Read Car_Nicobarese ISIKĪ-ĔL 20 Bible Online

ISIKĪ-ĔL 20 - Car_Nicobarese bible

ISIKĪ-ĔL 20

¹Im sinātö samyeūheu, im tinneūyö chingëṅt, im sinömö sakāmö ngam chingëṅt, yihtöre yik rēvre mā aṅ Israel nö hatönken ngam Mā Tēv, ngaich ūichngöre nö i kūö chu.

²Yih ngaich nö in chu ngam ṙô ngam Mā Tēv:

³Kūön tarik, vë-ekūö yip mā aṅ Israel,ngö ṙô tö cha, Ngö ṙô an ngam Mā Tēv, mahatönken chu öi yih? Sā chu tö-aṅ, ṙô ngam Mā Tēv, hö-ö chin hòṅ hatönka tö yīö.

⁴Hōḵ öm akah fālen cha, kūön tarik hōḵ öm akah fālen cha? Mikahtölōn cha chēi tö nup sin-òkkūö aṅ in yik yöng cha,

⁵Ngö ṙô tö cha, Ngö ṙô an ngam Mā Tēv: Ik sakamö hē chu atöllen Israel, chūökuṙô chū-ö ip kūön aṅ patī Yāköp, mikahtökūö cha tö e ip panam Aikup, chūökuṙô chū-ö tö cha, öich ngö ṙô, Chū-ö chin Mā Tēv, Tēv yīö.

⁶Ik sakāmö angū-ö chūökuṙô chū-ö tö cha tö chu min kēnyen cha ṙāngö öp panam Aikup ip panam öp chahöh chu chööḵnyen tö cha, öp panam töhëmö aṅkūö tö aṅteh hönī inrē tösamötlöng vanāyö tö taṙòkhöre panam.

⁷Ngaich ngö ṙô chu-ö tö cha, Kavalngö nup sin-òkkūö hatīönkö minë mat yīö, ṙòkhöre yī-ö hachōichngöre inrē i nup insātev aṅ Aikup; chū-ö chin Mā Tēv, Tēv yīö.

⁸Ahôngen chu pöri cha-a sōḵ inrē nö hangṙô chu; hö-ö cha-a nö kö kavalngö nup sin-òkkūö hatīönkö nup mat cha, öt rēhĕn cha-a nö ṙāngö nup insātēv aṅ Aikup. Ngaich ngö lōn chū-ö hòṅ vōknyö öp lanīnöre chin i kui cha keuheūttö öp tanānyöre inrē lā-alcha ellōn öp panam Aikup.

⁹Ngaich pöri chū-ö höng sā inlahen ngam minë-eny chu, öich sōḵngen e nö hachōichi nö i kuö pumnāmö tarik i yip chūök cha nö iyöng, yip mameūkö chu mikahtökūö cha töre i kinënyö cha nö ṙā-ang im panam Aikup.

¹⁰Hachōḵyen cha chū-ö ngaich ṙāngö ngam panam Aikup ngaich kēten cha nö eltönyalnyi.

¹¹Kē-ĕkūö cha chū-ö tö minë tökūichö chöngö hameukhö mat cha inrē töminë töhaköpö ngaich aṅ min tarik.

¹²Hēk inrē chū-ö kē-ĕkūö cha tö minë töhet sakāmö chu, nö sā minkahngö ihôi chu tö cha, hòṅ cha nö akahalōn tö chu öich Mā Tēv ma-ahetlö u.

¹³Ahôngen chu pöri ngam patī Israel nö el tönyalnyi; rö-ö cha-a nö lök I nup tökūichi chöngö chu sōḵ ngen minë chöngö chu pöri, minë töhaköpö tö tarik ngaich aṅ min; pōihāngen tī cha-a inrē nö hachōichngö minë töhet sakāmö chu. Ngaich ngö lōn chū-ö ṙösnyö ngam lanīnöre chin min i kui cha el tönyalnyi, öich ahatngen cha.

¹⁴Ngaich pöri chū-ö sā inlahenre tökūö ngam minë-eny chu, hòṅ e nö öt hachōichi nö i kūö pumnāmö tarik, yip mameuktī chu kēnyen cha.

¹⁵Hēk inrē chū-ö chuökuṙô in cha el tönyalnyi tö chu min ötkēten cha ip panam öp kahëtö chu in cha, öp panam töhëmö aṅkūö tö aṅteh hönī inrē, tösamötlöng vanāyö tö taṙòkhöre panam,

¹⁶Pò cha nö sōḵo në chöngö chu öt lök el në tökūichö chöngö chu, hachōichngö në töhet sakāmö chu inrē; pò öp ellōn cha nö tömrit nup insātēv cha.

