng kalröön inröl.

¹¹Hē u nö kiröönngöre, kiröönngöre anū-ö nö hĕng kang kū-ö i nup töfën kū-ö nöng öt havöökö kūöre tö kinröönngö u, ip töng kū-ö öp lā-urĕh pöri kalröön inröl tömken e nup tahëng nöng öthavöökökūöre tö kinröönngö u.

¹²Ngaich nuk uk u, tö nuk tanöm u inrē tö nuk inröl nö vinngö nöng mat nyöre-nuk kalröön inröl töfën in u nö aṅhaṅv-in.

¹³Nuk Töfën kalröön inröl, kaheūkö anū-ö töchavīṙa kalröön inröl tö elnang chu.

¹⁴Kö kahĕng tak cha-a nö fënö kūö ök raneh kūö sā kūö Kërup, ök innëtö kūö sā kūö tarik, ök līnūöyö kūö lāyön, ök finënö kūö matēṙö.

¹⁵Ngaich nuk kërup nö kiteūtöre. Anū-ö nun në tö-aṅ chehechōn maheuṅk chu nö ip tahël Chāpör.

¹⁶Hē nuk kërup nö kiröönngöre in u nuk kalröön inröl nö kiröönngöre; hē nuk kërup nö hanyāklö këlre nö kiteūlöre nö ṙā-ang in u.

¹⁷Yē u nö sökngöre, sökngöre anū-ö, yē u nö kiteūlöre in u anū-ö nö kitēulöre; pò ngam ma-alaha minë tö-aṅ chehechōn nö ellōn u.

¹⁸Ngaich ngam lanöökö ngam Mā Tēv nö kiröönngöre ṙā-ang elmilūkö ngam patī, sökhak ngaich nö lātulöng tö yik kërup.

¹⁹Hanyāknyö këlre ngaich yik kërup nö kiteūlöre nö ṙā-ang eltumlat nö meūkö tö chu tö kinröönngö u, nö in u nuk kalröön inröl; ngaich sökhak anū-ö nö ik inkūp ök lā chuhöt inkūp kūö ngam patī ngam Mā Tēv; ngaich ngam lanöökö ngam Tēv Israel, nö lā kui u.

²⁰Anū-ö në tö-aṅ chehechōn maheuṅk chu, nö el katòh ngam Tēv Israel, ip tahël Chāpör; ngaich akahakūö chū-ö tö u nö kërup.

²¹Kö fënö kūö anū-ö nö hĕng nòng kö fënö sanëôk inrē, ngaich elkatòh nuk sanëôk u nuk tö sā kël tarik.

²²Ngam tö sā nuk kūö pöri, anū-ö takô nun kūö tömeūkö tö chu, nö ip tahël Chāpör. Kö kiröönngöre anū-ö nö hachipkūöre.