Read Car_Nicobarese ISIKĪ-ĔL 31 Bible Online

ISIKĪ-ĔL 31 - Car_Nicobarese bible

ISIKĪ-ĔL 31

¹Im kinhuk sīön samyeūheu, im linūöyö chingëṅt im raneh sakāmö ngam chingëṅt, ngam ṙô ngam Mā Tēv nö yih nö in chu:

²Kūön tarik, ngö ṙô in Fërō rācha aṅ Aikup in yip tömaṙôngö in ò inrē: Sā chīö öm im kinröngö meh?

³Yĕh meuk, asāngen meh chin sā sītör chōn i Lëpanön tövāyö pak tönyātu elinchōn inrē, tömarôlòng inrē, el taṙul öp el kui ò.

⁴Harūkö an tö minë mak, marôlòng an tö tī ngam tö-aṙū, vītö nup tahël e nö hëm nö havīlö chūök tineūchtö ò, tīntö minë töhëm mak ò i nup chōn nö ṙòkhöre elinchōn.

⁵Lökten an nö tāilö rôlö lātulöng tö minë chōn elichōn; sīöplö nup nup pak ò nö kiröng marôta inrē nup pak ò, kūö töpōyen mak i nup ṙĕh ò.

⁶Ṙòkhöre chehechōn el kui vī fôngöre nö i pak ò; el katòh nup pak ò nup töṙeūla elkahôyö nö rööchnyö kūön re; el katòh nyat ò yip tökiröng pumnāmö tarik nö iyöng.

⁷Vai anga-aṅ im ṙôkö ò, i rôta minë pak ò; pò nup ṙĕh ò nö chuh lātaṙeū i töpōyen mak.

⁸Nup el panô-òṅ ngam Tēv sītör chōn ötkô nö kasālö ò, öt rēhĕn för chōn nö ṙongta pak nö in ò; höng törö-ö nup plēn chōn nö hanṙongten nö i pak ò; öt chōnuvö el ngam panô-òṅ ngam Tēv tösāta vanāyö nö in ò.

⁹Vī an chin nö vāi iṙôken nup pak ò, ṙòkhöre ngaich nuk chōn i Ēten nö vööngen tö ò. Nup më-el panô-òṅ ngam Tēv.

¹⁰Lökten an ngam Mā Tēv nö ngö ṙô: Pò ò nö tāilö kui ngam el kui ò inrē nö i minë taṙul, ngam ellōn ò inrē nö hakeūṙöre tökūö rôlòng ò,

¹¹Kēten ò chin min eltī öp tökalēḵ kūö pumnāmö tarik öthō ap min nö öt lök alaha ò asā öt lanöökö ò. Ngaich chin kavalngen ò.

¹²Tarik aṅ tahëng, tölngö pinhë-eṅ aṅ i pumnāmö tarik, kūölten ò min ngaich ṙāngen ò. I kui nup rôngö el nup achāṙö inrē nup pak ò min nö suktöre, hulalhak inrē nup pak ò nö laköl el nup talöökö mak ngam panam; ngaich ṙòkhöre yip tarik ngam tumlat min nö kiröönngöre nö ṙā-ang elnyat ò ngaich ṙāngen ò.

¹³I kui nup töpiyāyi in ò min nup chehechōn el kuföt nö iyöng, i kui nup pak ò inrē min nup töṙeūla aṅ elkahôyö.

¹⁴Ngaich anū-ö në nö inlēnngö pòn sōtu chōn i kui minë mak nö sīöp nö marôlòng hēk ṙongta elkui nö i minë taṙul, hòṅ nup chōn inrē nyamôk mak nö öt söllö nö i rôlòng re, pò u nö ṙòkhöre nö kētu nö im kinpaha, nö im lātaṙeū panam in yip tökapah tarik nö hol cha yip chamuh el Anūlö.

¹⁵Ngö ṙô an ngam Mā Tēv: Yē ò nö chuh el Anūlö ngaich chū-ö min vīten ngam tö-aṙū nö haṙivhen ò, ngaich haköp röön nup tahël ò,ngaich pōyen min nup mak samökngöre; hayūtö Läpanön chin min tö anū-unglōn tökūö e, ṙòkhöre inrē nup chōn el kahôyö min nö lanyëyi tökūö e.

¹⁶Vīten yip pumnāmö tarik chin min nö kichëyöre i ṙô öp fanukngö ò, yē chu sukten ò nö el Anūlö nö hol cha yip chamuh el Anūlö; ngaich ṙòkhöre nup chōn Ēten nup tölngö inrē tövai i Lëpanön, ṙòkhöre nup nyamôk mak, nö haṙāmölōn min im tahëng lā panam.

¹⁷Anū-ö min inrē chuh el Anūlö nö hol ò, nö in cha yip pôḵ sanët nö fëli; hôṅ, cha-a yip mī-iyöng elkatòh nyat ò in yip pumnāmö tarik min nö öt kôlò.

¹⁸Sā chiö öm ngatī i Ēten Kētu man min lātaṙeū hol nup chōn Ēten im lā tahëng lā panam; hulalhak man min in yip töt tunyīnyi hol cha yip pôḵ sanët töfëli. Anga-aṅ ön ngòh Fërō yip tömaṙôngö in ò inrē, ṙô ngam Mā Tēv.