Read Car_Nicobarese ISIKĪ-ĔL 23 Bible Online

ISIKĪ-ĔL 23 - Car_Nicobarese bible

ISIKĪ-ĔL 23

¹Ngaich yih ngam ṙô ngam Mā Tēv nö in chu:

²Kūön tarik,nët tak nap umuh kikānö, kūön öp töhĕng tak yöngnyīö,

³Inyihköre cha-a nö i Aikup; inyihköre cha-a nö i inyālö cha; in e nup teh cha nö kiröichka lūölkaṙen inrē ök rinëlö cha.

⁴Ōhōlah minënyi ök maṙöinylö ane inrē Ōhōlipāh minënyö ök kanānö ò. Ngaich cha-a nö chū-ö chu; kūönu cha-a ngaich tö kikōnyö kikānö inrē. Minë minë-eny cha, Ōhōlah an Samariā, ane inrē Ōhōlipāh an Yērusalem.

⁵Inyihköre an Ōhōlah i saha ò nö chū-ö chu; ngaich anga-aṅ nö mikahngö yip hanāngenre aṅ Asiria.

⁶Kumyung tö-inyuttö tököinyö nganāvömat, mahayöng yöngṙen kumyung inrē, ṙòkhöre cha-a nö lōn nö ṙāl tarik, i uk kōra tarik aṅ uk kōra.

⁷In cha anga-aṅ nö kētöre nö tö-inyihka, ṙòkhöre cha-a aṅ Asīriā nö tarik atöllöngö; ngaich anga-aṅ nö hachōichngöre nö i nup insā tēv kö in nup tömikahayö tö ò.

⁸Hö-ö anga-aṅ nö ṙāngenre nö im innyihköre ngam harunken ò hē nuk sakāmö ò nö i Aikup; pòn ik inyālö ò tarik nö ṙōlhaka nö in ò ngaich lūölken ök rinëlö ò ngaich in ò tī nö vōknyö ök yanālö tö tötlöök.

⁹Lökten chu kēten ò eltī yip hanāngen ò, eltī yip aṅ Asīria, yip tömikahāyö tö ò.

¹⁰Luhngö hilā ò cha-a vē nö ngaich; kē yip kūön ò kikōnyö kikānö inrē; fëli anga-aṅ ngaich tö cha nö aṅtī tö sanët; ngaich anga-aṅ nö kūöngô nö i kikanö, hē öp inkaha fālen nö kēkaṙen nö in ò.

¹¹Meuk ngih öp kanānö ò Ōhōlipāh, Sönngenre anga-aṅ nö mötlö nö chōich nö im tī ò nö mikahang nö im innyihköre, ngam töhöichngen tö ngam im kanānö ò.

¹²Mikahang anga-aṅ nö in yip aṅ Asīriā, mahayöng yöngṙen kumyung inrē, kumyung tökeukeūtlöre aṅ in tö lanaklöre i uk kōra tarik mi-ī uk kōra, ṙòkhöre cha-a nö lōn nö ṙāl tarik,

¹³Ngaich meūkan chū-ö nö ngaich nö chōich; nëtre taka cha-a nö kēḵ ngam töhĕngren talöökö.

¹⁴Ngaich pöri anga-aṅ nö ṙūhöl rô-òl kūö re nö kēken ngam innyihköre, meuk insā tarik anga-aṅ nö i kaha kinlōngö, insā aṅ Kāltī nö kūichö nö ngāṅvö el mat.

¹⁵Hamöptöhëch inmöpṙat kachūka vanön kui nö i kui re, ṙòkhöre cha-a nö sā mineūkö yöngṙen kumyung, insā yip aṅ Pēpilön yip tö panāmuvö tö Kālti.

¹⁶Hē ò nö meūkö cha ngaich mikahngen cha anga-aṅ, ngaich söömngö ma-ahōngö nö in cha nö i Kālti.

¹⁷Yih ngaich yip aṅ Pēpilön nö in ò nö el chamam hanāngenlōn, ngaich cha a nö hachōichngen ò nö im tötlöök yanālö; ngaich unôichngöre anga-aṅ nö mūmuvö tötī cha, havööngökūöre ngaich agna-aṅ nö ṙā-ang in cha nö sa-òk kūö.

