Read Car_Nicobarese ISIKĪ-ĔL 34 Bible Online

ISIKĪ-ĔL 34 - Car_Nicobarese bible

ISIKĪ-ĔL 34

¹Ngam ṙô ngam Mā Tēv yih nö in chu:

²Kūön tarik, vë-eny mu-unôich lā-al yip yōm pököre in Israel, vë-eny mu-unôich, ngö ṙô tö cha, yip yōm pököre, Ngö ṙô an ngam Mā Tēv: Mah, yī-ö yōm pököre Israel öi töng maha-aṅhalre! Hö-ö yip yōm pököre nö hòṅ ha-aṅlö nup pököre?

³Kāḵ nup tösangöö yin yī-ö hayūtöre yin tö sanôi sīṅp, ṙatnyö likeun tö alahav yin; hö-ö pöri yī-ö ha-aṅhal në pököre.

⁴Hö-ö yin hangëkö alaha tötkalē-en, hö-ö yin halinken tövahavö, hö-ö yin haṙung tökaròk, hö-ö yin havantö ngam tölō-ongkūö, hö-ö yin chöh ngam töchatngen holtö linīpö yin kanësen inrē öi hayöngö u.

⁵Lökten u nö parātiyö, pòn öt yōm pökörevö umuh; ngaich kētöre anū-ö nö nyā-aṅkūö nup tö tainy aṅ el inchōn.

⁶Pirātiyö nup pököre chu, keuheūt kui nup rôngö nup nö havötköre kö i kui nup tömarô-òlkui rung inrē; ngaich nup pököre chu nö parātiyö nö i kūö ngam tumlat, öt hĕng tak chamöh hēk öp chamöhö u.

⁷Lökten, yī-ö yōmpököre, hang ṙô ngam Mā Tēv:

⁸Sā chu tö-aṅ, ṙô ngam Mā Tēv, kūö minë pököre chu nö vītöre nöng pôḵ, vītöre nun minë pököre chu nöng nyā-aṅkūö nup tötainy aṅ el inchōn, pòn öt yōm pökörevö umuh; kūö yip yōm pököre chu inrē nö öt chöh nup pököre chu, höng ha-aṅhalre pöri yip yōm pököre, ngaich rö-ö nö ha-aṅlö nup pököre chu;

⁹Lökten, yī-ö yōm pököre, hang ngam ṙô ngam Mā Tēv:

¹⁰Ngö ṙô an ngam Mā Tēv, Yĕh meuk, lā-al yip yōm pököre chin; eltī cha chin min inrē havëkö nup pököre chu, ṙāngen cha inrē nö ha-aṅlö nup pököre chu; ötngöhören yip min yōm pököre nöng ha-aṅhalre. Kēnyö nup pököre chin min nö ṙā-ang elvāng cha, hòṅ u nö öt höng nya-aṅkūö cha.

¹¹Pòn ngö ṙô ngam Mā Tēv: Yĕh meuk, chū-ö, chū-ö takô chin min chöh nup pököre chu, ngaich chöhlen u min.

¹²Sā öp yōm pököre nö chöhlen nup pököre Yĕn rēvre nup pököre ò nö marô-òlkūö pinrātngö, ngatī chū-ö min chöhlen nup pököre chu; ngaich chū-ö min ṙānyen u ṙā-ang i nup chūökö u nö ngaich nö parātiyö ip sakāmö tötaṙūlu kūö tökufëyö sinngūlö inrē.

¹³Ngaich chū-ö min kēnyen u ṙā-ang in yip tarik, hamūlö u inrē ṙā-ang i nup panam, ngaich kēten u chū-ö min ip panam u; ngaich chū-ö min ha-aṅhal u i kui minë rôngö Israel, i nup töhëmlö mak, i nup chūökö inrē tö aṅ-haṅvkūö im panam.

¹⁴Ha-aṅlen u chin min tö tölöök kiyôp, ngaich i kui minë tömarô-òlkui rôngö Israel nup nyā-aṅkūö u min; in e min anū-ö nö ṙōlhaka ip panam tökôlò aṅkūö tö kiyôp, i nup tökôlò kiyôp anū-ö min nö nyā-aṅvkūö i kui nup rôngö Israel.

