Read Car_Nicobarese ISIKĪ-ĔL 17 Bible Online

ISIKĪ-ĔL 17 - Car_Nicobarese bible

ISIKĪ-ĔL 17

¹Yih ngam ṙô ngam Mā Tēv nö in chu:

²Kūön tarik, vë-eny manah öp chīl, ṙô-òv inrē tö-inchō-oṙô el patī Israel;

³Ngö ṙô, Ngö ṙô an ngam Mā Tēv: Hĕng nòng öp tökiröng matēṙö tökiröngö kël marôta rôngö kël inrē, kôlò sanôi nö ṙōlö mirun, yih nö i Lëpanön ngaich kēngö el kui öp sītör chōn;

⁴Ngaich anga-aṅ nö likölngö nuk lā elkui ò tö-ayal pak ngaich kēngen e nö i panam mi-inyihha, ngaich vīten e nö ip elpanam mī-inyihkö chehen.

⁵Ngaich anga-aṅ nö kē ök kulöl aṅ ngam panam ngaich teūichten e nö ik tökôlò kūö tumlat; i nuk töpōyen mak tī anga-aṅ tö e. Teūchtö e ngaich anga-aṅ sā pak tötanyīka chōn,

⁶Meuinylö ngaich angū-ö ngaich vītöre nö tölātti rōi nö chōn vāin nö pirātngöre, ngaich nup pak ò nö sökhaka. Vītöre ngaich anga-aṅ nö vāin, pākūvö ngaich anga-aṅ nö vāin, pākuvö ngaich sīöpnyöre rōi.

⁷Hĕng nòng pöri ök tahëng tökiröng matēṙö tökiröngö kël pōyen sanôi inrē; ngaich yĕh meuk, ngòh chōn vāin nö supôntö nuk ṙĕhre nö kū-ötö in ò, asīöpnyö nuk pak re ngaich nö kū-ötö in ò pòn hōtu anga-aṅ nö ṙösö e. Ṙā-ang im chūök e nö teūichtu

⁸Hēk anga-aṅ nö haṙī-ing chūök e nö teūichtu nö i tökôlò tumlat ranghö töpōyen, pò ò nö hōtu nö sīöpnyöre pak, ngaich ṙônguvö, ngaich vītöre nö tökôlò nö chōn vāin.

⁹Ngö ṙô, Ngö ṙô an ngam Mā Tēv: Kôlò ang min? Röh öng min nö teuklö nup ṙĕh re ṙalngö nup pak re inrē, pòn hōtu nup tufömngöre maneunynyi rōi nö nyangngö? Öt uroh öp min tökalēḵ kël hēk öt ṙōlö tī tarik nö teuklen ò nö ṙā-ang i nup ṙĕh ò.

¹⁰Yĕh meuk, yē ò nö harīki chūök nö teūichtu, kôlò ang min? Öthō ang min nö keuheūtngöre nö nyangngö yē ò nö fööṙö töp kuföt chuhöt nyanangngö ngaich nö ip chūökrööntöre ip chūök ò nö sīöp?

¹¹Ngaich ngam ṙô ngam Mā Tēv nö yih nö in chu:

¹²Ṙô-òv töngamuh i ngam patī töminôṙô, Öt akahakūö ömeh tö manah në? Vë-enynang cha, Yĕh meuk, yih ök rācha aṅ Pēpilön nö i Yērusalem, ngaich kē ök rācha ò tö yik kūön rācha ò inrē ngaich kēten cha nö in ò nö i Pēpilön.

¹³Ngaich hĕng tak kahëḵ anga-aṅ tö kūön rācha ngaich vī kinlēḵngô nö in ò, ṙāten ò ngaich nö el katòh töchūökuṙô. (Kē-ĕyö yik yöngkūö tarik aṅ ngam panam tö ò,

¹⁴Pòn hōtu ngam pūlngö nö hayāichi öt hachônglöngö inrē, ngaich lökten i inköpö ngam kinlēḵngô ò angū-ö nö sökhaka.)

¹⁵Ngaich pöri anga-aṅ nö ahôngen nö lā-al ò nö tīnngö ma-ahānga nö i Aikup, nö hōten cha nö kē-ĕkūö ò tö kōra tö töpōyen inrē kumyung. Teunglen ap min? Kô ang ngòh tarik nö öt kô-òngvah ngòh tö ngatī la-en? Kô ang nö litòkngö ngam kinlēḵngô ngaich nö öt kô-òngvah?

¹⁶Sā chu tö-aṅ, ṙô ngam Mā Tēv, kô-en nö ip chūök öp chūök öp rācha nö iyöng öp vamīlen ò nö rācha öp töhā-āchiṙen chūökṙô, öp tö litôki kinlēḵngô nö in ò tö ò, i Pēpilön ap min nö kapah.

¹⁷Holtö yip tökālēḵ kumyung ang Fërō tömaṙôngö inrē öthō min nö holṙen ò nö im kinyūngö, yē nup törunglö nö harunglöngö ngaich vīlöngö inrē inlōngö chūök kinyīngö nö rinökngen nômö yip tömaṙôngö.

¹⁸Pò ò nö ha-āichngen ngam chūök ṙô litòkngö ngam kinlēḵngô inre, pò ò nö kētö këlre ngaich söntenre nö la-evṙen tö në, öthō ap min nö öt kô-òngvah.

¹⁹Lökten ngam Mā Tēv nö ngö ṙô: Sā chu tö-aṅ, kô-en an ngam chūök ṙô chu ngam ha-āchngen ò, ngam kinlēḵngô chu inrē ngam tölitôki tö ò, havëkö e chin min i kui ò.

²⁰Ngaich chū-ö min hanyāknyö ngam inhāṅlre i kui ò, ngaich anga-aṅ min nö kôhöt nö el ngam tinngöp chu, ngaich chū-ö min kēten ò i Pēpilön ngaich kēhötnen ò umuh im inkaha fālen tökūö inhôngen chöngö kahëken ò nö lā-al chu.

²¹Ngaich ṙòkhöre yip tötölka kumyung in ò min nö fukngö tökūö sanët, ngaich yip tö-aṅ min nö pirāti el kuföt tökeuheūttöre lā-a; ngaich akahalōn min me-eṅ tö chu, ōich Mā Tēv, töṙô-òv.

²²Ngö ṙô an ngam Mā Tēv: Hakôtenre chin min hēngö kahë tö kun pak el kui ngam tömarô-òlòng sītör chōn, ngaich asöklen e min; ngaich chū-ö min likölngö öp elkui öp ṙālö kun pak ò tö-ayal,ngaich hakôtenre chū-ö min teūichtö e i kui öp tömarô-òl kui töchônglö inrē rôngö;

²³I kui rôngö Israel chin min teūichtö e, hòṅ e min nö sīöpnyöre pak ngaich ṙônguvö, ngaich vītöre nö tökôlò sītör chōn, ngaich elkatòh ò min nup töṙeūla töṙōlkangen nö iyöng; elnyat rōi nup inrē nup fôngö töṙōlkangen chehechōn.

²⁴Ngaich ṙòkhöre nup chōn ngam elkahôyö min nö akahakūö tö chu öich Mā Tēv öich tumṙeūtö tömarô-òl chōn, vīten tömarô-òl inrē nö cheūḵlòng nö chōn, nyôngö tī tö tö-ayal chōn, vīlö ngam tönyô chōn inrē nö kôlò. Chū-ö chin Mā Tēv töṙô-òv, ngaich kēken e min.