Read Car_Nicobarese ISIKĪ-ĔL 27 Bible Online

ISIKĪ-ĔL 27 - Car_Nicobarese bible

ISIKĪ-ĔL 27

¹Yih ngam ṙô ngam Mā Tēv nö in chu:

²Ngaich man töngamuh, kūön tarik pōitô haramngö vah Tūrös,

³Ngö ṙô inrē tö Tūrös, öp mī-iyöng ip lökhöt öp; mai, mī-inyih aṅ in yip tarik i nup töpōiyen panam i kuö mai, ngö ṙô an ngam Mā Tēv: Ō Tūrös, ngö ṙô man yih, Sööḵlö vanāyö chin.

⁴Ellōn mai nup kūöngö meh; sööḵlö vanāyö tī yip mamānlen meh.

⁵Vī nup savach meh yip nö för chōn aṅ Sēnīr; ṙēu-eung Lēpanön yip nö kē sītör nö vī kanāmö meh.

⁶Nup ōk aṅ Pasān vī-i tö cha nö kaneūt meh; vī pāin cha-a nö tökiröönö meh aṅ i kui mai Saiprös, hapātu kui tö kanël Elefānta.

⁷Ṙeū-eung Aikup nup linen tövayö chinôkti mirun nö intĕh meh, pantēra meh inrē: ṙēu-eung i kūö mai i Ēlaisa tölingūṅ, tököinyö nganāvö mat inrē nö inrūkui meh.

⁸Aṅ Sītōn yip Arvat inrē kameūtö meh; aṅ Sēmör in meh töhuveū-en tarik, cha-a mahachōkūö meh.

⁹Yip mā aṅ Kīpôl in meh töhuveū-en tarik inrē, kafin kūö tanaptö kūö savach in meh; ṙòkhöre nup chōng el mai holtö yip aṅ u, nö in meh inyihkö nup chehen meh.

¹⁰Pörsiā, Lut, Put inrē in yip kumyung in meh nö tarik kumyung; seūlö lanaklö cha-a nö in meh sapīöv inrē; kētö tövai cha-a nö in meh.

¹¹Yip tarik aṅ Arvat Helek inrē nö vinngö nö i kui kinlōngö meh,tarik inrē an Kamat el nup chūök chamônga in meh; seūngö nup lanaklöre cha-a nö havīṙi nö i kaha meh; sööḵlö vanāyö tī cha-a tö meh nö vī-i meh.

¹²Inyihkö chehen yip aṅ Tārsis nö in meh kūö yöng kanôlò meh tö tökeuheūttöre mihëṅṙö; rupīö, vët, kôpöre, pirum inrē ṙī-tī cha tö nup chehen meh.

¹³Yavān, Tupôl, Mēsĕk inrē inyih nö in meh; haṙītö tarik cha-a mās inrē chūökṙen ṙī nup inyihkö meh chehen.

¹⁴Pettōkarmah inṙī-itī tö kōra tö nup chehen meh, kōra kumyung kötta inrē.

¹⁵Yip tarik aṅ Rōt inyih nö in meh; pōyen nup panam lākūö mai chūök innyihkö chehen meh, kētö kanël elefānta cha-a tösah chōn inrē nö inmeh nö ṙāi.

¹⁶Inyih Ētöm nö in meh kūö ṙôken nup chehen meh; haṙī nup chehen meh cha-a tö emëröl, hilā tököinyö nganāṅv mat, töchōktu mirun, tövai linen, kiṙūöh, akēt inrē.

¹⁷Yūtā, panam Israel inrē inyih nö in meh; haṙī-ikūö meh cha-a tö nup tö-inyihka chehen meh tö vīt, ôliv ṙòng anychīr inrē, hönī, tavī-i, sanòh vah inrē.

¹⁸Tāmaskös inyih nö in meh tökūö ṙôken nup chehen meh, kūö nup yöng kanôlò meh tökeuheūttöre mihëṅṙö; vāin aṅ Helpòn, tö-isoh sanôi sīṅp inrē.

¹⁹Vāin aṅ Ūsal tī cha nö haṙī nup chehen meh; vët, kāsia, kālamös inrē inṙī-i nup tö-inyihka chehen meh.

²⁰Tētan inyih nö in meh nö inyihkö nām uk kōra hilā.

²¹Arēpia yip rācha inrē aṅ Kētar ööi meh nö mī-inyihkö kōiny sīṅp, kan sīṅp, pököre, inrē; anū-ö në inyihkö cha nö in meh.

²²Yip mī-inyih aṅ Sīpā Rāma inrē inyih nö in meh; haṙī nup chehen meh cha-a tö nup tölngö tinhūsö tötahūsa, töpōi ṙāi ihong inrē, humlum inrē.

²³Haran, Kaneh, Ēten, Asör, Kilmat inrē inyih nö in meh.

²⁴Inyih vē nö in meh nö ṙāitītö tövai hilā, hilā tölingūṅ mat töchōktu mirun inrē, nām röön tömirūnö mat, kulēngi tö tökuvaha vītu nö köp inrē; anū-ö në inyihkö cha nö in meh.

²⁵Nup chōng aṅ Tārsis kumtö nup chehen inyihkö meh nö kiröönngöre. Lökten meh tööḵlö langan inrē ellōn minë mai.

²⁶Kēnyen meh yip kameūtö meh el ngam tökiröng mai. Sayööḵ me-eṅ tökūö ngam kuföt chuhöt ellōn minë mai.

²⁷Nup kanôlò meh, nup chehen meh, nup tö-inyihka chehen meh, Aṅ chōng meh yōm chōng meh inrē, Kamfin chōng meh, mī-inyihkö chehen meh inrē, In meh yip kumyung tarik nö ṙòkhöre ṙòkhöre yip ṙôken meh Yip më ellōn meh nö lōngtī nö ellōn minë mai ip sakāmö nganaichngen meh.

²⁸I ṙô yip yōm chōng meh nö hū-a kayīna ngaich nö lā im panam,

²⁹Ngaich ṙeū-eung el nup chōng meh nö lönhöt nup haṙah kaneūt. Yip aṅ chōng yōm chōng inrē el mai sökhak nö i kuyāyö.

³⁰Pōitô nö haramngövah meh, Kihīökkūö nö peuiny inrē. Tūi kui re cha-a tö tumlat Pilönöre inrē nö el tisum;

³¹Kūö meh cha-a nö kuhākngöre, ngaich kafanngö re tö sāk, peūinyö meh cha-a nö kiröngö miṙivlōn, holtö miṙvlōnre.

³²I ṙô cha nö harāmöre pōitô cha-a nö harāmö meh, haramngö vah meh inrē: Achīö ök töngatī pinyāingö nö sā Tūrös ellōn ngam mai?

³³Hē nuk chehen meh nö yih nö löktö el mai, Tööḵngen tī me-eṅ ngaich tö tömaṙôngö tarik; tö nuk töpōyen kanôlò meh inyihkö meh chehen inrē Kôlòtī me-eṅ tö yip rācha ngih tumlat.

³⁴Ngaich man töngamuh sayööḵ el mai, Lātaṙeū el ngam mak: ṙòkhöre nuk chehen meh tö yik kalāsi nö lōngti nö hol meh,

³⁵Ṙòkhöre yip aṅ lākūö mai panam nö pā-ekūö tö inlahen meh; pa-ekūö yip inrē rācha cha, kuvīökngöre nup kūö cha.

³⁶Hīsi me-eṅ tö yip pinhe-eṅkūö manāngen ngaich öt ōtren min öm höng öreūheu.