¹⁸Hē ò nö kēken ngam innyihköre nö hangālnyöre ahuilö linchôyöre inrē havööngökūöre chū-ö ngaich tö ò öich sa-òkkūö, sā chu havööngökūöre töp kanānö ò.

¹⁹Möölö inlaha anga-aṅ nö ṙūöhlenre nö im innyihköre, köpölōn tö nuk sakāmö inyālö re, hē ò nö inyihköre nö ip panam Aikup.

²⁰Ngaich mikahngö yip tö-āṅngöre lahök alaha umuh, yip tumtakcha töng sā köttö, yip tökūönu inrē tö tösā kōra.

²¹Ngatī me-eṅ meūkken tötlöök la-en meh öm nyīö, hē yip aṅ Aikup nö lūölkö elngòh meh kiröich minë kun teh meh inrē.

²²Lökten, Ō Ōhōlipāh, ngö ṙô an ngam Mā Tēv: Yēh meuk, hachohkö lā-al meh chin min më hanāngenlōn ṙeūngö meh havööngökūöre öm sa-òkkūö, kēten cha chin min inrē nö lā-al meh nö keuheūttö e la-a lökti:

²³Yip aṅ Pēpilön ṙòkhöre inrē aṅ Kālti, Pikòt Sō-a, Kō-a, ṙòkhöre inrē aṅ Asiriā nö hol cha, lōn nö ṙāl tarik, ṙòkhöre yip mahayöng yöngṙen kumyung inrē in cha, kumyung mākūö kumyung inrē, ṙòkhöre cha-a nö i-uk kōra.

²⁴Ngaich yih min cha-a nö lā-al yīö löktö inröl chūök yip tömaṙôngö inrē tarik inröl; ṙòkhöre min cha-a nö söklöre nö lā-al yīö nö keuheūtngöre lā-a nö lanaklu tö tökūöṅnö kiröng inrē, sapīövu inrē, ngaich chū-ö min kēten öp inkaha fālen nö in cha, ngaich cha-a min nö akah fālen yīö nö asā öp in cha inkaha fālen.

²⁵Ngaich chū-ö min hachōkūö ngam lanīnöre lā-al yīö-hòṅ cha nö lök alaha yīö nö holtö tanānyöre. Ṙatī elmeh yin min tö cha nang yīö inrē, ngaich yip tö-aṅ min inyīö nö fukngö tökūö sanët. Kē-ĕ yip min kikōnyö kūön yīö kikānö inrē, yip tö-aṅ in yīö inrē min nö ṙāpngö tökūö tameūyö.

²⁶Luhngö nup inyut yīö yip inrē kēngö nup inyut yīö yip min inrē kēngö nup tövai yanöṅtö yīö inrē.

²⁷Ngatī tī chin min keuheūtngen tötlöök la-en yīö öp inyihköre tö yīö inrē kum yīö ṙā-ang panam Aikup; hòṅ yīö min öt môklökūöre in yip aṅ Aikup hēk öt ōtre kanöpölōn tö cha.

²⁸Pòn ngö ṙô ngam Mā Tēv: Yĕh meuk kēten yīö chin min eltī cha yip surīkhö yīö, eltī cha yip chūök yīö havööngökūöre öi sa-òkkūö;

²⁹Ngaich cha-a min nö lök alaha yīö nö surīkhen yīö, kēngö nup ṙòng la-en yīö inrē; ṙāngen yīö inrē chumlal öt aṅhāṅv alaha, hameuknyu min inrē ngam linchôyö yīö inyihköre. Ngam töchōich la-en yīö inyihköre inrē.

³⁰Tö kumtö ngih nö i kui yīö, pò yīö nyamkö innyihköre in vē pumnāmö tarik, hachōichngöre inrē i insātēv cha.

³¹Ngaich yin lök talöökö ök kanānö yīö; lökten chin min kētö öp chūök òk ò nö elti yīö.

³²Ngö ṙô an ngam Mā Tēv: Òk kūö chūök òk öp kanānöre yin öp tö-aṙū-utī ël tökiröng inrē; hayīöli yin min minôniṙen inrē, pò e nö pōyen aṅ;

³³Tööḵngen yin min töhinyōyö miṙivlōn inrē, hĕng öp chūök òk nganāng alaha inhatngö inrē, ök chūök òk öp kanānö yīö Samariā;

³⁴Ôkö e min me-eṅ ahatlörit e inrē, teukngö keūyöre inrē, kayôt elngòh re inrē; pòn ṙô chu, ṙô ngam Mā Tēv.