¹⁷Ngaich pöri ngih mat chu nö ṙālen cha, öt fëlngen cha chū-ö inrē hēk öt ahatngen cha nö el tönyalnyi.

¹⁸Ngaich ngö ṙô chū-ö tö yip kūön cha el tönyalnyi, Uh yin lök i nup tökūichö chöngö yik yöng yīö, ui rēhĕn haköpkö nup chöngö cha, ui rēhĕn hachōichngöre i nup insātēv cha.

¹⁹Chū-ö chin Mā Tēv öich Tēv yīö, lök i në tökūichö yin chöngö chu, ṙēmen inrē haköpkö në chöngö chu,

²⁰Ahetlö minë töhet sakāmö chu hòṅ u nö minkahngö ihôi yīö tö chu, hòṅ yīö akahalōn tö chu Mā Tēv öich Tēv yīö.

²¹Ngaich pöri yik nyīö nö ahôngen chu; öt lök i nup chöngö chu cha-a tökūichö, öt haṙēmngenre inrē nö haköpkö minë chöngö chu, minë töhaköpka tö tarik ngaich aṅ min; hachōichngö minë töhet sakāmö chu cha-a. Ngaich ngö lōn chū-ö ṙösnyö ngam lanīnöre chin min i kui cha ane inrē keuheūttö ngam tanāyöre in cha el tönyalnyi.

²²Haköp këlre pöri chū-ö ngaich sā inlahenre tökūö ngam minë-eny chu hòṅ e nö öt hachōchi nö i kūö pumnāmö tarik yip mameuk tī chu kēnyen cha.

²³Hēk inrē chū-ö chūökuṙô in cha el tönyalnyi tö chu min pirātngen cha in vē pumnāmö tarik piyāingen cha inrē nö i në panam,

²⁴Pò cha nö öt kēkö kaha minë chöngö chu, sōko minë chöngö chu pöri tökūichö hachōichngö minë töhet sakāmö chu inrē, minë mat cha inrē nö tēlta nö i nup insātēv yik yöng cha.

²⁵Hēk inrē chū-ö kētö chöngö tökūichö in cha nuk tö ötlöök ane inrē chöngö öp lökten cha nö ötkô nö nômu:

²⁶Ngaich chū-ö inrē hachōichngen cha lökten i nuk kahëtö cha öich vīten cha nö kētö lanòh kūön re nö i kūö tameūyö, pò chu hòṅ pinhëtökūö cha; tī chu angū-ö hōten cha nö akahakūö tö chu öich Mā Tēv.

²⁷Lökten, kūön tarik vë-ekūö öp patī Israel ngö ṙô tö cha, Ngö ṙô an ngam Mā Tēv: I ngih nö hēk yikyöng yīö nö hachōichngen chu, nö michūḵ inlahen chanökhutī tö chu.

²⁸Pò chu hē chu kēten cha i ngih panam öich chūökuṙô kētö e in cha, ngaich yē cha nöng meuk tömarô-òlkui rung hēk tölīpö rōi chōn in e cha-a ngaich nö kētö tökētu ngaich kētö inrunnyö lanīnö aṅ i nup kahëtö cha; in e cha-a nö söömlö nuk tökuchīkö tinveūkö, in e cha-a inrē nö ṙösnyö tökētu tö-ôkö tö cha.

²⁹(Ngö ṙô chū-ö tö cha, Asūöng ngamuh tömarô-òl chūök ngam kū-ö meh kiröönngöre? Lökten ap minë-eny e nö havëka nö Pāmah söl ing töngamuh.)

³⁰Lökten ngö ṙô tö ngam patī Israel, Ngö ṙô ngam Mā Tēv: Hòṅ hachōichngöre öyih sā inlahen yik yöng yīö nö halō-ongkūöre nö tömrit nup sin-òkkūö in cha?

³¹Yē meh kētö nup kahëtöre kētö kūön re inrē tö kikōnyö i kūö tameūyö, hachōichngöre me-eṅ i nup insātēv meh söl ing töngamuh. Ngaich chū-ö min hatönka tö meh, ō patī Israel? Sā chu tö-aṅ, ṙô ngam Mā Tēv hö-ö chin hòṅ hatönka tö meh.

³²Nup mi-i ellōn meh öthētu min nö teungten ap kuilōn, Tā-a töi sā yip pumnāmö tarik, sā miyöngö nup panam, öi vë-ekūö chōn ihong inrē.

³³Sā chu tö-aṅ, ṙô ngam Mā Tēv, kô-en chin aṅtī tö tökalēḵ kël töteuthak kël inrē holtö lanīnö inrē ṙösnyö e, chū-ö chin min rācha i kui yīö.

