Read Car_Nicobarese ISIKĪ-ĔL 35 Bible Online

ISIKĪ-ĔL 35 - Car_Nicobarese bible

ISIKĪ-ĔL 35

¹Yih ngam ṙô ngam Mā Tēv nö in chu:

²Kūön tarik, havöötö kūöre man lā im rung Sēir, ve-eny mu-unôich in e,

³Ngö ṙô tö e, Ngö ṙô An ngam Mā Tēv: Yĕh meuk, Rung Sēir, lā-almeh chin, lā-al meh chin min inrē öich hateutnyö këlre, vīten meh chin min inrē öt aṅhaṅvkūö payāiyi inrē.

⁴Piṙapngö minë el panam meh chin min nö öt aṅhaṅv, ngaich me-eṅ min vītöre öt aṅhaṅvkūö; ngaich akahalōn min me-eṅ tö chu öich Mā Tēv

⁵Pò meh hāṅngen tö tötchanūhuvṙen kumnyahṙen, ngaich kētö vē tarik Israel nö I minhôiṅyö ngam sanët ihē öp ötkanôlò cha, ihē öp manā-aṅ sācha cha;

⁶Lökten, sā chu tö aṅ, ṙô Mā Tēv, Halēnken meh chin min pôḵ mahām, lū-u meh min inrē ngam mahām, pò meh töfāluṙen i mahām, lökten mahām min nö lū-u meh.

⁷Piyāingö Rung Sēir chin min vī-i e inrē nö öt aṅhaṅvkūö; rökngen e chin min tö yip yamih chamuh inrē nö in e nö ṙòkhöre.

⁸Hatööḵlö minë rôngö meh chin min tö töfëliyö; i kui minë rung meh, el minë achāṙô meh, el minë linrākö meh inrē nö ṙòkhöre cha-a yip töfëliyö töfukngö tökūö sanët.

⁹Vīten meh chin min tö urāngen öt aṅhaṅvkūö, öt iyöngökūö min inrē minë elpanam meh. Ngaich akahalōn min më-eṅ tö chu öich Mā Tēv.

¹⁰Pò meh ngö ṙô, Amin chu yin min vē tönët pumnāmö tarik tö në tönët pumnāmö panam inrē, ngaich in min kē-ĕ u nö amin re pòrô ngam Mā Tēv nö öt umuh

¹¹Lökten, sā chu tö-aṅ, ṙô ngam Mā Tēv, Lök alaha meh chin min sā ap tanānyö meh kumnyah elmat meh inrē ap hameuktö meh tökūö meh surīkhen cha; ngaich chū-ö min mikahtökūö meh tö chu öich in meh, hē chu akah fālen meh.

¹²Ngaich yī-ö min akahalōn tö chu, öich Mā Tēv, öich hamang nuk ṙô meh ötlēḵkôre i nuk rôngö Israel, tö ngö, Ngaich nuk nö piyāyi, ngaich nö kē-ĕyö inrē nö in ih nö nyā-aṅkūö ih.

¹³Ngaich me-eṅ hapōilöre lā-al chu aṅtī tö ngam elvāng meh, ṙūölöṙôre inrē lā-al chu; Hāngö e chin.

¹⁴Ngö ṙô an ngam Mā Tēv: Vīten meh chin min öt aṅhaṅvkūö tökūö ṙanāmölōn ngih tumlat nö keuheūtngöre chūök.

¹⁵Sā meh ṙāmölōn i kui ngam amin ngam patī Israel, tökūö e nö öt aṅhaṅvkūö, ngatī chin min lök alaha meh; öt aṅhaṅvkūö man min, Rung Sēir keuheūtngöre Ētöm inrē, ṙòkhöre angū-ö. Ngaich cha-a min nö akahalōn tö chu öich Mā Tēv.