Read Car_Nicobarese ISIKĪ-ĔL 11 Bible Online

ISIKĪ-ĔL 11 - Car_Nicobarese bible

ISIKĪ-ĔL 11

¹Chātlöng chū-ö ngaich tö ngam töhet Fanöinylö, ngaich kēten chu nö ip lā chuhöt inkūp ngam patī ngam Mā Tēv, ök tökū-ötö lā chūhöt. Ngaich yĕh meuk, ik inkūp ök lökhöt, nët anāi taneui tak yik umuh tarik; in cha chū-ö meūkö Ya-āsania ök kikōnyö kūön Asöör, Pēlataya inrē ök kikōnyö kūön Panāyā, kūön rācha in yik tarik.

²Ngaich ngö ṙô anga-aṅ tö chu, Kūön tarik, cha-a yin vē tarik vamī ötlanöökö cha-a inrē mahalēnlö tötlöök nö in ngih elpanam;

³Vē tö ngö ṙô, Öt röhta an ngam ṙētak minānlö patī; tanīöyö vët ön ngih elpanam, ngaich alaha īhö.

⁴Lökten vë-eny mu-unôich lā-al cha, vë-eny mu-unôich, Ō kūön tarik.

⁵Ngaich ngam Töhet Fanoïylö ngam Mā Tēv nö suktöre nö i kui chu, ngaich ngö ṙô tö chu, Ngö ṙô man, Ngö ṙô an ngam Mā Tēv; Pò meh ngö lōn, Ō patī Israel; pò chu akahalōn tö nup yamih nö elkui lōn meh.

⁶Ngaich man ṙūölö ṙôngö yip töfëli in ngih elpanam, hatööḵlö el në talöökö inrē tö töfëli.

⁷Lökten an ngam Mā Tēv nö ngö ṙô: Yīp töfëli in meh töṙātu tö meh nö ellōn e, cha-a yip alaha, ngaich ngih elpanam nö tanīöyö vët; kēnyu pöri min yī-ö ṙā-ang ellōn e.

⁸Pa-ekūö yin tö ngam sanët; ngaich chū-ö min kētö ngam sanët nö i kui yīö, ṙô ngam Mā Tēv.

⁹Ngaich chū-ö min kēnyen yīö ṙā-ang ellōn e, ngaich kēten yīö eltī aṅ tahëng pumnāmö, ngaich akah fālen i kui yīö.

¹⁰Fukngö yin min tökūö sanët; akah fālen yīö chin min i kūöngö panam Israel; ngaich yī-ö min akahakūö tö chu öich Mā Tēv.

¹¹Hö-ö ön ngih elpanam min nö tanīöyö vët yīö, öt rēhĕn yī-ö min alaha ellōn e; akah fālen yīö chin min i kuöngö panam Israel;

¹²ngaich yī-ö min akahakūö tö chu öich chū-ö Mā Tēv; pò yīö öt lök i nup tökūichiyö chöngö, öt rēhĕn kēken nup inchöngten aṅ in chu, ngaich pöri yī-ö asīnken inchöngtenre tö vē pumnāmö tarik vē mahavīlen yīö.

¹³Ngaich ngö inlahen angū-ö, i saha chu vë-eny yanīhih mu-unôich, tö Pēlatia nö kapah ök kikōnyö kūön Panayā. Afukngöre chū-ö ngaich fāthakkūö, ngaich pōiti ṙô öich peuiny, öich ngö ṙô, Aōla Mā Tēv! Hòṅ ngaich öm hatökngörit vē chööḵṙen Israel?

¹⁴Ngaich yih ngam ṙô ngam Mā Tēv nö in chu:

¹⁵Kūön tarik, mak alaha meh, mak alaha meh takô hol meh tö-ahöti, keuheūtlöre ngam patī Israel, ṙòkhöre cha-a, nö më ṙô yip mī-iyöng Yērusalem nö ngö ṙô, Kiröönngöre yik nö ngaich nö marôvat tö ngam Mā Tēv; kētu ön ngih panam nö amin hī.

¹⁶Lökten ngö ṙô an ngam Mā Tēv: Pòrô chin kēngen cha nö marôvat in yip pumnamö tarik, pòrô inrē pirātngen cha i nup panam, sönen chū-ö töhet chūök cha rahëchtaṙen i nup panam chūök cha nö ngaich nö kiröönngöre.

¹⁷Lökten ngö ṙô, Ngö ṙô an ngam Mā Tēv, Hamūlö yīö chin min ṙā-ang in yip tarik, hamūlö yīö inrē ṙā-ang i nup panam chūök yīö pirātiyö, ngaich chū-ö min inrē kē-ĕkūö yīö tö ngam panam Israel.

¹⁸Ngaich yē cha nö yih nö umuh ngaich cha-a min nö kēngö nup tösō-ov in e ṙòkhöre inrē nup sin-òkkūö in e.

¹⁹Ngaich chū-ö min kē-ĕkūö cha tö töhĕng ellōn, ane inrē kēhöt tufömngöre ma-alaha nö in cha; kēngö öp ihong chin min fanöinylö nö ṙā-ang el alaha cha kē-ĕkūö cha inrē tö alaha fanöinylö.

²⁰Hòṅ cha nö lök el nup tökūichiyö chöngö chu haköp nup inchöngten inrē aṅ in chu hang chöngö u inrē; ngaich acha-a min nö tarik chu, ngaich Tēv cha chū-ö min inrē.

²¹Acha-a pöri tö ellōnu nö tömkörit nuk tösō-ov nup sin-òkkūö in cha inrē, ngaich chū-ö min havëkö nup la-en cha nö i kui cha, ṙô ngam Mā Tēv.

²²Ngaich nuk kërup nö hanyāklö sanëôk re, nö holtö nup kalröön inröl nö in u ngaich ngam lanöökö ngam Tēv Israel inrē nö i kui u.

²³Ngaich ngam lanöökö ngam Mā Tēv nö yônlö nö ṙā-ang ellōn ngam elpanam, i kui rôngö ngaich nö sökhaka ip lā chuhöt kaha ngam elpanam,

²⁴Chātlen chu ngaich ngam Töhet Fanöiylö ngaich kēten chu ip tömeūkö lökten im Töhet Fanöinylö ngam Tēv i Kālti in yip tö-ahöti. Ngaich ngam tömeūkö ngam maheuṅk chu nö yônlö nö ṙā-ang in chu.

²⁵Ngaich chū-ö keuheūtnyöre ṙô in yip tö-ahöti tö nuk hameuktö ngam Mā Tēv nö in chu.