³⁴Kēnyen yīö chin min ṙā-ang in yip tarik hamūlö yīö inrē ṙā-ang i nup panam i chūök yīö pirātiyö, aṅtī tö tökalēḵ kël töteuthaka inrē kël, holtö ngam lanīnö nö ṙösnyuvö;

³⁵Kēten yīö chū-ö min inrē el tönyalnyi yip tarik, ngaich in e chū-ö min akah fālen in yīö havööhen höökūö.

³⁶Sā chu misī akah fālen yik yöng yīö el töyalnyi ip panam Aikup, ngatī chū-ö min akah fālen yīö, ṙô ngam Mā Tēv.

³⁷Ngaich vīten yīö chū-ö min lök el katòh ngam tinkung, hökngen yīö min inrē kiröönngöre i tum tak re.

³⁸Ahetngö yip töminôṙô chin min in yiö, acha-a inrē yip tötôichngen nö in chu; kēnyen cha chin min ṙā-ang ip panam chūök cha nö rahëchtaṙen nö iyöng, hö-ö pöri cha-a min nö kuhēthötre nö i panam Israel. Ngaich akahalōn yī-ö min tö chu öich Mā Tēv.

³⁹Yī-ö pöri, Ō patī Israel, ngö ṙô an ngam Mā Tēv: Kuṙòh kö lök la-en insātēv re yin, töngamuh unôichrit ngih inrē, yē yīö min öt hangṙô chu; hö-ö pöri yī-ö kô hēk hachōichngö ngam minë-eny chu i nup kahëtö yīö i minë insātēv yīö inrē.

⁴⁰Pòn i kui ngam töhet rôngö chu, ngam kui ngam rôngö Israel, ṙô ngam Mā Tēv, in e aṅ patī Israel nö ṙòkhöre, ṙòkhöre cha-a min nö lök la-en chu nö im panam; umuh chū-ö min hō-en cha, umuh inrē chū-ö min havëkö nup tī yīö nup tī yīö nup tö-atöllöng inrē inlōnti aṅ in yīö, holre tö nup taṙòkhöre töhet kahëtö yīö.

⁴¹Nö sā tötahūsa tinveūkö nö ahō-o chu min in yīö, yē chu min kēnyen yīö ṙā-ang in yip tarik, hamūlö yīö inrē ṙā-ang i nup panam chūök yīö pirātiyö; ngaich chū-ö min inrē hameuktö ngam hanëtöre in yīö i kūö yip pumnāmö tarik.

⁴²Ngaich yī-ö min akahalōn tö chu öich Mā Tēv, yē chu min kēten yīö i panam Israel, ngam panam kinë-eṅkūö yik yöngyīö tö chu öich chūökuṙô.

⁴³Ngaich in e yī-ö min fē-ĕlre tö nuk talöökö yīö nuk la-en yīö inrē nö ṙòkhöre aṅtī yīö hachōichngöre; ngaich yī-ö min sa-òkkūö töre tökūö nup tötlöök kahëken yīö.

⁴⁴Ngaich yī-ö min akahalōn tö chu öich Mā Tēv, yē chu min lök alaha yīö tö pòkūö ngam minë-eny chu, hö-ö nö asā-a nup tötlöök talöökö yīö, öt rēhĕn nö asā-a nup töchōich la-en yīö, Ō patī Israel, ṙô ngam Mā Tēv.

⁴⁵Ngaich yih ngam ṙô ngam Mā Tēv nö in chu:

⁴⁶Kūön tarik, havöötökūöre man kū-ötö lā lòhngö, mumkahten lā-al ngam lā lòhngö vë-eny mu-unôich inrē lā-al ngam el inchōn panam i Nēkep;

⁴⁷Ngö ṙô tö ngam el inchōn i Nēkep, Hangṙô ngam Mā Tēv: Ngö ṙô an ngam Mā Tēv, Yĕh meuk tōttökūö tameūyö chin min in meh ngaich angū-ö min nö ṙāpngökūö tö nup tö uhāv chōn in meh keuheūtngöre vah inrē tönyangngö chōn; öt hanyāngikūö ap min töhūṙökūö, ṙòkhöre min arëkūö löktökūö lòhngö söl kapā min nö ngesngö tökūö e.

⁴⁸Ṙòkhöre min tarik nö meuk tö chu öich chū-ö Mā Tēv tamôttökūö e; öt hanyāngikūö ap min.

⁴⁹Ngaich ngö ṙô chū-ö, Aōla Mā Tēv! Ngö ṙô yip tö chu, Hö-ö apa nö vamī inchōḵoṙô?