Read Car_Nicobarese ISIKĪ-ĔL 14 Bible Online

ISIKĪ-ĔL 14 - Car_Nicobarese bible

ISIKĪ-ĔL 14

¹Ngaich yihtöre yik rīkre mā aṅ Israel nö in chu, ngaich ūichngöre nö i kūö chu.

²Ngaich yih ngam ṙô ngam Mā Tēv nö in chu:

³Kūön tarik, kē insātēv yin vē tarik nö ellōn re, ngaich asöklö kinvē-ĕre ngam ötlanöökö cha nö i kūö cha; hökngenre öich pökeh öich hatönka tö cha?

⁴Lökten vë-ekūö cha, ngö ṙô tö cha, Ngö ṙô an ngam Mā Tēv: Tarīku hòng i patī Israel öp kamë insātēvre nö ellōn re asöklö kinvē-ĕre inrē tö aṅ i öt lanöökö ò nö i kūö ò ngaich söntenre nö yih nö in öp pròfĕt, chū-ö chin Mā Tēv min hakôtenre sapṙô ò tökūö ṙôngö nup insātēv ò,

⁵Hòṅ chu kētö tīre ellōn ap patī Israel, yip maharīkngenre tö chu nö ṙòkhöre tökūö nup insatēv cha.

⁶Lökten ngö ṙô töp patī Israel, Ngö ṙô an ngam Mā Tēv: Havöötö ellōnre havöökūöre inrē ṙā-ang nup sin-òkkūö in yīö.

⁷Pò öp töhĕng tak aṅ patī Israel, hēk aṅ i yip aṅ tahëng tö raheichtaṙen nö iyöng nö in Israel, öp mahaköhngenre nö ṙā-ang in chu, nö kē nup insātēv re nö ellōn re ngaich ṙātö kinvē-ĕre tö ngam kanöölö ò nö i kūö ò, ngaich söntenre nö yih nö ip pròfĕt nö hatöntöre nö in chu, chū-ö chin Mā Tēv min hakôtenre sapṙô ò;

⁸Ngaich chū-ö min havöötökūö re lā-al ap tarik, vīten ò chin min nö minkahngö nyam ṙô inrē rökngen ò inrē ṙāngö ellōn nö in yip tarik chu; ngaich me-eṅ min akahalōn tö chu öich Mā Tēv.

⁹Ngaich yēḵ öp pròfĕt nö hachīlö ngaich ṙô-òv tö ṙô, chū-ö chin Mā Tēv, öich mahachīl öp pròfĕt, hateutnyö këlre chin min inrē öich lā-al ò, ngaich fëlngen ò min nö ṙā-ang i ellōn yip tarik chu Israel.

¹⁰Ngaich cha-a min nö keun sācha re-öp sācha öp pròfĕt öp sācha öp mahatöntöre inrē min nö hĕngren

¹¹Hòṅ ngam patī Israel nö öt hēḵ nö kiröönngöre nö lō-ongkūö nö ṙāngen chu, öt rēhĕn nö hachōichngöre nö hēk tö nup tanôichngen cha, hòṅcha pöri nö tarik chu ngaich chū-ö inrē Tēv cha, ṙô ngam Mā Tēv.

¹²Ngaich ngam ṙô ngam Mā Tēv nö yih nö in chu:

¹³Kūön tarik, yē öp panam nö köölö fālen nö in chu tökūö inlahen re nö öt kô-en, ngaich chū-ö hateutnyö kël re lā-al e, likölngö kaneun nya-aṅkūö inrē tīntö inyāchö inrē i kui e, ṙā-ang in e inrē rökngen tarik töṙeūla inrē,

¹⁴Pòrô vē tölūöi tak tarik, Nōa, Tanīēl, Yōp inrē, nö in e, höng ṙāmānyö nômö re min cha-a tökūö lanöökö cha, ṙô ngam Mā.

¹⁵Yē chu hōten nup tötainy töṙeūla nö lök im panam,ngaich halëlngen e anū-ö, vīten e inrē nö töt aṅ hāṅvkūö, tö lökngen e nö öt lökö tö tarik tökūö nup töṙeūla;

¹⁶Pòrô öre nö umuh vē töluöi tak tarik nö in e, sā chu öich tö-aṅ ṙô ngam Mā Tēv, öt hō cha-a nö rēhĕn nö ṙāḵnyö kikōnyö nyīö ötrēhĕn kikānö nyīö; höng cha-a min töṙāḵnyuvö, öt aṅhavkūö pöri min ngam panam.

¹⁷Hēk yē chu kētö sanët i kui ngam panam, öich ngö ṙô, Hökngen ap sanët nö kiröönngöre nö lök im panam; ngaich chū-ö rökngen tarik töṙeūla inrē; nö ṙā-ang in e.

¹⁸Pòrô vē tölūöi tak tarik nö in e, sā chu öich tö-aṅ; ṙô ngam Mā Tēv ötrēhĕn cha-a nö hōḵ nö ṙānyö kikōnyö nyīö öt rēhĕn kikānö nyīö; höng cha-a pòn töṙāḵnyuvö.

¹⁹Hēḵ yē chu tīntö invah tölëlngökūö nö im panam, ngaich hōngnyö lanīnöre i kui e nö holtö mahām öich rökngen tarik töṙeūla inrē nö ṙā-ang in e;

²⁰Pòrô öre Nō-a, Tanīĕl, Yōp inrē nö in e, sā chu tö-aṅ, ṙô ngam Mā Tēv, öt rēhĕn cha-a nö hōḵ nö ṙāḵnyö kikōinyö nyīö öt rēhĕn kikānö nyīö; höng ṙāḵnyö nômö re pöri cha-a tökūö öp lanöökö cha.

²¹Pòn ngö ṙô ngam Mā Tēv: I ṙôken öre yē chu tīnhöti i kui Yērusalem tö në aṅ in chu töfën tökalēḵ inkaha fālen, sanët, Inyāīchö tötainy töṙeūla, invah inrē tölëngökūö, öich rökngen tarik töṙeūla inrē nö ṙā-ang in e!

²²Sön pöri yĕn töṙā-ayivö in e tö-aṅ nö mahachōḵnyö nyīö kikōnyö nyīö kikānö inrē, yē cha nö yihtöre nö in meh, ngaich me-eṅ meuk nup talöökö cha tö nup la-en cha inrē, ngaich me-eṅ min inṙamkulōn öm im tötlöök kahëtö chu i kui Yērusalem, i nup kahëtö chu inrē i kui e nö ṙòkhöre.

²³Haṙamlōn meh yip min, yē meh meuk nup talöökö cha tö nup la-en cha inrē; ngaich akahalōn min me-eṅ tö chu öich löknyu chööḵnyi öich tītö në in e, ṙô ngam Mā Tēv.