Read Car_Nicobarese ISIKĪ-ĔL 18 Bible Online

ISIKĪ-ĔL 18 - Car_Nicobarese bible

ISIKĪ-ĔL 18

¹Hēk ngam ṙô ngam Mā Tēv nö yih nö in chu:

²Asuāp lökten meh havannyö ngih inchō-oṙô inlahen panam Israel, nyā töhikīölhu angkūr yik yöng yīö, ngaich yip nyīö nö hikīölhu kuikanap?

³Sā chu tö-aṅ, ṙô ngam Mā Tēv, öt hēk an min ngih inchō-oṙô nö kakka tö yīö nö in Israel.

⁴Yĕh meuk, chū-ö chu nun në nômö nö ṙòkhöre, nômö ök kikōnyö yöng hĕnghöre nômö ngam kikōnyö kūön nö chū-ö: kapah ap min nômö tököölö fālen.

⁵Yē ngòh tarik nö löök ngaich la-evṙen tö töhuveū chip inrē-

⁶Yē ò nö öt nyā-aṅvkūö nö i kui minë rôngö hēk öt môklökūöre nö i nup insātēv i patī Israel öt hachōichngöre nö i pīhö holre hēk öt yihtöre nö i kikānö ip hē ò nö öt het,

⁷öt hēng tak hakihten, havan kinlēḵngô pöri nö ip töhötṙëhevö, öt kēken unlāya, kētö nyā-aṅkūöre nö i tökapahare kafan töchumlal inrē töhilā,

⁸öt ṙāyu tī tö töhaṙūöngö rupīö hēk öt kē ṙanūölen, haköp këlre nö ṙā-ang im ötlanöökö kô-en im tötmichūṙen kinṙôka ihôi tarik tö tarik,

⁹Lök minë tökūichi chöngö chu, milētṙen inrē nö haköp në chöngö chu anga-aṅ an tölöök, kô-en an min nö aṅ, ṙô ngam Mā Tēv.

¹⁰Yĕn hakūöntö nyīö kikōnyö anga-aṅ öp mu-ulāya, kumtaknyö mahām,

¹¹öp töt hēngö la-en tö në, nyā pöri nö i kui rôngö, hachōichngö pīhö holre,

¹²hakihten yāich töhāṅten inrē, kēken unlāya, öt kē-ĕny hötṙehre, môklökūöre nö i insātev, lūölken sin-òkkūö,

¹³Ṙāyutī nö haṙūöngka rupīö, kē ṙanūölen inrē; aṅ ang min anga-aṅ? Öt aṅ ap min. Ngaich ap nö keuheūten nö i në sin-òkkūö; kô-en ap min nö kapah; i kui ò ap min mahām ò.

¹⁴Yē ngòh tarik mahakūöntö nyīö kikōnyö öp mameuk në tökööl në lahūölken ök yöng ò kikōnyö, ngaich pa-ekūö, öt ngatī la-en inrē,

¹⁵Öp töt nyamā-aṅvkūö nö i kui minë rôngö hēk öt môklökūöre nö i nup insātēv i patī Israel, öt hachōichngöre nö i pīhö holre, öthĕng kang chūök nö chōichen,

¹⁶Öt hateung öp tökilē-ĕyö, öt kēken unlāyö, kētö nyā-aṅkūöre pöri nö i tökapahare kafan tö chumlal inrē tö hilā.

¹⁷Haköp këlre nö ṙā-ang im öt lanöökö, öt ṙāyu tī tö töhaṙūöngka rupīö, hēk i ṙānūölen köp i në chöngö chu, lök i në tökūichö chöngö chu inrē; öt kapah min anga-aṅ tökūö tökööl ök yöng re kikōnyö; kô-en min anga-aṅ nö aṅ.

¹⁸Öp yöng ò pöri kikōnyö, pò ò nö mu-ulòhtenre nö i kinīlö, ulāingen mak alahare, la-evṙen inrē tö tötlöök nö in yip tarik re, yĕh meuk, kapah ap min anga-aṅ nö i tökööl re.

