Read Car_Nicobarese ISIKĪ-ĔL 28 Bible Online

ISIKĪ-ĔL 28 - Car_Nicobarese bible

ISIKĪ-ĔL 28

¹Yih ngam ṙô ngam Mā Tēv nö in chu:

²Kūön tarik, ngö ṙô tö ngam rācha aṅ Tūrös, Ngö ṙô ngam Mā Tēv: Pò ngam ellōn meh nö hakeū-ellōnre, ngaich ngö ṙô me-eṅ, Chū-ö chin tēv, ūichhak chin el anūchö ellōn minë mai, höng sön pöri me-eṅ tarik, öt tēv, pòrô me-eṅ tö lōn re sā tö-akaha tēv-

³Kô-en man akaha tö Tanīĕl; öt nyatngö töhayunka nö in meh;

⁴Lökten ip mikah meh mikah elmat meh inrē öm teūngen tö kanôlò re, hamūl humlum ngaich rupīö inrē nö el chūök chehen meh;

⁵Lökten im yöng mikah meh i innyihi öm ṙūölö ṙôken kanôlò, ngaich ngam ellōn meh nö hakeūlenre I nup kanôlò meh-

⁶Lökten an ngam Mā Tēv nö ngö ṙô: Pò meh tö lōn re sā mikah tēv,

⁷Lökten, yĕh meuk, kētö aṅ tahëng chin in meh, yip tölngö pihë-eṅkūö pumnāmö tarik; Hōknyö sanët re yip min nö lā-al ngam tövai mikah meh nö hachōichngö vanāyömeh inrē.

⁸Kuringten meh yip min nö el Anūlö, ngaich kapah min me-eṅ i kinpaha töfëliyö ellōn ngam mai.

⁹Ṙòngmö hòṅ ngö ṙô ömeh, Chū-ö chin tēv, i kūö cha yip famëlngen meh, pòrô me-eṅ höng tarik, hö-ö öm tēv, eltī cha yip mahanyahken meh?

¹⁰Kapah man min i kinpaha töttunyīnyi, lökngö eltī aṅ tahëng panam; pòn ṙô chu, ṙô ngam Mā Tēv.

¹¹Hēk inrē ngam ṙô ngam Mā Tēv nö yih nö in chu:

¹²Kūön tarik, pōitô haramngövah ap rācha aṅ Tūrös, ngö ṙô inrē tö ò, Ngö ṙô an ngam Mā Tēv: Minkahgö töteung man me-eṅ tööḵlö tö mikah töteung inrē vanāyö.

¹³I Ēten man misī, elpanô-òṅ ngam Tēv; ṙòkhöre nup töpōi ṙāi ihong misī nö kinṙum meh, karnelian, tōpās, yaspis inrē, krisōliat, peril, ônik inrē safir, karpangköl, emëröl inrē; vītu nö humulum nö töökhaka nup nö ka-iphötvö tö meh. Ip sakāmö hē meh vīlöngö halēnö anū-ö.

¹⁴Holtö amahati kërup öich ṙāten meh, i kui öp töhet rôngö ngam Tēv me-eṅ misī; Ellōn nup ihong tameūyö me-eṅ kiröönngöre.

¹⁵Öt fāluṙen me-eṅ i nup talöökö meh löktökūö ök sakāmö meh vīlöngö, hanöng saha ngam kanöölö nö kôti nö in meh.

¹⁶I ṙôken inyihkö meh tööḵlö me-eṅ tö chanökhuṙen, ngaich köölö fālen me-eṅ; lökten chu sukten meh sā töchōich ṙā-ang im rôngö ngam Tēv, ngaich öp kërup amahati nö ahōnyen meh ṙā-ang ellōn nup ihong tameūyö.

¹⁷Hakeūlenre ellōn me-eṅ pò meh öm vai; Hachōichngö mikah re me-eṅ tökūö lanöököre, Sukten meh chū-ö ngaich el tumlat; hameukten meh chū-ö i kuö rācha, nö inṙam mat cha tö meh.

¹⁸Kūö ṙôken nup ötlanöökö meh, i nup michūṙen innyihi tö meh ngaich me-eṅ hachōichngö nup töhet chūök re; lökten chu kēnyö tameūyö ṙā-ang ellōn meh; haṙāpngen meh ngaich angū-ö, ngaich vīten meh chū-ö tisum el tumlat i kūö taṙòkhöre yip mameūkö meh.

¹⁹Ṙòkhöre yip tö-akahakūö tö meh in yip tarik nö pa-ekūö tö lāinyngen meh; yih man ngaich im pinhë-eṅkūö manāngen ngaich öt ōtren min höng örheūheu.

²⁰Yih ngam ṙô ngam Mā Tēv nö in chu:

²¹Kūön tarik, havöötökūöre man kū-ötö Sītōn,vë-eny öp mu-unôich in ò

²²Ngö ṙô, Ngö ṙô An ngam Mā Tēv: Yĕh meuk, lā-al meh chin, Ō Sītōn, hameuktö kanôlò re chin min ellōn meh. Ngaich cha-a min nö akahalōn tö chu öich Mā Tēv Yē chu kēken inkaha fālen in ò, hameuktö hanëtöre inrē in ò,

²³Pò chu min tīntö invah tölëlngökūö in ò, mahām inrē el kanröönö ò; ngaich yip töfëli min nö fuk ellōn ò, tökūö öp sanët lā-al ò nö keuheūtngöre lā-a, Ngaich cha-a min nö akahakūö tö chu öich Mā Tēv.

²⁴Pòn i patī Israel min nö öt ōtren tö chökhukūö lanòklöröön hēk töchökhu kaha mahachökö cha in yip hol cha yip mahayëḵngen cha. Ngaich cha-a min nö akahakūö tö chu öich Mā Tēv.

²⁵Ngö ṙô an ngam Mā Tēv: Hē chu hamūl patī Israel ṙā-ang in yip tarik chūök cha nö pirāti, ngaich hameuktö ngam hanëtöre in cha i kuö yip pumnāmö tarik, ngaich cha-a min nö iyöng i panam re öp kahëtö chu ip tarik chu Yāköp.

²⁶Ël e cha-a min inrē nö öt pinlānguṙen, mānlö patī re cha-a min inrē teūichtö vāin inrē. Öt pinlānguṙen min cha-a nö iyöng, hē chu kēken inkaha fālen i kui yip hol cha yip mahayëḵngen cha. Ngaich cha-a min nö akahalōn tö chu öich Mā Tēv cha.