Read Car_Nicobarese ISIKĪ-ĔL 33 Bible Online

ISIKĪ-ĔL 33 - Car_Nicobarese bible

ISIKĪ-ĔL 33

¹Yih ngam ṙô ngam Mā Tēv nö in chu:

²Kūön tarik, vë-ekūö yip tarik re man ngö ṙô inrē tö cha, Yē chu kētö ngam sanët i kui panam, ngaich yip tarik aṅ ngam panam nö hĕng tak kahëtö tarik nö ṙeū-eung in cha, ngaich vīlen ò nö amahten cha;

³Ngaich yē ò nö meuk sanët nö yih nö i kui ngam panam ngaich föö ngam römpĕt nö vë-enynang tarik;

⁴Ngaich yĕn hĕng tak hamangṙô öp römpĕt ngaich rö-ö nö höngöre, yih ngaich ngam sanët ngaich kēngen ò, i kui ò min ngaich öp mahām ò.

⁵Hang ṙô ngam römpĕt anga-aṅ, ngaich rö-ö nö höngöre; i kui ò min ngaich öp mahām ò. Yē ò pöri nö höngöre ngaich yöölen tī min anga-aṅ tö nômöre.

⁶Yē ngam amahati pöri nö meuk ngam sanët nö yih ngaich rö-ö nö föö ngam römpĕt lökten yip tarik nö öthöngöre, yih ngaich ngam sanët, ngaich hĕng tak kahë tö an in cha; kē-ĕyö öp anga-aṅ tarik nö i ötlanöököre, havëka pöri mim pak mahām ò eltī ap amahati.

⁷Ngati me-eṅ, kūön tarik, vīlö amahati chin i patī Israel; ip töng hē meh hang öp ṙô nö ṙā-ang elvāng chu vë-eny nangcha ngaich me-eṅ tö ngam finëḵlö aṅ in chu.

⁸Yē chu ngö ṙô tö ngam tötlöök, Ō tötlöök tarik, kô-òngvah man min kapah, ngaich rö-ö me-eṅ ṙô-òv tö finëḵlö ngam tötlöök nö havööngökūöre nö ṙā-ang im talöökö ò, kapah min ngam tötlöök tarik nö i ötlanöököre, havëkö öp mahām ò pöri min chū-ö eltī meh.

⁹Yē meh pöri fēḵlö ngam tötlöök nö havö-öngökūöre töm talöökö ò, ngaich rö-ö anga-aṅ nö havööngkūöre töm talöökö ò kapah min anga-aṅ nö im ötlanöökö ò ngaich pöri me-eṅ min yöölen nômö.

¹⁰Me-eṅ pöri, kūön tarik, ngö ṙô tö ngam patī Israel, Ngö ṙô yin yih ngaich: I kui ih nup tanôichngen ih tökööl ih inrē, kūö u in ngaich chīöṅpngö; sitih kanô-òṅ öi aṅ?

¹¹Ngö ṙô tö cha, Sā chu tö-aṅ ṙô ngam Mā Tēv, öt kuchīkölōn chin i kinpaha tötlöök, lahë pöri ngam tötlöök nö havööngökūöre tö talöököre ngaich aṅ; havantöre, havantöre ṙa-ang i nup tötlöök yīö; kūöyòh ṙöng öi min kapah, Ō patī Israel?

¹²Me-eṅ pöri, kūön tarik, ngö ṙô man tö yip tarik meh, Öp lanöökö öp tölöök öt ṙānyen ò min yē ò nö tôichngen; ngaich öp ötlanöökö öp tötlöök, ötfukngö min anga-aṅ tökūö e Yĕn havööngökūöre nö ṙā-ang im ötlanöökö ò; ötkô min nö aṅ inrē ngam tölöök tökūö lanöököre yē ò nö köölöfālen.

¹³Pòrô chū-ö ngö ṙô tö ngam tölöök tö ò min nö aṅ, sönen yē ò nö hayönglenre nö i lanöököre ngaich kēken öt lanöökö, öt hĕng min aṅ i nup tölöök la-en ò töfēkaṙen; kapah pöri min anga-aṅ nö im ötlanöökö kahëken ò.

¹⁴Hēk, pòrô öich ngö ṙô tö ngam tötlöök, Kapah man min, sön pöri yē ò nö havööngökūöre tö ngam tökööl ò ngaich la-evṙen tö ngam tösā chöngö töchip inrē,

¹⁵Yē ngam tötlöök nö havantö ngam tökilē-ĕyö, kētö öp kahëḵ ò nö hēk nö i unlāya, ngaich lök im tökūichö chöngö inlahen, öt kēken ötlanöökö; aṅ min anga-aṅ, hö-ö min anga-aṅ nö kapah.

