Read Car_Nicobarese ISIKĪ-ĔL 16 Bible Online

ISIKĪ-ĔL 16 - Car_Nicobarese bible

ISIKĪ-ĔL 16

¹Hēk ngam ṙô ngam Mā Tēv nö yih nö in chu:

²Kūön tarik, mikahtölōn Yērusalem tö nup sin-òkkūö in e,

³Ngö ṙô, Ngö ṙô ngam Mā Tēv tö Yērusalem. Lamökngörit aṅ Kanā-aṅ man im panam inrē öm fötnyu; aṅ Amôr ök yöng meh kikōnyö, aṅ Hitait inrē ök yöng meh kikānö.

⁴Ngam finötnyö meh pöri, ik sakāmö meh fötnyuvö ngam kūö fun meh nö öt ṙatlöngö öt rēhĕn me-eṅ söichö tö mak öm ahetlöngö, öt rēhĕn sīchö tö sāl öt rēhĕn kahūmi öm haköpi,

⁵Öt hĕng tak tö-aṙē-ĕ elmat tö meh, nö ngatī tī öre tö në, tökūö re nö aṙē-ĕlōn tö meh; kavalī pöri me-eṅ el kahôiṙen, pò meh sin-òkkūö, hēten tök sakāmö meh fötnyuvö.

⁶Ngaich hē chu chööḵngen meh, ngaich meūkö meh höng palöna i mahām re, ngö ṙô chū-ö ngaich tö meh öm i mahām re, Aṅ man,

⁷Sīöplö inrē sā chōn ngam el kahôyö. Ngaich sīöplö me-eṅ marôlòng ngaich sööḵlö ṙēti ngaich i rinëlöre; môlnyi teh ngaich, sīöplö keūyö; höng chumlal pöri me-eṅ öt kinṙumngu alaha.

⁸Ngaich hē chu chööḵngen meh hēk ngëichken meh inrē, yĕh meuk ngaich me-eṅ sā ṙēti mī-i hanāgenlōn; ngaich chū-ö haṙīöngnyö ngam kinfanre in meh, ngaich kafanngö kūö ngam linchôyö meh: hòṅ kilēḵngôre chū-ö öich hāngen tö meh ngaich kēhötre ip kinlēḵngô in meh, ṙô ngam Mā Tēv, kētöre ngaich me-eṅ öm chū-ö chu.

⁹Vōkö meh ngaich chū-ö tö mak söichngö nup mahām inrē nö ṙā-ang in meh, hachāmö meh inrē tö tavī-i.

¹⁰Kafānö meh chū-ö inrē tö hilā töyōhoh mirūnumat, kunröplö röön meh inrē tö uk, vöönö meh chū-ö tö tövai linen hilā keuheūtngö alaha meh inrē tö resöm hilā.

¹¹Hanyöṅtö meh chū-ö inrē tö yanöṅtö, silöthöt merkul meh inrē i kël meh, sayōk inrē i likeun meh.

¹²Vīhöt inlök elmeh meh chū-ö inrē, inlöknang meh inrē, tövai inrē sapīöv i kui meh.

¹³Ngatī innyöṅtö ngaich me-eṅ tö humlum rupīö; nup hilā meh inrē nö tövai linen hilā, resöm hilā inrē töyōhoh mirun mat hilā inrē; nyā töpahīöya atra me-eṅ inrē, töpachāka tavī-i inrē. Ṙūölöre vanāyö ngaich me-eṅ, ngaich sā inlahen rācha.

¹⁴Ngaich ök ineū-eu meh nö kiröönngöre nö sölngö nö in yip pumnāmö tarik tökūö vanāyö meh, pò e nö teung lökten im lanöökö kahëtö chu in meh ṙô ngam Mā Tēv.

¹⁵Nyatlö pöri me-eṅ im vanāyö meh, ngaich nyamköm innyihköre öm kikānö tökūö ngam ineū-eu meh, ngaich hatööḵngenre inyihköre in yip töng chamööḵngöre.

¹⁶Kē nup rīkre me-eṅ hilā re, ngaich vīlö tövai yanöṅtö chūök, ngaich el u me-eṅ inyihköre; öt töngatī-iv misī, öt rēhĕn nö hēk nö töngatī-iv min.