¹⁹Sön yī-ö ngö ṙô, Kūöyòh ang ngam kikōnyö kūön nö öt kihngen tökūö tökööl ngam yöng re kikōnyö? Yē ngam kikōnyö kūön nö teūngen tö töhuveū tö chip inrē, ngaich ṙēmen inrē nö haköp kö në tökūichö chöngö chu, kô-en min anga-aṅ nö aṅ.

²⁰Ngam nômö tököölö fālen kapah min. Öt kihngen an min ngam kikōnyö kūön tökūö tökööl ngam yöngre kikōnyö öt rēhĕn ngam kikōnyö yöng nö kihngen tökūö tökööl ngam nyīö kikōnyö; öp lanöökö aṅ ip tölöök i kui ò min, öp ötlanöökö aṅ ip tötlöök i kui ò min.

²¹Yē ngòh tötlöök pöri nö havööngökūöre nö ṙā-ang i nup tökööl re nup kahëken ò ngaich haköp në chöngö chu la-evṙen inrē tö töhuveū töchip inrē, kô-en min anga-aṅ nö aṅ; ngaich öt kapah min anga-aṅ.

²²Öt hĕng nup tökööl kahëken ò min nö fēkaṙen nö in ò; kūö ngam lanöökö kahëken ò anga-aṅ min nö aṅ.

²³Kumchīkulōn öichu i kinpaha tötlöök, ṙô ngam Mā Tēv, nö öt lahë öre anga-aṅ nö havööngö kūöre nö ṙā-ang talöököre ngaich aṅ?

²⁴Yē ngam tölöök tarik pöri nö havööngökūöre nö ṙā-ang im lanöökö ò ngaich kēken tökööl ngatī la-en inrē tö nup sin-òkkūö nup kahëken tötlöök tarik aṅ ang min anga-aṅ? Öt hĕng nup tölöök la-en ò min nö fēkaṙen: tökūö michūḵ chanökhuṙen öp lökngen ò nö fāluṙen öp tökööl kahëken ò inrē, kapah min anga-aṅ.

²⁵Sönngenre yī-ö ngö ṙô, Ötlöök an ngam talöökö ngam Mā. Hangihtöre töngamuh, Ō patī Israel: Ötlöök öng ngam talöökö chu? Röh ön nö minë talöökö yīö tö ötlöök?

²⁶Yē ngam tölöök tarik nö havööngökūöre nö ṙā-ang im lanöököre kēken tökööl inrē, kūö e min anga-aṅ nö kapah; kūö ngam tökööl ngam kahëken ò anga-aṅ min nö kapah.

²⁷Hēk, yē ngòh tötlöök tarik nö havööngökūöre nö ṙā-ang im ötlanöökö kahëken ò la-evṙen inrē tö töhuveū, yöölen tī min anga-aṅ tö nômöre.

²⁸Pò ò nö ngëicha ngaich havööngökūöre nö ṙā-ang im tökööl ngam kahëken ò, kô-en min anga-aṅ nö aṅ, öt kapah min anga-aṅ.

²⁹Sönngenre ngam patī Israel nö ngö ṙô, Ötlöök an ngam talöökö ngam Mā. Ō patī Israel, ötlöök ön në talöökö chu? Röh ön nö minë talöökö yīö tö ötlöök?

³⁰Lökten chin hòṅ akah fālen yīö, Ō patī Israel, kö asā nup talöökö ò ngòh töhĕng tak, ṙô ngam Mā Tēv. Havöötö ellōnre havööngökūöre inrē ṙā-ang i nup ötlanöökö yīö, hòṅ ngam tökööl nö öt lāinyngen öt kanôlò yiö.

³¹Kavalngö nup ötlanöökö nö ṙā-ang in yīö nup kahëken yīö lā-al chu kē tufömngöre inrē ellōn yīö tufömngöre inrē ma-alaha! Kūöyòh ṙöng öi min kapah Ō patī Israel?

³²Tön rö-ö chin kumchikulōn i kinpaha töhĕng tak, ṙô ngam Mā Tēv; lökten havöökūöre, ngaich aṅ.