³⁵Lökten an nö ngö ṙô ngam Mā Tēv: Pò yīö vaichgö tö chu kavalngen chu inrē lā-uk yīö, lökten keun fālen nup öt lanöökö yīö inyihköre inrē.

³⁶Ngö ṙô An ngam Mā Tēv tö chu: Kūön tarik hòṅ akah fālen Ōholah ö meh Ōholipā inrē? Ngaich vë-enynang cha chĕi tö nup sin-òkkūö la-en cha.

³⁷Tön asēha yip aṅhaṅv eltī inrē tö mahām; aṅtī tö nup insātēv re cha-a nö asēha; uroh inrē cha-a nö kē-ĕkūö u tö nyā-aṅkūö tö kikōnyö nyīö yip hakūöntö cha nö in chu.

³⁸Hēk inrē ngih tī cha nö in chu: Hachōichngö ngam töhet chūök chu yin im sakāmö angū-ö hachōichngö në töhet sakāmö chu inrē.

³⁹Pòn hē cha nö ṙātnyö likeun yik nyīö kūön cha nö tökētu i nup insātēv cha, im sakāmö angū-ö cha-a nö yih el ngam töhet chūök chu nö hachōichngö e. Yĕh meuk, angaū-ö an ngih tī cha nö el ngam patī chu.

⁴⁰Tīnngö mahavëtö tarik cha-a nö yih ṙā-ang tömarôvat, yip lööṙö öp mahavë-a, yĕh meuk, yih cha-a ngaich. Höngken cha me-eṅ öm vōköre, sun mat re inrē, ngaich hanyöṅtlöre tö yanöṅtöre.

⁴¹Ūichhak me-eṅ ngaich el anūchö mā, ṙātu öp mīs i kūö e öp töchaplöng aṅ tö meh tö tötahūsa tavī-i chu inrē.

⁴²In ò ngaich öp ṙënṙô yip Töng chulööṙen tömaṙôngö; i tarik inrē yip töng tarīkaṙa mihiyōi-aṅ. Kēnyuvö nö ṙā-ang el tönyalnyi silöthöt merkul cha-a inrē nö i kël yip kikānö; tövai inrē sapīöv i kui cha.

⁴³Ngaich ngö ṙô chū-ö, Öt asĕha yip tarik töngamuh hē cha nö harūnöre i innyihköre nö in ò?

⁴⁴Tön ngaich yip nö chu in ò, sā tarik kumhēthötre nö in mi-īnyihköre. Ngatī cha-a nö kuhēthötre nö in Ōhōlah in Ōhōlipah inrē nö kēken tötlöök la-en.

⁴⁵Ngaich pöri min yip tölöök tarik nö kētö öp inkaha fālen nö in cha nö sācha tö sācha ma-asĕha kikānö, ane inrē sācha tö sācha kikānö kumtaknyö mahām; pò cha nö ma-asĕha nö kikanö, eltī cha inrē ap mahām.

⁴⁶Pòn ngö ṙô ngam Mā Tēv: Kētö tömaṙôngö lā-al cha, vīten cha inrē nö chööḵnyö, pinhë-eṅkūö inrē nö chehen.

⁴⁷Ngaich yip tömaṙôngö min nö kulehe cha tö ihong fëlngen cha inrē nö aṅtī tö sanët; fëlngen yip kūön cha kikōnyö min cha-a tö yip kūön cha kikānö inrē, föngtökūö nup patī cha inrē.

⁴⁸Ngatī tī chin min keuheūtngen ötlanöökö im panam, hòn ṙòkhöre yip kikānö nö kē vinëköre hòn öt lūölken öt lanöökö nö sā yīö yī-ö ngaich.

⁴⁹Ngaich in yīö min öp öt lanöökö nö havëka, ngaich yī-ö min keun sācha tökööl re i vinë-eṅkūö insātēv; ngaich yī-ö min akahalōn tö chu öich Mā Tēv.