Read Car_Nicobarese ISIKĪ-ĔL 12 Bible Online

ISIKĪ-ĔL 12 - Car_Nicobarese bible

ISIKĪ-ĔL 12

¹Ngaich yih ngam ṙô ngam Mā Tēv nö in chu:

²Kūön tarik, iyöng ellōn patī ma-ahôngen man, yip tömātu nö meuk, hö-ö pöri nö meuk, yip tönāngu nö hang, hö-ö pöri nö hang;

³Pò cha nö patī ma-ahôngen. Lökten, kūön tarik, halēnlö nup inyul chehenre man öm el inhötngö ngaich kiröönngöre i kūö cha tö sakāmö öm im inhötngö; kiröönngöre min me-eṅ i kūö cha sā tö-ahöti ṙāngö ngam chūök meh öm chuh i tahëng. Amahtuṙen yip min nö akaha elmat, pòrô cha-a nö ma-ahôngen.

⁴Kēnyö öp inyul chehen re min me-eṅ tö sakāmö i kūö cha, sā inyul chehen tö-ahöti; kiröönngöre min me-eṅ inrē tö harap i kūö cha, sā tarik yip chamuh el inhötngö.

⁵Ul kaha ngam kinlōngö tufunngö e i kūö cha, ngaich löknyö in e meutnyi.

⁶I kūö cha min me-eṅ chātlö ngam inyul chehen nö el ranôṙö meh, ngaich el sinngūlö tayūkö e; haṙungngökūöre min me-eṅ, hòṅ meh öt meuk ngam panam; tön vīten meh chin minkahngö i patī Israel.

⁷Ngaich chū-ö asā tinölôre. Kēnyö öp inyul chehen re chū-ö tö sakāmö, sā inyul chehen tö-ahöti, ngaich im harap chū-ö ul tufunngö kaha ngam kinlōngö aṅtī tö në kuntī re; kiröönngöre chū-ö ngaich el sinngūlö, keun nuk chehen re el ranôṙöre i kūö cha.

⁸Im peuheū ngam ṙô ngam Mā Tēv nö yih nö in chu:

⁹Kūön tarik, ötṙô-òvö önguh ngam patī Israel, ngam patī ma-ahôngen, nö ngö ṙô tö meh, Asuh ap la-en meh?

¹⁰Ngö ṙô pöchö tö cha, Ngö ṙô an ngam Mā Tēv: tö ṙôtö inlahen öp kūön rācha ön ngih ṙô i Yērusalem i nup patī Israel inrē nö ṙòkhöre nup më-ël e.

¹¹Ngö ṙô, Minkahngö chin in yīö: sā inlahen chu ngaich ngatī min angū-ö nö in cha; kiröönngöre yip min nö ahöti, nö el inkövö.

¹²Öp kūön rācha mī-in cha chātlö inyul chehen re min nö el ranôṙö re nö el singūlö, ngaich kiröönngöre min; ul kaha öp kinlōngö min anga-aṅ nö tufunngö e ngaich meutnyi nö lökyö in e; haṙungngö kūöre min anga-aṅ, pòn sōten nup matre nö meuk ngam panam.

¹³Ngaich chū-ö min hanyāknyö ap inhāṅl re i kui ò, ngaich anga-aṅ min nö kô-òngvah nö el öp tinngöp chu; ngaich chū-ö min kēten ò i Pēpilön i panam yip aṅ Kālti, sönngenre min anga-aṅ nö ötmeūkö e; ngaich umuh min anga-aṅ nö kapah.

¹⁴Ngaich chū-ö min kö i lök tö lā-a kuföt öich pirātngen cha yip mahavīlen ò, hamòlṙen ò yip kumyung in ò inrē; ngaich chū-ö min hōknyö öp sanët lā unôich cha.

¹⁵Ngaich cha-a min nö akahakūö tö chu öich Mā Tēv, yē chu pirātngen cha in vē pumnāmö tarik pirātngen cha inrē keuheūtngöre chūök i në panam.

¹⁶Hökngen yip töharoh tum tak pöri min chū-ö nö ötkô-òngvah tökūö sanët, kūö inyāichö, kūö invah inrē tölëlngökūö, hòṅ cha nö halööknyôre tö nup sin-òkkūö nö ṙòkhöre in yip pumnāmö tarik chūök cha nö kiröönngöre, ngaich akahalōn tö chu öich Mā Tēv.

¹⁷Hēk inrē ngam ṙô ngam Mā Tēv nö yih nö in chu:

¹⁸Kūön tarik, nyā ngam nyā-aṅkūöre man öm kichëyöre, òk ngam mak inrē öm kinchëingöre holtö pinhë-eṅkūö;

¹⁹Ngaich ngö ṙô in yip tarik aṅ ngam panam, Ngö ṙô an ngam Mā Tēv tö inlahen yip aṅ Yērusalem ip panam Israel. Pinhëṅngörekūö yip min nö nyā nyā-aṅkūöre, holtö nganāng alahare yip min nö òk mak, pò ngam panam cha min nö ahāti aṅkūö tö nup aṅre, kūö chanökhuṙen yip mī-iyöng ël e.

²⁰Ngaich min nup tö-aṅhaṅv elpanam nö piṙāpi, ngaich ngam panam min nö vītöre nö töt aṅhaṅvkūö; ngaich yī-ö min akahakūö tö chu öich Mā Tēv.

²¹Ngaich yih ngam ṙô ngam Mā Tēv nö in chu:

²²Kūön tarik, asuh öng ngih inchō-oṙô ngam in meh inlahen ngam panam Israel, öm ngö ṙô, Ṙūönyöre rôta nun në sakāmö, ngaich ṙòkhöre nup tömeūkö nöng öt yanīhivö?

²³Lökten man ṙô-òv in cha, Ngö ṙô an ngam Mā Tēv: Hòṅ litòkngörit ngih inchō-oṙô chin, hö-ö yip min nö ngöhören ṙô tö e nö inchō-oṙô nö in Israel. Ngö ṙô pöri tö cha, Röhta nup sakamö, nup kinheūtngen nup tömeūkö inrē.

²⁴Pòn ötngöhören min töminyôiny aṅ mineūkö, hēk inrōyö chinòng alaha nö el patī Israel.

²⁵Chū-ö pöri min öich Mā Tēv tö ṙô-òv töp ṙô chu min, ngaich angū-ö min nö teungten. Öt ngöhören ap min nö hāṅtö yīhih, i nup sakāmö yīö pöri, Ō patī ma-ahôngen, chū-ö min töṙô-òv töp ṙô ngaich hateungten e, ṙô ngam Mā Tēv.

²⁶Hēk ngam ṙô ngam Mā Tēv nö yih nö in chu:

²⁷Kūön tarik, yĕh meuk, ngö ṙô yip cha-a aṅ patī Israel, Töha-ehangrit sakāmö nö ṙōl sumkam an ngam tömeūkö tö ò, minë vinë-eny mu-unôich inrē nö tömarôvat.

²⁸Lökten ngö ṙô tö cha, Ngö ṙô an ngam Mā Tēv: Öt hĕng nup min ṙô chu töhāṅti yīhih, ngam ṙô pöri ṙô chu hateungtukūö min, ṙô ngam Mā Tēv.