¹⁷Ngaich me-eṅ inrē kē nup tövai yanöṅtöre aṅ i nup humlum chu rupīö chu inrē, nup kahëtö chu in meh, ngaich vīlö insā tarik me-eṅ, ngaich in u inrē öm inyihköre;

¹⁸Ngaich me-eṅ inrē kē nup töyōhoh mirun mat hilā öm ngaich kahum tö kui u ngaich ṙātö öp tavī-i chu tötahūsa chu inrē i kūö u.

¹⁹Ngam ròti chu inrē kahëtö chu in meh ha-aṅlen meh tö töpahīöya atra, tavī-i töpachāka inrē ṙātö u me-eṅ ngaich kūö u nö tötahūsa tinôngö ṙô ngam Mā Tēv.

²⁰Ngaich me-eṅ inrē kē kūön yip nyīö kikōnyö nyīö kikānö inrē, yip kayôḵnyö meh nö kūön chu, ngaich cha-a vē nö kētū nö in u nö kā-ayö. Töng kūöṅnen öng ngam innyihköre tö meh

²¹Tö meh fëlngö yip kūön chu ngaich kēten cha nö tökētu nö in u nö lökten i kūö tameūyö?

²²I nup sin-òkkūö nö ṙòkhöre tö nup innyihköre tö meh öt köpölōn me-eṅ tö nup sakāmö meh hē meh nyīö, hē meh chumlah lichôi inrē, pilönöre öm i mahām re.

²³Ngaich an ngam ötlanöökö meh: (nö öt kanôlò, in meh an ngam öt kanôlò! ṙô ngam Mā Tēv),

²⁴Ngaich man vīlö urôhò re tö töchuvīṙö ël nö lā kui ngaich vīlö chūök re lātulöng keuheūt el talöökö:

²⁵Kö i kui nup kanröönö me-eṅ öm vīlö chūök re lātulöng ngaich inyihkö ngam vanāyö re, kēngöre öm in yip chamööngöre, öm ṙūölö alaha re inyihköre.

²⁶Inyihköre man inrē in yip aṅ Aikup, yip töyal ranghen meh, ṙūölö alaha re man inyihköre, öm harunnyö tanāyö chu.

²⁷Lökten yĕh hateutnyö kël re chin lā-al meh, hakūöṅnngö ngam minchöḵ-ö kūö meh inrē, ngaich kēten meh inrē yanālö yip lā-al meh yip kikānö kūön aṅ Filistain, yip tösirōngkūö tö ngam töchōich inlaha meh.

²⁸Inyihköre man inrē in yip aṅ Asiria, pò meh öt ṙanāmu; hòṅ, inyihköre man in cha, ngaich ṙòngmö öl öm tööḵngen.

²⁹Ṙūölö alaha re man inyihköre inrē in yip aṅ panam Kālti mi-inyīhkö chehen; ngaich in e pòrô me-eṅ öl öm tööḵngen.

³⁰Töyahlö an ngam ellōn meh nö i hanāngen, ṙô ngam Mā, meuk öm tö meh ngaich la-evṙen tö në, në la-en mās mi-inyihköre kikānö;

³¹Vīlö öp töchuvīṙö lā el kui urôhò me-eṅ kö i kui nup kanröön, vī-il chūök re me-eṅ inrē lātulöng i nup talöököre. Rö-ö pöri me-eṅ sā mi-inyihköre kikānö, pò meh öt ööire tö ṙāi ṙëhe.

³²Pīhö ma-asēha, kamë aṅ tahëng nö i chūök öp pīhö ò!

³³Kētö reneushö mi-inyihköre yin vē kikōnyö: ngaich pöri me-eṅ kētö raneushö yip töhāngen tö meh, haṙöiyö cha nö yih nö in meh nö keuheūttöre löktö lā-a nö im innyihköre tö meh.

³⁴Lökten man harīkngöre tö yip tahëng kikānö im innyihköre tö meh; öt hĕng tak mahaṙöiyö meh öm inyihköre; ngaich me-eṅ kētö ṙāi ṙëhe, ngaich rö-ö me-eṅ kē-ĕvkūö tö ṙāi ṙëhe; lökten man töharīkngö re.

