Read Car_Nicobarese ISIKĪ-ĔL 22 Bible Online

ISIKĪ-ĔL 22 - Car_Nicobarese bible

ISIKĪ-ĔL 22

¹Hēk inrē ngam ṙô ngam Mā Tēv nö yih nö in chu, nö ngö ṙô.

²Ngaich me-eṅ min akah fālen, kūön tarik, hōḵ ömeh akahfālen ngih tömahāmutī elpanam? Yēi chei vë-enynang ò tö nup taṙòkhöre sin-òkkūö la-en ò.

³Ngö ṙô pömchö, Ngö ṙô an ngam Mā Tēv: Öp elpanam kumtaknyö mahām nö ellōn re, yih öp nö ngaich ṙētak e, öp vamī insātēv inrē nö hachōichngöre!

⁴Ngaich man vītöre fāluṙen lökten i mahām ngam kitaktö meh hachōichngöre inrē i nup insātēv nup vahī meh; ngaich man inrē kētö ngam sakāmö re nö röhta, ngam töhakāmi ṙētak minë samyeūheu meh nö ngaich nö yih. Lökten chin vīten meh minṙēngö i vē pumnamö tarik, nāichngen inrē in në panam.

⁵Acha-a yip töröhta cha-a inrē yip tömarôvat tö meh min nö ha-āichngen meh, me-eṅ tötlöökö ineūka, tööḵlö tinṙōlen.

⁶Yĕh meuk, yip kūön rācha Israel in meh kö i minā-aṅre, nö tönglōn tö kintak tö mahām.

⁷Kikōnyö yöng, kikānö yöng inrē nö hayë-eiṙen nö in meh; kihngen yip törahëichtaṙen nö iyöng tökūö inteūgö kinë-eṅ rupīö nö ellōn meh; yip kūönyōich tafiösī inrē in meh nö i kūi inyëḵngen.

⁸Öt kūötenre man tö nup töhet in chu, hachōichngö minë töhet sakāmö chu inrē.

⁹Tarik yip umuh in meh yip samūöicha ngaich kitaknyö mahām, tarik inrē yip in meh yip nyamā-aṅvkūö nö i kui minë rôngö; tarik kamëken töthet la-en nö ellōn meh.

¹⁰In meh yip tarik lamuhngö hilā yöng re tö kikōnyö; in meh cha-a yip yāich kikānö yip tö-öthet nö im öt hanëtö cha.

¹¹Hĕng tak kamëken sin-òkkūö nö i pīhö ngam holre; tahëng taka töchōichen nö hachōichngöre nö i kankūön re; tahëng in meh mahachōich ngöre nö i kanānö re, kikanö kūön öp yöng ò kikōnyö.

¹²In meh yik tarik kamë raneushöre nö kitaktö mahām; ngaich me-eṅ ṙūöten ṙūölö kanôlò inrē vī taneūngenre inrē in yip holre i intēungö kahë re tö rupīö; ngaich me-eṅ vaichngen chu, ṙô ngam Mā Tēv.

¹³Yĕh meuk, lökten, fatāk eltīre chin im michūḵṙen taneūngen meh ngam vahīlö meh, im mahām inrē ngam më-ellōn meh nö ngaich.

¹⁴Kô öng ngam kumlēḵ meh nö keun, hēk kô ön minë kël meh nö kalēḵ, i nup sakāmö chu min lök alaha meh? Chū-ö chin Mā Tēv töṙô-òvö, la-evṙen min inrē tö e.

¹⁵Pirātngen meh chin min in vē pumnāmö tarik piyāingen meh inrē keuheūt në panam, ngaich inrē min chū-ö mīktö nup mum meh nö ṙā-ang in meh.

¹⁶Ngaich chū-ö min inrē hachōichi i kūi vē pumnāmö tarik pòkūö meh; ngaich akahalōn min me-eṅ tö chu öich Mā Tēv.

¹⁷Ngaich yih ngam ṙô ngam Mā Tēv nö in chu:

¹⁸Kūön tarik, vītöre an nö in chu ngam patī Israel nö yeich; ṙòkhöre anū-ö, rupīö, mās, kôpöre, vët pirum inrē nö i kūö töhū tameūyö, nö vīngöre nö yeich.

¹⁹Lökten ngam Mā Tēv nö ngö ṙô; Pò yīö ṙòkngöre vīngöre yeich, lökten, yĕh meuk, hamūlö yīö chin min ellōn Yērusalem.

²⁰Sā yip tarik nö hamūl rupīö, mās, vët, pirum, kôpöre inrē nö i kūö töhū tameūyö nö föölö kūö tameūyö nö i kui e pòn hōten e nö yëngö; ngatī chū-ö min hamūlö yīö ip tanānyö chu lanīnö chu inrē, öich chaplen yīö ël e öi miyëṙi.

²¹Hamūlö yīö chin min föölö kui yīö inrē aṅtī tö tameūyö lanīnö chu, ngaich yī-ö min yëngö ellōn e.

²²Sā rupīö nö miyëṙi nö i kūö töhū tameūyö,ngatī yī-ö min miyëṙi ellōn e; ngaich yī-ö min akahalōn tö chu öich Mā Tēv ṙamösnyö ngam lanīnöre i kui yīö.

²³Ngaich yih ngam ṙô ngam Mā Tēv nö in chu:

²⁴Kūön tarik, ngö ṙô tö ò, Panam man me-eṅ öm töt ahetlöng, hēk öt kumṙahtukui ik sakāmö lanīnö chu.

²⁵Yip kūön rācha ellōn ò nöng sā sumṙöp lāyön nö tich pôḵre; ngaich yip nö ngeūṅktö nômö tarik; ngaich yip nö kē kanôlò töpōi ṙāi chehen inrē; pōyen tī yip tö fafiösī nö ellōn e.

²⁶Ngaich yip kūönṙô ò nö chökhuṙen nö im chöngö chu hachōichgö nup töhet chu inrē; hö-ö yip nö harīkngöre tī tö töhet tö töngha-eh inrē, öt rēhĕn yip nö haköptö inrīkngö ngam töthet tö ngam töhet, öt chumkūöṙen cha-a inrē tö në töhet sakāmö chu, lökten chu hachōichi in cha.

²⁷Yip kūön rācha ellōn e nöng sā nup am aṅ elinchōn nö chiṙes pôḵre, kitakyö mahām, fëlngö nômö nö kē tömichūḵṙen taneūngen.

²⁸Yip pròfĕt ò inrē nö lūöpö cha tö tö-isoh mak lanit, meuk minyôiny-aṅ mineūkö minyôiny chinòng alaha inrē nö in cha, nö ngö ṙô, Ngö ṙô an ngam Mā Tēv, Yĕn rö-ö ngam Tēv nö ṙô-òvò.

²⁹Yip tarik aṅ ngam panam harūnöre nö kil ulāya inrē; hakihten yāich yip töhāṅten inrē, kil yip törahëichtaṙen nö iyöng nöng öt haṙënhangen.

³⁰Ngaich chū-ö chöh tarik in cha öp vamīlö ngam kinlōngö sökhak inrē nö i kui tömëngö kaha nö i kūö chu nö lanaklö ngam panam, hòṅ chu öt tiṙölngö e; öt hĕng tak kanôtökūö pöri chū-ö.

³¹Lökten chu ṙösnyö ngam lanīnöre i kui cha; haṙāpngen cha chin i kūö tameūyö ngam lanīnö chu; havahlö ngam talöökö cha chin nö i kui cha, ṙô ngam Mā Tēv.