Read Car_Nicobarese ISIKĪ-ĔL 24 Bible Online

ISIKĪ-ĔL 24 - Car_Nicobarese bible

ISIKĪ-ĔL 24

¹Im minchūötöre samyeūheu, im sinömö chingëṅt, im sinömö sakāmö ngam chingëṅt, ngam ṙô ngam Mā Tēv nö yih nö in chu:

²Kūön tarik, kūich mine-eny ngih sakāmö man ngih sakāmö takô. Ngaich an ngam rācha aṅ Pēpilön nö kayīngö Yērusalem i ngih sakāmö takô.

³Ngaich kaknyöre tö inchōḵoṙô nö i ngam patī ma-ahôngen ngaich ngö ṙô tö cha, Ngö ṙô an ngam Mā Tēv: Nyatlö ngam tanīöyö, nyatlö, e asëlö mak inrē:

⁴Chaplö aṅ e tö tösēnyö alaha, ṙòkhöre nup tövai tösēnyö, takeun kūökël inrē; hatöö-öl e tö tö-atöllöng tangëḵ.

⁵Kē hĕng nòng tö-attöllöng in nup pököre, hamūllö nup ngòh elkatòh e; nup töpanyënya, sum nup tangëḵ ò inrē ël e.

⁶Lökten an ngam Mā Tēv nö ngö ṙô; Ötkôlò ön ngih tömahāmu elpanam; tötkôlò ngam tanīöyö töyëchu nö ël e, ngam töt chuh ngöre yech nö ṙā-ang ël e! Kēlö nup aṅ e hĕng hĕng milôhò, nö un tö-atölka.

⁷Kūö ngam mahām kitaknyö ò nö ṙòngmö ellōn ò; i kui ihong tī an tö e, hö-ö an nö el tumlat tī nö tūingö kui e tö tumlat.

⁸Nö harunnyö lanīnö chu, öich havahalre, öich ṙātö öp mahām i kui öp ihong töt aṅhāṅv kūö öp kitaknyö ò, hòṅ e nö öt kahultukui.

⁹Lökten an ngam Mā Tēv nö ngö ṙô: Tötkôlò an ngam elpanam tömahāmu! Ṙūölö ngam töfônghaka chin min inrē nö kiröng.

¹⁰Afônglö minë ngòh, tōttökūö ngam tameūyö, kô-òtī sum minë alaha; asënyö ngam hūt inrē, hökngen nup tangëḵ inrē nö föngiyö.

¹¹Ngaich nyatlö e i kui minë ta-ök nö un aṅhaṅvö, hòṅ e nö ṙāch, ngaich ökngö öp mās e, hòn ayëlöngö nup mum ël e, keuheūtngöre yech.

¹²Chök alaha chin höng hacheiköre; hö-ö öp tökufëi yech e nö kiröönngöre tökūö tameūyö.

¹³Öp mum ötlanöökö yīö ap yech e. Pò chu hòṅ ahetlen yīö ngaich rö-ö yī-ö hetlöre ṙā-ang i nup mum yīö, hö-ö yin min hēk ahetlöng hanöng saha chu hatööḵngen ap tanānyö chu in yīö.

¹⁴Chū-ö chin Mā Tēv tö ṙô-òvö; Teungtökūö an min, kēken e chin min; öthō chin min heūlngöre, öt ṙā-al chin min, öt havanrit lōn re chin min; sā nup talöökö yiö la-en yīö inrē öich akah fālen yīö min, ṙô ngam Mā Tēv.

¹⁵Yih inrē ngam ṙô ngam Mā Tēv nö in chu:

¹⁶Kūön tarik, yĕh meuk, ngaich chin hòṅ kēngö ngam kumchik elmat yīö nö ṙā-ang in yīö höng hĕng heuh tī; sön pöri yī-ö min öt haṙivlōn hēk öt peuiny öt rēhĕn min öi kāti makmat.

¹⁷Uhômlöre, uh pöri pōitô; un haṙīvölōn tö kupah. Vönlö kui re, kunröplö röön re inrē; un tilupngö kūö re, un rēhĕn nyā nyā-aṅkūö töhaṙīvölōn.

¹⁸Ngatī ṙô chū-ö vë-ekūö yik tarik tö peuheū, ngaich ik harap ök pīhö chu nö kapah. Ngaich im tahëng peuheū chū-ö la-evṙen asā ök tinölô chu.

¹⁹Ngaich ngö ṙô yik tarik tö chu, Öt hòṅ vë-enynang ih ömeh töp manah në nö in ih, nö sā meh ngatī inlahen?

²⁰Ngaich ngö ṙô chū-ö tö cha, Yih an ngam ṙô ngam Mā Tēv nö in chu:

²¹Ngö ṙô tö ngam patī Israel; Ngö ṙô an ngam Mā Tēv: Yĕh meuk, hachōichngö ngam töhet chūök re chin min, ngam inkeūṙö mina-aṅ yīö, ngam kumchik elmat yīö, ngam kūilōn yīö inrē; ngaich yip kūön yīö min kīköinyö kikānö inrē yip töṙā-ayö tö yīö nö fuk kūö sanët min.

²²Ngaich yī-ö min la-evṙen sā chu chū-ö ngaich: hö-ö yin min tilupngö kūö re, öt rēhĕn nyā-aṅvkūö tö nyā-aṅkūö töhaṙīvölōn.

²³I kui yīö nup min vanön kui yīö inrē nup kunröpö yīö; hö-ö yin min haṙivlōn hēk öt peuiny, höng lëvngö pöri yī-ö min i nup kanöölöre aluhure inrē in höö.

²⁴Ngatī an min Isīkiĕl nö minkahngö nö in yīö; sā nuk tī ò nö ṙòkhöre ngatī tī yī-ö min; Yē ngih nö taichtökūö, ngaich akahalōn yī-ö min tö chu öich Mā Tēv.

²⁵Ngaich me-eṅ, kūön tarik, ip sakāmö hē chu min kē ngam töngëḵ chūök cha nö ṙā-ang in cha, ngam ṙānāmölōn cha ineu-euṅ cha inrē, ngam kumchik elmat cha kuilōn cha inrē, tö yip kuön cha kikōnyö kikānö inrē,

²⁶Ip sakāmö hĕng tak min öp töpāngö yamih nö in yīö nö vë-eny ngam inhānga nö in yīö.

²⁷Ip sakāmö ngam elvāng meh min nö vā-ainykūöre nö ip töpāngö, ngaich me-eṅ min ṙô-òvö öt ngöhören inrē öm öt salōhoṙô. Ngatī inlahen me-eṅ min minkahngö in cha; ngaich cha-a min nö akahalōn tö chu öich Mā Tēv.