¹⁵Hakôtenre chin min yōm nup pököre chu, haṙōlngen u chin min inrē ngö ṙô ngam Mā Tēv.

¹⁶Chöh töchatngen chin min, kētö tölō-ongkūö chin min inrē, haṙong nup tökaròk chin min inrē, hangëkö tötkalē-en chin min aṅtö nup tö-alahavö chin min tö nup töngëḵ alaha inre; ha-aṅhal u chin min tö ngam kinṙôka tötmichūṙen.

¹⁷Yī-ö pöri, pököre chu, ngö ṙô an Mā Tēv: Yĕh meuk, ihôi në pököre chin akaha fālen, tö nup töttāli kūön sīṅp tö kōiny pököre inrē.

¹⁸Röh öm kô-òngkūö tö e öm nya-aṅvkūö tö minë tökôlò kiyôp, minë törööntu kui tö elröön meh hol minë kiyôp meh; òk tösehngöre mak inrē, töp lökten meh hachōichngö ngam tahëng tö elröön re?

¹⁹Ngaich nyā-aṅvkūö hòng minë pököre chu tö minë töröönö tö elröön meh, ngaich òk ngam töhachōichi tö elröön meh inrē?

²⁰Lökten, ngö ṙô an ngam Mā Tēv tö cha; Yĕh meuk chū-ö chin min ma-akah fālen ihôi tö-alahav pököre tölëv inrē pököre.

²¹Pò meh singtö kaha re kūökël re inrē ngaich kuköhngö nup tötkalē-en öm aṅtī tö sinrōlre, hanöng saha tī meh marôvat tī pirātngö u.

²²Hayööken nup pököre re chin min, öt ngöhören nup min nöng pôḵ; ngaich chū-ö min akaha fālen pököre tö pököre.

²³Ngaich chū-ö min hĕng tak vahīlö tö yōm pököre nö i kui u, öp tarik chu Tāvit, anga-aṅ ap min maha-aṅhal u: ha-aṅhal u öp min ngaich yōm u inrē.

²⁴Ngaich chū-ö, öich Mā Tēv, min öich Tēv cha, öp tarik chu inrē Tāvit min nö rācha nö in cha; chū-ö chin, Mā Tēv töṙò-òv tö e.

²⁵Ngaich chū-ö min vīten kinlēḵngô lanāmö in cha ahōngö nup tötainy aṅ el inchōn inrē nö ṙā-ang im panam, hòṅ u nö öt pinlānguṙen nö el inchōn haṙòh inrē nö ël nup chōn.

²⁶Vīten ngam inkôlò chin min in cha in nup chūökö inrē mahavīlö ngam rung chu; ngaich chū-ö min tīntö ngam tö-aṙöka kumṙah ip hē e: ngaich angū-ö min tö-aṙöka kumṙah nö inkôlò.

²⁷Ngaich nup chōn el kahôyö min nö ṙônguvö, ngam tumlat min inrē nö pōyen aṅkūö tö ṙòng, ngaich acha-a min nö öt pinlānguṙen nö i panam re; ngaich cha-a min nö akahalōn tö chu öich Mā Tēv, yē chu likölngö nup kāl kaneun cha, ṙānyen cha inrē ṙā-ang eltī cha yip mahakövö cha.

²⁸Öt ngöhören cha-a min nö pôḵ pumnāmö tarik, öt rēhĕn min nup töṙeūla im panam nö kāḵngen cha; öt pinlānguṙen min cha-a nö iyöng öt hĕng tak min inrē vamīten cha nö pa-ekūö.

²⁹Ngaich chū-ö min vīten nup taneūich cha nö kôlò hòṅ cha min nö öt keuheūt tökūö neūkö nö im panam, öt ngöhören inrē nö kihngen töminṙēngö tövē pumnāmö tarik.

³⁰Ngaich cha-a min nö akahalōn tö chu öich Mā Tēv,Tēv cha, öich in cha, tö cha inrē, ngam patī Israel, nö tarik chu, ṙô ngam Mā Tēv.

³¹Ngaich yī-ö pököre chu pököre aṅ ël öp kiyôp chu, Tēv yīö chū-ö inrē, ṙô ngam Mā Tēv.