³⁵Lökten Ō me-eṅ mi-inyihköre, hang ngam ṙô ngam Mā Tēv:

³⁶Ngö ṙô ngam Mā Tēv, Pò ngam sinrōngkūö meh nö ngaich nö luvënyu kūö ngam linchôyö meh inrē nö ṙòngnyukūö in ngam innyihköre tö meh in yip hanāngen meh, kūö nup insātēv meh inrē, kūö mahām yip kūön meh inrē tökētu nö in u,

³⁷Lökten, yĕh meuk, hamūl yip hanāngen meh chin min, yip chūök meh kumchikngenre, ṙòkhöre cha-a yip hanāngen meh yip tanôkömeh inrē; hamūlö cha chin nö lā-al meh nö keuheūttöre löktö lā-a, ngaich luhnyö kūö ngam linchôyö meh in cha hòṅ cha nö meūkö meh chumlal.

³⁸Ngaich chū-ö min akaha meh sā yip kikānö mamyūhanga ngaich kitaknyö mahām nö akaha fālen, ngaich kētö kui meh tö mahām aṅ ip lanīnö kumnyahlōn inrē.

³⁹Ngaich chū-ö min kēten meh eltī yip hanāngen meh, ngaich cha-a min nö tiṙölngö öp tö chuvīṙö lā-el kui urôhò meh tiṙölngö nup chūök meh lātulöng inrē; luhnyu nup min hilā meh tö cha kē-ĕ inrē nup tövai yanöṅtö meh ngaich ṙā-ayö me-eṅ höng chumlal öt hilāṙu.

⁴⁰Ngaich cha-a min nö kētö yip tömṙôngö nö lā-al meh, kuleh kui meh cha-a min inrē rökö meh inrē öm pinyënyö nö aṅtī tö nup sanët cha.

⁴¹Ngaich cha-a min inrē nö föngtökūö nup patī yīö akaha fālen yīö inrē nö i kūö yip tömaṙôngö kikānö; vīten yīö chin min ṙā-angre i in-nyihköre, ngaich me-eṅ min inrē öt ngöhöre kētö ṙāi ṙëhe.

⁴²Ngatī chin min hatööḵngen öp inngëṅṙö tanānyö chu in yīö, ngaich ngam lanīnö chu min nö kiröönngöre nö ṙā-ang in yīö; ṙātöre alaha chū-ö min ngaich, öt ngöhören inrē ngam tanānyö chu.

⁴³Pò yīö köpölōn tö nuk sakāmö nyinī-öṅ yiö, vīten chu pöri līn öi aṅtī tö në; lökten yĕh meuk havëkö nup la-en yīö chin i kui yīö, ṙô ngam Mā Tēv. Röh öyih kēken tötlöök la-en nö ṙinūöten minë sin-òkkūö in yīö?

⁴⁴Yĕh meuk, ṙòkhöre yip tö inchō-ovṙô nö ṙô-òv min nö ṙôtö ngih inchō-oṙô in yīö, Sā ngam kikānö yöng, sā ngam kūön kikānö.

⁴⁵Kikānö man me-eṅ kūön ngam yöngre kikānö, ngam tösa-òkkūö tö pīhöre tö kūönre inrē; ngaich me-eṅ inrē kanānö yip kanānöre, yip tö sa-òkkūö tö yip pīhöre kūön re inrē. Aṅ Hitait ök yöng meh kikānö aṅ Amôr inrē ök yöng meh kikōnyö.

⁴⁶Öp maṙöinylö kanānö meh anga-aṅ ön ngòh Samariā ngam mī-iyöng nö in yip kūön re kikānö lā kapā tö meh; ngam ṙālö kanānö meh inrē, ngam mī-iyöng lā lòhngö tö meh, nö anga-aṅ ngòh Sôtöm holre tö yip kikānö kūön ò.

⁴⁷Ngaich rö-ö me-eṅ hō-olōn lök el talöökö cha, hēk la-evṙen asā nup sin-òkkūö in cha; ngaich me-eṅ höng öt rô-òtuṙen öm mötlö chanôchö tö cha i nup talöökö meh nö ṙòkhöre.

⁴⁸Sā chu tö-aṅ, ṙô ngam Mā Tēv, öt ngatī la-en an ngam kanānö meh Sôtöm tö yip kikānö kūön ò inrē nö sā la-en meh me-eṅ tö yip kikānö kūön meh inrē.

