Read Car_Nicobarese ISIKĪ-ĔL 2 Bible Online

ISIKĪ-ĔL 2 - Car_Nicobarese bible

ISIKĪ-ĔL 2

¹Ngaich ngö ṙô anga-aṅ tö chu Kūön tarik, söklöröönre man, hòṅ chu vë-ekūö meh.

²Ngaich hē ò nö vë-ekūö chu, meuthöt ngaich öp Töhet Fanöinylö nö in chu ngaich asöklö röön chu, ngaich hangṙô ò chū-ö nö vë-ekūö chu.

³Ngö ṙô anga-aṅ ngaich tö chu, Kūön tarik, tīnten meh chin in yip tarik Israel, i pumnāmö tarik ma-ahôngen, yip ma-ahôngen nö lā-al chu; cha-a tö yik yöng cha inrē tötôichngen nö lā-al chu söl ing töngamuh sakāmö.

⁴Tösaṙākaṙen yin inrē vē tarik töngë-eṅ ellōn inrē tīnten meh chin in cha; ngö ṙô pömchö min tö cha; Ngö ṙô An ngam Mā Tēv.

⁵Yē cha nö hang hēk Yĕn sōḵ nö hang (pò cha nö patī ma-ahôngen) akahalōn yip min tö cha nö inu misī tö pròfĕt.

⁶Me-eṅ pöri, kūön tarik, um pa-ekūö tö cha, un rēhĕn pa-ekūö tö ṙô cha, pòrô nup töchökhu kaha chōn nö in meh ūichhak me-eṅ inrē i kui nup ka-ëp; um pa-ekūö tö ṙô cha, um rēhĕn ngangngökūö tö mineūkö cha, tön patī ma-ahôngen yip.

⁷Ngaich me-eṅ ṙôtö në ṙô chu in cha, yē cha nö hang hēk Yĕn sōḵ nö hang.

⁸Me-eṅ pöri kūön tarik, hangṙô chu tö meh; um ahôngen öm sā ngam ma-ahôngen patī; vā-alkūöre man, nyā ngih kahëtö chu in meh.

⁹Ngaich hē chu ngëicha, yĕh meuk, hĕng ök kël tösilôtu nö in chu, yĕh meuk, hĕng ök tökūichö inrē tölirōlö linöömö in e;

¹⁰Haṙĕhnyö e anga-aṅ nö i kūö chu; kūichö mat angū-ö nö lā kūö lā uk inrē, in e nö kūichö nup ṙô inrāmöre, miṙivlōn öt kanôlò inrē.