Read Car_Nicobarese ISIKĪ-ĔL 26 Bible Online

ISIKĪ-ĔL 26 - Car_Nicobarese bible

ISIKĪ-ĔL 26

¹Im kinhuksīön samyeūheu, im raneh sakāmö ngam chingëṅt, ngam ṙô ngam Mā Tēv nö yih nö in chu:

²Kūön tarik, pò Tūrös nö ngö ṙô tö inlahen Yērusalem, Ā, taṙöli ap nö ngaich inkūp yik tarik, ngaich ap nö löpnyukūö nö in chu; tööḵlö chin min, pò e nö ngaich nö tiṙöli,

³Lökten an ngam Mā Tēv nö ngö ṙô: Yĕh meuk, lā-al meh chin, Ō Tūrös, kētö la-al meh chin min inrē tö tömaṙôngö pumnāmö tarik sā ngam mai nö kētö nup mahūvöre nö in meh.

⁴Tiṙölngö kinlōngö Tūrös yip min, likölngö nup chūök chamônga inrē in ò; ngaich chū-ö min inrē kuvātlö ap tumlat ò nö ṙā-ang in ò, ngaich vīten ò nö ihong töt aṅhāṅvkui.

⁵Ellōn ngam mai an min nö chūök mahanyāknyö inhāṅl; pòn ṙô chu, ṙô ngam Mā Tēv; ngaich anga-aṅ min nö pôḵ yip pumnāmö tarik;

⁶Yip kikānö kūön ò inrē min nö fëli tö sanët nö im tökiröng panam. Ngaich cha-a min nö akahalōn tö chu öich Mā Tēv.

⁷Pòn ngö ṙô ngam Mā Tēv: Yĕh meuk kētö kui Tūrös chin min löktö lā kapā tö Nēpukatnēsar rācha aṅ Pēpilön, rāchakūö vē rācha, nö holtö kōra inröl inrē, holtö tarik aṅ uk kōra tömṙôngö inrē kumyung.

⁸Aṅtī tö sanët ap min nö fëlngö yip kūön yīö kikānö im tökiröng panam; kayīngö yīö ap min nö havīlen yīö nö lā-al yīö harunglö rung inrē nö la-al yīö, asöklö nuk lanaklö inrē nö lā-al yīö,

⁹Ngaich anga-aṅ min nö hachiptö kūö nuk sanòng nö I kaha kinlōngö meh, aṅtī tö hönīöng inrē nup chūök meh chônga.

¹⁰Maṙôngö min nup kōra ò nyatngö min me-eṅ tö pitung u kalöka min minë kinlōngö tökūö ṙënṙô tarik aṅ uk kōra ṙënṙô inröl chehen inröl kumyung inrē, hē ò min nö kuhēthötre nö i kūö inkūp yīö sā kunhēthöt öp töhĕng tak nö el öp elpanam öp tö ngaich nö mëngnyi kaha.

¹¹Aṅtī tö nup kinsòh röön kōra ò min anga-aṅ nö röön el minë kanröönö yīö; fëlngö yip tarik yīö min anga-aṅ nö aṅtī tö sanët; fukngö min inrē nö el tumlat nup töngëḵ machööḵlö yīö.

¹²Ngaich cha-a min nö kuhūöm nup kanôlò yiö pôtö nup chehen tö-inyihka inrē; tiṙöli nup min kinlōngö yīö tö cha piyāyi inrē nup tövai patī yīö; suktu min tö cha nö ellōn mai nup ihong yīö, savach yīö tumlat inrē.

¹³Ngaich chū-ö min asökngö ṙô ranöng ṙô yīö inrē tikökṙôre, öt ōtre hināngö min nup tinkökö yīö.

¹⁴Vīten meh chin min töngasnyi kui ihong; ngaich me-eṅ min chūök mahanyāknyö inhāṅl; öt hēk man min vīlöngö; pòn ṙô chu öich Mā Tēv, ṙô ngam Mā Tēv.

¹⁵Ngö ṙô an ngam Mā Tēv tö Tūrös: öthō ön min minë panam i kūö mai nö kayīna i ṙënṙô öp fanukngö meh, hē yip töhanyahka nö alūhure, hē öp finëlhanga nö ellōn meh.

¹⁶Ngaich ṙòkhöre min yip rācha aṅkūö mai nö yôkti nö ṙā-ang el kantēra re kēngö nup tökiröng cha-a inyut re, luhngö nup töchōktu mirun inyut cha inrē; hayūtöre min cha-a nöng kichëyöre; ūichngöre min cha-a në el tumlat nöng kinchëingöre, pingangkūö inrē tö meh.

¹⁷Ngaich cha-a min nö pōitô nö harāmö meh, nö ngö ṙô, Sītih öm ngaich chaṙēvi rā-ang el mai, Ō tö-eūnyu elpanam, ök tökalēḵ nö el mai, me-eṅ tö yip aṅkūö meh inrē, öm mahakeunlö pinhë-eṅre i kui minë tökiröng panam!

¹⁸Ngaich nup kun panam nö kichëyöre Im sakāmö fanukngö meh; Hôṅ, el mai nup kun panam pinngangkūö tö chanūhuh meh.

¹⁹Pòn ngö ṙô ngam Mā Tēv; Hē chu vīlen meh elpanam öm töpiyāyi, sā nup elpanam töt aṅhāvkūö, hē chu kēlö ngam mai nö i kui meh, minë yöng mai inrē nö kahultö kui meh,

²⁰Ngaich chū-ö min kuringten meh lataṙeū hol cha yip yamônti nö El Anūlö in yip tarik misi viten meh chu-ö inrē iyöng ip panam lāmuh, in nup tinṙöltit nuk ranehlö, hol cha yip chamuh El Anūlö, hòṅ meh min öt iyöngökūö hēk öt chūök i panam yip tö-aṅ.

²¹Kēten meh chin min ip pinhë-eṅkūö manāngen, ngaich me-eṅ min öt ōtren; pòrô me-eṅ chöhö, öt hētu min me-eṅ hēk kôti, ṙô ngam Mā Tēv.