⁴⁹Yĕh meuk, angū-ö an fālen ök kanānö meh Sôtöm: hakeūlenre an tö yip kikānö kūön ò, saṙaklöng ṙôken nya-aṅkūö kôlò lööṙen inrē, hö-ö pöri nö holṙen yāich töhāṅten inrē.

⁵⁰Kësen acha-a la-evṙen inrē tö sin-òkkūö nö i kūö chu; lökten chin kēngen cha, hē chu meūkö e.

⁵¹Öt ròngtikahëken ök Samariā tö nup tökööl in meh; mötlö kahëken man me-eṅ tö cha tö sin-òkkūö, ngaich vīten yip kanānöre me-eṅ nö löökö mineūkö tökūö nup sin-òkkūö nö ṙòkhöre nup kahëken meh.

⁵²Keun ngam minṙēngöre man; me-eṅ inrē tön ngaich man akah fālen tölöök nö lā i yip kanānö meh; kūö nup tö kööl meh öm mötlö lahūölka tö sin-òkkūö tö cha, mötlö yip cha-a tö meh nö im töchip. Lökten yĕh sirōngkūö, me-eṅ inrē, keun ngam minṙēgö meh inrē, pò meh vīten më kanānö meh nö löökö mineūkö.

⁵³Havantö nup kanôlò cha chin min, hĕnghöre kanôlò Sôtöm tö yip kikānö kūön ò inrē, nup kanôlò Samariā inrē tö yip kikānö kūön ò inrē, havantö nup kanôlò meh chin min inrē nö elṙôngö cha,

⁵⁴Hòṅ meh keun ngam minṙēngö meh ngaich sirōngkūö tökūö nup taṙòkhöre kahëken meh vītöre ngaich inṙamkölōn in cha.

⁵⁵Yip kanānö meh pöri, Sôtöm tö yip kikānö kūön ò min nö havantenre nö sā inlahenre tö lā-urĕh, Samariā inrē tö yip kūön ò kikānö inrē min nö havantenre nö sā inlahenre tö lā-urĕh; me-eṅ inrē tö yip kūön meh kikānö inrē min havantenre sā inlahen meh tö lā-urĕh.

⁵⁶Röh öp kanānö meh Sôtöm nö chöng nūöngö nö elvāng meh ik sakāmö inkeūlen meh,

⁵⁷Urēhĕkūö ngam lanöökö meh nö lūhuyö hilā? Ngaich me-eṅ tö-ngamuh vītöre sā ò öm chööḵnyö minṙēngö tö yip kikānö kūön Itöm ṙòkhöre inrē yip ranghö ò yip kikānö inrē kūön aṅ Filistain, yip mahavīlen meh mahavëḵngen meh,

⁵⁸Ngaich man keun sācha nuk töchōich inrē, ṙô ngam Mā Tēv.

⁵⁹Hòṅ ngö ṙô an ngam Mā Tēv: Lök alaha meh chin min sā inlahen meh, öm öt chumkūöṙen tö ngam töchūöku kinlēḵngô linkölngö kinlēḵngô,

⁶⁰Sön pöri chū-ö min köpölōn tö ngam kinlēḵngô chu in meh i nuk sakāmö nyinī-öṅ meh, haköpngö ngam töt chanūhuvṙen chin min kinlēḵngô in meh,

⁶¹Ngaich me-eṅ min fĕ-ĕlre tö nuk talöökö meh, ngaich sirōngökūö yē chu kē yip kanānö meh, hĕnghöre maṙönylö tö meh ṙālö inrē tö meh, ngaich kēten cha in meh nö sā kūön kikānö, hö-ö pöri nö kūö ngam kinlēḵngô in meh.

⁶²Haköpngö ngam kinlēḵngôre chin min in meh, ngaich akahalōn min me-eṅ tö chu öich Mā Tēv,

⁶³Hòṅ meh köpölōn kalūöchöre elkui inrē, ngaich öthētu vā-anykūöre hēk, tökūö meh sirōngkūö, yē chu aṙēlen meh tö nup taṙòkhöre kahëken meh, ṙô meh Mā Tēv.