Read Car_Nicobarese ISIKĪ-ĔL 30 Bible Online

ISIKĪ-ĔL 30 - Car_Nicobarese bible

ISIKĪ-ĔL 30

¹Yih ngam ṙô ngam Mā Tēv nö in chu:

²Kūön tarik, ve-eny mu-unôich, ngö ṙô, Ngö ṙô an ngam Mā Tēv: Harāmöre, Aōla kūö ngam sakāmö!

³Pò ngam sakāmö nö röhta, röhta an ngam sakāmö ngam Mā Tēv; sakāmö taṙul an min, hē nganaichngen pumnāmö tarik.

⁴Yih ap min sanët nö i kui Aikup, i Iti-ōpia ap min miṙivlōn, yē yip töfëli nö fukngö nö i Aikup, Kē-ĕyö inrē kanôlò ò, tiṙöllöngö inrē chūökröön tö machööḵlö ò.

⁵Itiōpia, Put, Lut, ṙòkhöre Arēpiā, Līpiā inrē yip tarik ngam panam inrē tö mūlta ellōn, anòngngen cha min nö fukngö tökūö sanët

⁶Ngö ṙô an ngam Mā Tēv: Yip hamòlṙen Aikup fukngö min, ap inkeūlen kumlēḵ ò min inrē nö chuh lataṙeū; löktökūö Miktòl söl Sē-enī, fukngö cha-a min nö ël e tökūö sanët, ṙô ngam Mā Tēv.

⁷Öt aṅhaṅvkūö an min nö ngaich nö ellōn töt aṅhaṅvkūö panam nup elpanam ò min inrē nö ellōn nup elpanam töpiyāyi.

⁸Ngaich cha-a min nö akahalōn tö chu öich Mā Tēv, hē chu öich Mā Tēv, hē chu tōttökūö Aikup tö tameūyö, ngaich ṙòkhöre yip hamòlṙen ò nö payāyi.

⁹Ip sakāmö angū-ö yip töveut min ma-ahānga nö ṙā-ang in chu nö kiröönngöre nö pinhëṅlökūö yip töt akahtenre aṅ i Itiōpia; ngaich yīhih kui min cha-a tö miṙivlōn ip sakāmö angū-ö nganachngen Aikup; yĕh meuk, pò e nö yih!

¹⁰Ngö ṙô an ngam Mā Tēv: Hòṅ keuheūtngen ngam kanôlò Aikup chin, lökngö eltī Nēpukatnēsör rācha aṅ Pēpilön.

¹¹Anga-aṅ tö yip tarik in ò inrē tölngö pinhë-eṅkūö pumnāmö tarik, kēhötvö min nö halëlngö ngam panam, ngaich cha-a min nö hōknyö sanët re nö lā-al Aikup, hatöölö ngam panam inrē tö töfëliyö.

¹²Ngaich chū-ö min hanyôlö ngam Nail, inyihngö ngam panam inrē eltī tötlöök tarik; kētö inhatngö chin min i kui ngam panam nup in e inrē nö ṙòkhöre löktö eltī tarik aṅ tahëng panam; Chū-ö chin, Mā Tēv töṙô-òv.

¹³Ngö ṙô an ngam Mā Tēv: Piyāingö nup insātev chin min, keuheūtngen nup insā inrē i Memfis; öt ōtren min kūön rācha im panam Aiku; ṙātö pinhëṅ-ekūö chin min i panam Aikup.

¹⁴Vīten Patròs chin min nö öt aṅhaṅvkūö; Tōttökūö Sō-an inrē tö tameūyö, kēken inkaha falen chin min i kui Tīpes.

¹⁵Vōknyö lanīnöre chin min i kui Pelusīöm, töngëḵ nö chūök i Aikup, rökngen tömaṙôngö chin inrē i Tīpes.

¹⁶Tōttökūö Aikup chin min tö tameūyö; pōyen kanihngen öp min Pelusīöm; hamëngnyu öp min Tīpes, tiṙöli nup kinlōngö e inrē.

¹⁷Yip ṙālö tarik aṅ Òn Pipēsĕt inrē nö fuk kūö sanët min; kikānö inrē chu el inkövö.

¹⁸Sangūla min ngam sakāmö nö i Tehafnehes, hē chu min tiṙōlngö ngam pūlngö Aikup, ngam inkeūlen kumlēḵ ò inrē min nö yihih kinheūten; kahultöre kui an min töṙul, chuh el inkövö min yip kūön ò kikānö.

¹⁹Ngatī tī chin kēken inkaha fālen i kui Aikup. Ngaich cha-a min nö akahalōn tö chu öich Mā Tēv.

²⁰Im kinhuk sīön samyeūheu, im raneh chingëṅt, im sinātö sakāmö ngam chingëṅt, ngam ṙô ngam Mā Tēv nö yih nö in chu:

²¹Kūön tarik, ngaich chin likölngö kël Fërō rācha aṅ Aikup; ngaich yĕh meuk hö-ö ap nö chömö, nö halankaṙen nö chömö tö inṙung, hòṅ e nö kalēḵ nö chuvāl sanët.

²²Lökten an ngam Mā Tēv nö ngö ṙô: yĕh meuk, lā-al Fërō chin rācha aṅ Aikup, likölngö nup kël ò chin min, hĕnghöre öp tökalēḵ kël öp tö-oh inrē; ngaich vīten öp sanët chū-ö min nö sukngöre nö ṙā-ang eltī ò.

²³Pirātngö yip aṅ Aikup chin min in vē pumnāmö tarik, pirātö cha inrē keuheūt panam.

²⁴Ngaich chū-ö min hangëlö kël öp rācha aṅ Pēpilön, kētö ngam sanët re inrē eltī ò: likölngö nup kël Fērō pöri min chū-ö ngaich anga-aṅ min nö aluhure nö i kūö ò sā öp tarik töhòṅ kapah tökūö nyaha re.

²⁵Hangëkö kël öp rācha chin min aṅ Pēpilön, sukngöre pöri min nup kël Fërō; ngaich cha-a min nö akahalōn tö chu öich Mā Tēv. Hē chu kētö eltī ngam rācha aṅ Pēpilön tö ngam sanët cha, silônyen ò min anga-aṅ nö lā-al ngam panam Aikup;

²⁶Ngaich chū-ö pirāt yip aṅ Aikup in vē pumnāmö tarik pirātö cha inrē nö keuheūt në panam, ngaich möl min cha-a nö akahalōn tö chu öich Mā Tēv.