¹⁶Öt hĕng min nup tökööl kahëken ò nö fēkaṙen nö in ò; teūngen an nö ngaich tö tösā chöngö töchip inrē, aṅ min anga-aṅ.

¹⁷Sön yip tarik meh nö ngö ṙô, öt tölöök an ngam talöökö ngam Mā; Yĕn ngam talöökö cha tö ötlöök.

¹⁸Yē ngam tölöök nö havöögökūöre tö ngam lanöökö ò, ngaich kēken ötlanöökö, kapah min anga-aṅ tökūö e.

¹⁹Ngaich yē ngam tötlöök nö havööngökūöre nö ṙā-ang im ötlanöökö ò, ngaich la-evṙen tö aṅ i chöngö töchip, inrē aṅ min anga-aṅ tökūö e.

²⁰Sön yi-ö ngö ṙô, Ötlöök an ngam talöökö ngam Mā. Ō patī Israel, kö akah fālen yīö chin min asā nup talöökö yīö.

²¹Im innët sīön samyēuheu inhötngö hī, im sinömö chingëṅt, im tinneūyö sakāmö ngam chingëṅt, hĕng tak ök tarik tötkô-òngvah yih nö in chu nö ṙā-ang Yērusalem nö ngö ṙô, Fukngö ap nö ngaich elpanam.

²²I kui chu ngaich ngam kël ngam Mā Tēv im harap urēhĕkūö ngam töpāngö nö yih; ngaich anga-aṅ nö löpnyökūö elvāng chu im peuheū i hē ngam tarik nö yih nö in chu; luvë-akkūö ngaich ngam elvāng chu, ötngöhören chū-ö ngaich öt huveū-euṙô.

²³Yih ngam ṙô ngam Mā Tēv nö in chu:

²⁴Kūön tarik, iṙūöhöṙô yip aṅ në töyëḵngen chūökö panam Israel nö ngö ṙô, Töng hĕng tak ök Aprahām nö tarik, ngaich sön anga-aṅ nö teūngen nö amīnu töng panam; maṙôngö pöri ayī-ö; kētu ön ngih panam nö in hī nö amin hī.

²⁵Lökten ngö ṙô tö cha, Ngö ṙô an ngam Mā Tēv: Kāḵ alaha man nö kumngöre tömahām, môklökūöre ngaich minë mat meh i nup insātēv meh, kitaknyö mahām inrē; amīnu öm min töng panam?

²⁶Kēken sanët man, halönyken sin-òkkūö man ngaich yī-ö kö hachōichngö pīhö holre; amīnu öi min töng panam?

²⁷Ngö ṙô tö ngih in cha, Ngö ṙô an ngam Mā Tēv: Sā chu tö-aṅ, kô-òngrit yip mī-im töyëḵngen chūökö min nö fukngö kūö sanët: ngaich anga-aṅ öp më-el kahôiṙen min nö kētu tö chu nö i nup töṙeūlö nö kā-ayö; achā-a inrē yip më-el töngëḵ chūökö më-el kinluhu inrē min nö kapah tökūö invah tölëlngökūö.

²⁸Ngaich chū-ö min vīten ngam panam nö öt aṅhaṅvkūö töyëḵngen inrē; ngaich ap inkeūlen kumlēḵ e min nö öt ōtre; ngaich minë rôngö Israel min nö öt aṅhaṅvkūö lökten min nö öt lökö.

²⁹Möl cha-a min nö akahalōn tö chu öich Mā Tēv, hē chu vītö ngam panam nö öt aṅhaṅvkūö töyëḵngen inrē kūö nup in cha sin òk kūö lahūölken cha.

³⁰Me-eṅ pöri, kūön tarik,yip tarik meh vamë-eṅkūöre tö inlahen meh nö i kaha patī i kūö nup inkūp patī inrē, nö ngö ṙô tö höö, nö kö i holre, Tā-a hang öp ṙô yamih nö ṙā-ang im Mā Tēv.

³¹Ngaich yih cha-a nö in meh nö sā tarik yamih, ūichngöre ngaich cha-a nö i kuö meh nö sā tarik chu, ngaich cha-a nö hangṙô meh hö-ö pöri min cha-a nö kēken e; pòn i minuhre cha-a nö hameuktö tökiröng hanāngenlōn, kētu pöri öp ellōn cha nö i taneūngen cha.

³²Ngaich, yĕh meuk, ngaich me-eṅ in cha sā öp töhĕng tak tumköknyö hanāngenlōn tinkökö tövāyöṙô vāyö tī inrē nö röng, pò cha nö hang öp ṙô meh hö-ö pöri min cha-a nö kēken e.

³³Yē ngih nö yih-yih an min, ngaich möl cha-a min nö akahalōn töre nö aṅhaṅv in tö pròfĕt.