Read Car_Nicobarese ISIKĪ-ĔL 25 Bible Online

ISIKĪ-ĔL 25 - Car_Nicobarese bible

ISIKĪ-ĔL 25

¹Yih ngam ṙô ngam Mā Tēv nö in chu:

²Kūön tarik, hakamngö kūö re man kū-ö tö yip aṅ Amôn, in cha ṙô inrē vë-ey yamih.

³Ngö ṙô tö yip aṅ Amön, Hang ṙô ngam Mā Tēv: Ngö ṙô an ngam Mā Tēv Pò yīö ngö Ā! öi I kui ngam töhet chūök chu hē e nö hachōichiyö, kui panam Israel inrē hē e nö vītu nö öt aṅhaṅvkūö, i kui patī Yūtā inrē hē e nö kiröönngöre nö ahöti;

⁴Lökten chin kēten meh in yip tarik aṅ lā chuhöt nö amīnu tö meh, ngaich cha-a min nö vīten elyöngöre nö in meh vītö chūök re inrē nö iyöng nö ellōn meh; nyā ṙòng chōn meh yip min, òk aṅteh yip min nö in meh.

⁵Vīten Rappāh chin min nö nö chūök ūṅt nö nyā kiyôp tö nup el panam yip aṅ Āmön inrē nö kinlōngö pököre. Ngaich me-eṅ min akahalōn tö chu öich Mā Tēv.

⁶Pòn ngö ṙô ngam Mā Tēv: Pò meh fatāk eltī re tirep röönre inrē ṙāmölōn inrē holtö kumnyah elmat re öm in re lā-al ngam panam Israel,

⁷Lökten, yĕh meuk, hateutnyö kël re chin lā-al meh, ngaich kēten meh min sātö kômö chehen in yip pumnāmö tarik; rökngen meh chin min inrē ṙā-ang i tarik vĪten meh min inrē ötkôlò ṙā-ang i nup panam; piyāingen meh chin min inrē. Ngaich möl min me-eṅ akahalōn tö chu öich Mā Tēv.

⁸Ngö ṙô An ngam Mā Tēv: Pòn ngö ṙô Mô-āp, Yĕh meuk, ngam patī Yūtā nö sā nup tahëng pumnāmö tarik,

⁹Lökten chin min luvëḵnyö kūö kaha Mô-āp löktökūö nup elpanam i kuöngö e, ap kanôlò ngam panam, Pĕtyesimòt, Pĕ-almë-òn, Kiriatēm inrē.

¹⁰Kēten e chin min nö hol yip aṅ Āmön in yip tarik aṅ lā chūhöt nö amin cha, hòṅ e nö öt ōtre finëka in yip pumnāmö tarik.

¹¹Kēken inkaha fālen chin min i kui Mô-āp. Ngaich cha-a min nö akahalōn tö chu öich Mā Tēv.

¹²Ngö ṙô an ngam Mā Tēv: Pò Ētöm nö sā mahavahal re nö lā-al patī Yūtā ngaich nö kiröngö fālen nö havahalre nö in cha.

¹³Lökten an ngam Mā Tēv nö ngö ṙô, Hateutnyö kël re chin min lā-al Ētôm, ngaich rökngen tarik töṙeūla inrē ṙā-ang in e; ngaich vīten e min chū-ö nö öt-aṅhaṅvkūö; löktökūö Tēman sölngö i Tetān cha-a min nö fukngö tökūö sanët.

¹⁴I kui Ētöm tī chin min ṙātö ngam invahal lökten eltī yip tarik chu Israel; ngaich cha-a min nö asā öp lanīnö chu inrē; ngaich cha-a min nö akahalōn tö ngam invahal aṅ in chu, ṙô ngam Mā Tēv.

¹⁵Ngö ṙô an ngam Mā Tēv: Pò yip aṅ Filistain nö havahalre kē invahal inrē nö holtö kumnyahlōn nö piyāihanga nö töt chanūhuvṙen kumnyah elmat;

¹⁶Lökten an ngam Mā Tēv nö ngö ṙô, Yĕh meuk, hateutnyö kël re chin min lāḵlö yip aṅ Filistain, ngaich chū-ö min inrē rökngen yip aṅ Chērit, ngaich keuheūtngö vah yip aṅ lākūö mai nö piyāyi.

¹⁷Kēken tökiröng chin min invāhal i kui cha holtö lanīnö chinökṙen. Ngaich cha-a min nö akahalōn tö chu öich Mā Tēv,yē chu ṙātö ngam invahal nö i kui cha.