Read Car_Nicobarese ISIKĪ-ĔL 13 Bible Online

ISIKĪ-ĔL 13 - Car_Nicobarese bible

ISIKĪ-ĔL 13

¹Yih ngam ṙô ngam Mā Tēv nö in chu;

²Kūön tarik, vë-eny mu-unôich man lā-al yip pròfĕt aṅ Israel, vë-eny mu-unôich ngö ṙô tö cha yip vamë-eny mu-unôich nöng löknyö ellōn re ṙô: Hang ngam ṙô ngam Mā Tēv!

³Ngö ṙô an ngam Mā Tēv, Öt kanôlò yēḵ in yip tökulō-ov pròfĕt yip tamömkörit ma-alahare, ngaich rö-övö nö maheūṅkuvö!

⁴Ō Israel, höng sā aṅ el inchōn am yip pròfĕt meh më-el nup tötaṙōli patī.

⁵Öl man yônlö el up manëngö, hēk katöplö kinlōngö ngam patī Israel, hòṅ e nö sökhaka ip kinyūngö hē sakāmö ngam Mā Tēv.

⁶Minyôiny-aṅ ṙô yip nö ṙô-òv minyôiny-aṅ inrē nö chòng alaha; ngö ṙô yip, Ṙô ngam Mā Tēv an yēḵ ngam Mā Tēv nö öt tīnten cha, ngaich cha-a nöng hōten ò nö hateungngö öp ṙô cha.

⁷Öl öm meuk kintūöyö elmat, ngaich ṙônyö minyôiny-aṅ i chinông alaha, i tumheuh meh ngö ṙô, Ṙô ngam Mā Tēv an, pòrô chū-ö höng öt ṙô-òv?

⁸Lökten an ngam Mā Tēv nö ngöṙô: Pò yīö ngaich ṙôtö kintūöyô meuk minyôiny inrē, lökten yĕh meuk, lā-al yīö chin, ṙô ngam Mā Tēv.

⁹Lā-al yip pròfĕt ön min ngih kël chu yip mameuk kintūöyö mat, yip töminyôiny-aṅ inrē nö i chinông alaha; hö-ö yip min cha-a nö i inlēnö yip tarik chu, öt rēhĕn nö kūichhötvö nö i mat līpöre minë-eny i patī Israel, öt rēhĕn yip min nö kuhēthötre nö i panam Israel; ngaich yī-ö min akahalōn tö chu öich Mā Tēv.

¹⁰Hòṅ, pò cha nö halō-ongkūö vē tarik chu, nö ngö ṙô, Lanāmö yēḵ, rö-övö nö lanāmuvö nö umuh; ngaich pò vē pròfĕt, yē vē tarik nö katöplö kinlōngö ngaich māchö e cha-a tö tö-ishoh;

¹¹Vë-eny nang cha yip mamāchö e tö tö-isoh tö e min nö fukngö! Yöng kumṙah öp min, tökiröng inrē tökënngöre tacham nö suktöre, chanôichö kuföt inrē;

¹²Ngaich yē ngam kinlōngö nö fukngö, ngö ṙô öng min tö yīö, Isuh ap mināchö e öp mahāchtö yīö in e?

¹³Lökten ön ngam Mā Tēv nö ngö ṙô: Vītö kuföt chanôichö chin min nö im lanīnö chu; ngaich min inrē öp yöng kumṙah nö i tanānyö chu, tökiröng tökënngöre kumṙah inrē i lanīnö chu nö piyāingö e.

¹⁴Tiṙöl ngö ngam kinlōngö chin min ngam tömāchö tö yīö tö tö-isoh, piṙāptö e inrē nö i kui tumlat, hòṅ öp chūökrööntö machööḵlö e nö luvë-akkūö; yē e nö fukngö ellōn e min yī-ö palā-aiṙen; ngaich akahalōn min yī-ö tö chu öich Mā Tēv.

¹⁵Ngatī tī chin min keuheūt töp lanīnöre i kui ngih kinlōngö, i kui cha inrē yip mamāchö e tö tö-isoh; ngaich ngö ṙô min chū-ö tö yīö, Öt ōtren ök kinlōngö, ötrēhĕn yik mamāchtö alaha e,

¹⁶Yik pròfĕt Israel vamë-eny mu-unôich nö vë-eny inlahen Yērusalem meuk lanāmö inrē nö in e, Yĕn höng rö-övö lanāmö, ṙô ngam Mā Tēv.

¹⁷Kūön tarik, havöötökūöre man lā-alkūö yip kikānö kūön yip tarik, yip vamë-eny mu-unôich nöng löknyö ellōn re; lā-al cha man vë-eny mu-unôich.

¹⁸Ngö ṙô, Ngö ṙô an ngam Mā Tēv: Öt kôlò yip yēḵ kikānö yip chamôk tömilūönö i chanöm linkölngö kël, vī inyul kui tarik inrē nö kö i rôlòng cha i chinöhö nômö! Hòṅ chöh nômö ömeh aṅ in yip tarik chu, ngaich ṙātö nômö yip tahëng nö aṅ nö kanôlò meh?

¹⁹Ngaich man hachōichgen chu in yip tarik chu nö ṙënngen töhĕng me-eltī-i pārli ṙënngen linreūkö rôti inrē, kumpahngö vah tarik yip tösōḵ nö kapah, ṙātö tarik inrē nö aṅ yip tösōḵ nö aṅ, lökten i minyôiny-aṅ yīö in yip tarik chu, yip hamang minyôiny-aṅ.

²⁰Lökten an ngam Mā Tēv nö ngö ṙô: Yĕh meuk, lā-al nup milūönö yīö chin töchömtu nup aṅtī meh chöh nômö, tikaichngö u chin min inrē nö ṙā-ang i kël yīö; ngaich chū-ö min inrē hökngen nup nômö töchöhö tö yīö nö luhlöngö sā chehechōn.

²¹Tikāichi nup min inrē tö chu inyul kui yīö, ṙānyö yip tarik re chin min inrē ṙā-ang elti yīö ngaich cha-a min nö öt ngöhören nö pôḵ nö eltī yīö; ngaich yī-ö min akahakūö tö chu öich Mā Tēv.

²²Pò yīö minyôiny-aṅ ngaich kētö öt kumlē-en ellōn tölöök, pòrô chū-ö öt kētö kumlēḵ ellōn ò, ngaich yī-ö inrē ṙūöhöl alaha tötlöök,öi sōten ò nö havööngökūöre tö ngam tötlöök talöökö ò nö hayööken nômö re;

²³Lökten man min öt ngöhöre mat meuk kintūöyö mat öt rēhĕn harūnöre i chinông alaha; ṙānyö yip tarik re chin min ṙā-ang eltī yīö. Ngaich yī-ö min akahalōn tö chu öich Mā Tēv.