Read Car_Nicobarese ISIKĪ-ĔL 19 Bible Online

ISIKĪ-ĔL 19 - Car_Nicobarese bible

ISIKĪ-ĔL 19

¹Ngaich me-eṅ, kaknyöre man im inrāmö yip kuön rācha i Israel.

²Ngö ṙô: Asuh ök yöng meh kikānö nö kan lāyön nö i nuk kōiny lāyön! Fātngöre anga-aṅ nö el ṙôngö, nup kūön lāyön, Haruk kūön e anga-aṅ.

³Ngaich hĕng nòng haruklö anga-aṅ tö kūön re; kētöre anga-aṅ ngaich nö kun lāyön, ngaich huveū-en anga-aṅ kē kā re; mīktö tarik ngaich anga-aṅ.

⁴Ngaich yip pumnāmö tarik nö ahangkö pinhë-eṅkūö tö ò; ngaich anga-aṅ nö kô-òngvah nö el insuk cha; ngaich cha-a nö kēten ò nö aṅtī tö vòk ip panam Aikup.

⁵Ngaich hē ò nö meuk tö ò nö kalūöchöre elkui, tö ök maheūṅḵkö ò nö öt teunglen, ngaich anga-aṅ nö kē tahëng nòng aṅ i nuk kūön ò ngaich vīlen ò nö kun lāyön.

⁶Havötköre ngaich anga-aṅ nö i nuk lāyön; Kētöre ngaich anga-aṅ nö kun lāyön ngaich huveū-en nö kē kāḵ re; mīktö tarik ngaich anga-aṅ.

⁷Ngaich anga-aṅ nö kilöön nup töngëḵ chūök cha ngaich piṙāpngö nuk elpanam cha; ngaich ngam panam nö pa-ekūö tö yip aṅ e inrē nö ṙòkhöre i ṙô ò nö siṙöp.

⁸Ngaich yip pumnāmö tarik nö ṙātö insuk ò nö keuheūtngöre la-a: hanyāknyö inhāṅlre cha-a nö i kui ò; kô-òngvah ngaich anga-aṅ nö el insuk cha.

⁹Aṅtī tö vòk cha-a nö chaphöt ò nö el ngööngö, ngaich kēten ò nö ip rācha aṅ Pēpilön; Kēhötnen ò cha-a ngaich nö el chūök inkövö, pòn sōtu nup ṙô ò nö ngöhören hināngö nö i kui rôngö Israel.

¹⁰Sā vāin ök yöng meh kikānö nö el panô-òṅ vāin töharīki chūök tineūchti nö i kui mak, pōyen ṙòng pōyen pak inrē tökūö ṙôken mak.

¹¹Ngaich ök töngëḵ kaha ò nö vītuṙen nö kinchīṙö mahayöng; lātūlöng rô-òl kui angū-ö i nup tölip pak; meūkö rô-òl kui ngaich angū-ö nö holre tö nup töpōyen pak ò.

¹²I tanānyö pöri öp vāin nö teuklöngö, kavāli ngaich nö el tumlat; nyangngö ngaich tökūö kuföt chuhöt; köichi ngaich nuk ṙòng ò nyangngö ngaich ök töngëḵ kaha ò; ṙāpngökūö ngaich ngam tameūyö tö ò.

¹³Ngaich an nö harīki chūök tineūchti nö el tönyalnyi, ip tönyô panam töyal tö mak.

¹⁴Ngaich ök tameūyö nö löktökūö imkaha ò nö ṙāpngökūö tö nuk pak ṙòng ò inrē; lökten nö öt ōtren nö in ò töngëḵ kaha, öt kinchīṙuvö mahayöng. Angu-ö an inrāmö ngaich vīlö re nö inrāmö.